O le Aso Faraile 18, Aso Toonai 19 ma le Aso Sa 20 o Aperila, o le vaitaimi tonu lava o le Aso Maliu o le Faaola ma le Aso Sa o le Toetu manumalo mai o lo tatou Alii i le tuugamau, o le vaitaimi lea ua manatu le Ekalesia i Samoa ma Niu Sila, o se taimi lelei lea ua tatau ai ona tuufaatasia le ekalesia aoao mo se uluai taimi, auā le faamautuina o le faavae o le ekalesia mo se taimi muamua aemaise foi o se tusi taiala o le a taialaina galuega uma mo le manuia ma le tapuai fiafia i le Atua ma lana feau.
E toavalu le auusufono mai Samoa e aofia ai ma le susuga i le taitai aoao le susuga ia Petaia Setu ma le latou teutupe le faletua ia Asomua S Hakai. O le susuga lava i le peresetene aoao ia Rev Petaia Setu na taitaia le sauniga o le Aso Faraile, ma sa faataunuuina lea i le nofoaga o loo faia ai sauniga lotu a le Ekalesia i Manurewa.
Na lagona uma e tagata le tāua o lea aso ona sa faatino e le autalavou mai i Manurewa se tala o le aso maliu e momoli ai le feau i loto o lana fanau. O le Aso Toonai na see atu ai le fono ma faaauauina i Papatoetoe i le nofoaga o loo faataunuu ai sauniga a le Ekalesia i Papatoetoe, ma o le susuga i le toeaina malolo manumalo ia Silipa Mamea sa taitaia le sauniga i le aso lea.
Ae o le Aso Sa sa toe foi atu ai i Manurewa mo le toe aso o le tuufaatasiga. O le autalavou i Papatoetoe na tapenaina le tala o le toetu manumalo o le Alii Faaola o Iesu Keriso.
O le laulau a le Ekalesia aoao mo le taimi muamua, ua filifilia i ai le susuga ia Petaia Setu o loo tausia le uluai Metotisi Fou i Samoa i le afioaga lea o Vaitele. O le failautusi aoao ua filifilia i ai i le tofa ia Ulugia Niuia Aumua mai le ekalesia i Papatoetoe, Niu Sila. O le teualoa ua tasi moemoe i le faletua ia Asomua S Hakai mai le ekalesia a Vaitele i Samoa.
Ua mae‘a foi ona lau le tusi tofiga a le ekalesia i le 2014 seia oo atu i le tausaga 2016 i le masina o Aukuso ma ua filifilia ai le susuga ia Iosefa Aumua ma le faletua na te taitaia le lafu mamoe i Manurewa ae ua filifilia le susuga ia Fatu Manu ma le faletua na te tausia le galuega i Papatoetoe ae ua filifilia mai le susuga ia Mafua Kolose, o ia lea sa uluai vaaia le galuega i Papatoetoe e avea ma alii misionare tala‘i a le ekalesia ona e talitonu o loo ia te ia le faauuga ma le molimau mo le galuega a le alii.
A o le susuga i le taitai aoao ia Petaia Setu o loo ia tausia lava le galuega i Vaitele, i Samoa. O le mae‘a ona fofogaina o le tusi tofiga e le tofa ia Ulugia Niuia Aumua sosoo ai loa ma le toonai tele na saunia lava e le falelua o Papatoetoe ma Manurewa.
O se vaaiga uigaese, a o tutulai faalapotopoto ma uulima faatasi o le faailoga o le tasi le loto, tasi le fatu, tasi Le Atua moni e tapuai ai ekalesia uma, a o latou lagiina le viiga o Le Atua “Ia faatasi pea Iesu ma oe, tausi ia te oe lau pele”.
Mae‘a lea ona lululima lea ma faatofa, ua faaiuina le koneferenisi ma le manuia i le uluai ekalesia a le Metotisi Fou a Le Atua na faavaeina i le aso 9 Tesema 2012 i aiga e toaono.
O le susuga lava ia Petaia Setu sa tausia le galuega ae o le teutupe ma le failautusi sa i aao lea o le susuga i le faafegaiga ia Simeti Tupai. I le taimi nei la ua 12 aiga, sosoo ai ma le faatūina o le ekalesia Metotisi Fou i se taimi muamua i Aotearoa i le pitonuu o Papatoetoe.
O le uluai sauniga o le Aso Sa, 2 Iuni 2013 ma sa taitaiina e le susuga ia Fatu Manu, sa latou galulue faatasi ma le susuga ia Mafua Kolose ma le afioga ia Faumuina Faasalafa Iona ma matafale e fā.
Ae o le aso 7 Iulai 2013 na tatala aloaia ai, o le susuga lava i le taitai aoao o le ekalesia sa taitaia le sauniga ma ua ono aiga i le taimi lea. I le taimi nei la ua 31 aiga ua iai nei i lea ekalesia e ese ai nisi aiga o loo lolotu pea i le taimi nei. O le tasi ekalesia ua 3 ai ekalesia Metotisi Fou a le Atua, o le ekalesia lea i Manurewa.
O le ekalesia lenei ua leva ona faavaeina peitai o faamaumauga i le taimi nei, o le 1994 sa iai i le ekalesia Metotisi Niu Sila i le ta’taiga a le susuga ia Iosefa Maiava, mulimuli ane ona i lalo lea i le faamalu a le ekalesia a Metotisi Uesiliana i le taitaiga lava a le susuga a Maiava, peitai o Oketopa 2013 sa maua ai se latou fesootaiga ma le susuga ia Petaia Setu ma liliu mai ai loa i lalo o le faamalu a le Metotisi Fou i le masina o Tesema 22, 2013 i le taitaiga a le susuga pei ona ta‘ua i luga ae ua 14 matafale i lena taimi. I le taimi nei la ua 17 aiga, ae o le susuga lava ia Iosefa Maiava o le faifeau lea, ae o le teutupe o le tausi ia Manino Sauvao, failautusi o le tofa ia Toaigalii Efi.
Na faaiu i le tatalo faamanuia a le susuga i le taitai aoao.
