E oo mai i le taimi nei ua tauave e se komiti lē tumau le pulea o galuega a le faalapotopotoga, ae e lei toe maua mai se faamatalaga i sailiiliga a le komiti na tofia e le peresitene ma lana komiti.
O tuuaiga na agiga faasaga i le faaaogā sese o nisi o malosiaga o le peresitene i faaiugafai i le faaaogāina o tupe ma meatotino a le Koluse Mumu, o loo taoto ai se su poo se tagi a le peresitene i le faamasinoga faasaga i nisi o sui o le faalapotopotoga ua lotolotoi nei i le komiti lē tumau ua vaaia galuega a le Koluse Mumu a Samoa.
O le Aso Gafua, aso 28 o Mati 2011 na valaauina ai lea tagi i le Faamasinoga Maualuga, peitai ua toe tolopo. Na valaau ai foi ma le talosaga apili a le peresitene le afioga Muagututagata Peter Ah Him faasaga i le faaiuga a le faamasinoga, ua avanoa ai ona see atu le komiti lē tumau ma tauave tiute o le pulea o galuega a le Koluse Mumu.
Peitai ua iai ma se talosaga mai sui o le faalapotopotoga na finauina le faasee ese o le komiti faafoe ina ia faalēaogā lea talosaga apili poo se strike out motion.
Ua lata i le tolu masina o faia le sailiiliga a se komiti na filifilia e le Peresitene ma le Komiti Faafoe a le Koluse Mumu a Samoa, ua faasee ese ma le taitaiga o le faalapotopotoga, ae see atu se komiti lē tumau o sui o le Koluse Mumu e vaaia galuega a le faalapotopotoga i le taimi nei.
O le komiti faafoe ua faasee ese o loo aofia ai ma le peresitene, le afioga i le faipule o Sagaga Le Usoga, Muagututagata Peter Ah Him, ae o le komiti na latou tofia ua aofia ai se alii loia, ma le peresitene o le Faalapotopotoga o le Toomaga mo Tagata Puapuagatia le Samoa Victim Support Group.
O tuuaiga na faalele e nisi o sui o le faalapotopotoga faasaga i le peresitene i le faaaogā sese o tupe ma meatotino, o le isi lea autū o tiute o le komiti na filifilia o le sailiili lea pe o iai ni lape ma ni faaletonu i le faaaogāina o ia meatotino faapea le faatinoga o galuega a le Koluse Mumu.
Ua faailoa e se molimau e faapea, ua mae‘a le sailiiliga a le komiti na filifilia e le peresitene ma le komiti faafoe, peitai o loo iai nisi o vaega o loo moomia ona feutagai ai le komiti ma le komiti faafoe ona faato‘ā tuuina atu lea o le lipoti mo le silasila i ai a le komiti ma le faalapotopotoga.
Ua iai se molimau ua na faailoa e faapea, e fai lava si tele o faaletonu na maua e lea komiti ia latou sailiiliga, e lē gata i le faaaogāina o meatotino ae o le faatinoga o galuega a i latou o loo galulue i le faalapotopotoga.
E lē o mafai ona faamaonia mai se molimau e faapea, ua iai ma se fautuaga i lea lipoti ina ia faia se komisi suesue e sailiili ai faaletonu ua aafia ai le faalapotopotoga.
O le lipoti foi lea o loo iai ma fautuaga e tusa o ni faaletonu sa tuuaia ai le faasoaina o fesoasoani na tuuina atu o le sunami poo le galulolo, lea na aafia ai se vaega o Upolu i le aso 29 o Setema i le tausaga e 2009.
