Ofo Kuiniselani i faiga ale Divas

Taitai malaga Sonya ma si ona tuagane, Tanu Sanft sa tapenaina le faamoemoe o le DIVAS ma le ausiva ale Manualii i Perisipeni ia Tesema 2017 ma Tafaoataata Vili itu taumatau
Taitai malaga Sonya ma si ona tuagane, Tanu Sanft sa tapenaina le faamoemoe o le DIVAS ma le ausiva ale Manualii i Perisipeni ia Tesema 2017 ma Tafaoataata Vili itu taumatau

 Ua tuuvaa atu nei mo Aukilani le aufaafiafia lauiloa ale DIVAS poo se vaega ole itupa o faafāfine, mo le latou faafiafiaga lea ole a faia ile po ole Aso Faraile aso 12 o Ianuari ile Tausala Club faatasi ai ma le Ausiva ale Manualii.

Ua taliu le faigamalaga, ae ua mae’a ona tuu ile aai o Kuiniselani se fatu e manatua ai pea le 2017. O lea fatu, ole faatupulaia pea ole fiafia i loto ma agaga o tagata, auā e maua le ‘ata, maua le fiafia ma fealofani tagata uma.

Ose faafiafiaga uigaese ma le maoa’e auā e moni lava le upu, “E laititi ae ma’ini” ae ua fai lava ua mafai. E lē galo, e misia ele toatele le aumalaga aemaise le ausiva lalelei ale Manualii na vavaeina faafiafiaga ale DIVAS.

Ole ‘ata lava ose fualaau sili ona aogā ile soifua ole tagata auā e fiafia ma soifua umi ai, nai lo le atuatuvale ma popole i mea o lenei olaga ua tumu i faafitauli ma faigata.

Ole saunia lelei o faafiafiaga ma tapenaga ale DIVAS ma le ausiva ale Manualii ile po muamua le Aso Toonai 23 o Tesema, na toe tulitatao ai le po lona lua, 29 o Tesema ele toatele o tagata.

Ose itupa lava e lē kea, e agamalie, e iloa lelei lava foi ele vaega faafeiloai nai tamaloloa pe afai oloo iai o latou faletua, ae tainane la oni alii e o atu taitoatasi, ia e sasao faaafi ai nai o latou uiga.

Na matuai maoa’e le mālie pei ona iai le uluai faafiafiaga ile po muamua lea na ave ai i luga ole stage se tasi o alii ae faia sana interview uiga ese ma avea ma ala na matuai alu ai le taliē ale toatele ile faatinoina o a latou show auā na lava foi le onosai asi alii. Ole itu e lelei ai, ua masani uma ai le toatele ole itupa o alii, e ala foi na ulufale ma fia maimoa ile Divas ona e silafia uma le tulaga e oo iai le saeina ole mata ole aitu.

E na’o le lua po na faafiafia ai i Kuiniselani ae ua iloga na fiafia le toatele oi latou ile mananaia o a latou taumafaiga. O i latou sa faafiafia e aofia ai le MC o Blondie, faapea le tamaitai o Gustav ma le teine o Towtrie faapea nisi ole aumalaga na fai sao uma lava.

Na malaga faatasi mai le aumalaga ma le faletua ia Sonya Sanft (Taitai Malaga) e lē gata ole Divas ae faapea foi le ausiva talenia ma le lalelei ale Manualii lea oloo lauiloa i faafiafiaga ile Maliu Mai Night Club ma le Taumeasina i Samoa. Na lagolago malosi foi le susuga ile toeaina ia Tuiloma Tanu faapea le faletua ia Pouli Sanft mo lenei faamoemoe aemaise nisi o pisinisi sa fesoasoani malosi ile faalauiloaina.