Ua leva o tautua le afioga ia Tuimalealiifano, ua 17 tausaga o avea ai ma Sui Ao ole Malo o Samoa. Peitai ua valoia nei e le au vavalo, e tasi lava lana nofoaiga, ona toe sui foi lea ole tofiga Ao ole Malo.
Ole ā le faavae o lea mau?
Mai ia i latou e silisili ona latalata ile alii Palemia? Sa malele ai lana afioga ile taitai ole atunuu, “sei oo foi sia toeaina iai ile tofi Ao ole Malo ua leva foi o tautua.”
Ole faauigaina o lea saunoaga, e tasi lava le Paeaiga ona malolo lea. E maitau atu ole finagalo ole taitaiga ale HRPP, ina ia tofia tagata, ae matuā tafi ese Tama a Aiga.
Ole itu e maofa ai ole gugu lea ole Afioga ile Sui Palemia, Afioga ia Fiame Naomi Mataafa, ae ose tasi o suli e faasino i Tama Aiga. Ole ā se silasila a aiga o Tuimalealiifano ma le finagalo ole atunuu, oloo fesiligia ai le tatau ma le lē tatau ole tofiga Ao ole malo, pe a faatusa i Papa ole Tui Aana.
Ae ole a se tofa i aiga e tolu ma le vaa nofo tolu e ou le tama, auā e faalagi ile Vao lona Tui Aana ae lei eeina ona Papa. Tainane lona manumalo ile faamasinoga, lea na tofia ai e umia le suafa Tuimalealiifano.
Tusitusiga ua tuanai ole mataupu lenei, e le o fesiligia agavaa ole afioga ia Tuimalealiifano. Ae ona ua lagalagā finagalo ole atunuu, ile eseesega ole eeina o Papa ole Tui Atua, lea e pulea e Lufilufi. Tainane o Tupua le Tama a Aiga, e pulea ele aiga Sa Fenunuivao.
I sailiga ale Tusitala, o lenei lipoti, afai ae tumau pea le malosi o lana afioaga, e ono toe lafo iai le tofi ole itumalo, e pei ona faia foi ia Tupua Tamasese Lealofi le IV i aso ua mavae. Oloo tu le loma ise feiloaiga ma lana afioga a‘o lei faasee ese ma le nofoa ile aso 25 Iulai.
Ma ole a maua ai se avanoa e fesiligia tuusa‘o ai lana afioga e uiga i mataupu, lea e talitonu na mafua ai ona toatamai le HRPP, ma lē toe filifilia ai e avea ma Ao ole malo. Tainane oloo saogalemu lea faaiuga i lalo ole faavae (constitution).
Oloo manino ai ole pule e filifili ai le Ao ole Malo i totonu ole lima tausaga ua iai lea ile fuainumera toatele ole Palemene. Ole fuainumera tele ole Palemene e 47 ona sui oloo umia ele HRPP.
Ole itu e maofa ai ole uluai palota ale HRPP, e 27 na palota ia Tupua. Ae 20 sa ile afioga ia Tuimalealiifano ma Le Mamea Ropati. Peitai, ina ua toe fono le faafaletui ale HRPP, na suia ai loa togi o aau, ina ua fulisia le lagolagoina o lana afioga ia Tuimalealiifano Vaaleto‘a Sualauvi II e avea ma Ao ole Malo.
Tatou tatalo faatasi ia manuia lona tulai mai e nate faaauauina le galuega ale afioga ia Tui Atua Tupua Tamasese Efi, ae faapea foi ona momoli atu ai, faamanuiaga i lana afioga ia Tui Atua ile atoaga ole 10 tausaga talu ona tulai mai ile tofiga ole Ao ole Malo.
Tatou patipatia faatasi le sa ole Atunuu, ina ia manuia Samoa e ala ia latou faaiuga fai, ma ia maua ai pea lona taiala e faavae ile Atua Samoa.
