Ua amataina nei ni faatalatalanoaga a le Ofisa o le Toomaga mo e Puapuagatia (Samoa Victim Support Group) i Kuiniselani ma ua faaopoopo i ai ma se lala i Sini. E pei ona silafia le ofisa autu na tatalaina i Samoa i le tausaga e 2005 e fesoasoani mo fanau laiti ua toe faamalosia (incest rape) e tagata lava o latou aiga.
Ua lē gata i lea ae ua faalauaitele atu lea fesoasoani i tagata ua aafia ona o isi solitulafono e iai tina ua sauāina e o latou taitoalua (domestic violence).
O nisi o fanau tamaitai ua afaina e pei ona silafia le lē talafeagai o tausaga o i latou nei ua ma‘itaga i o latou lava tamā poo taitoalua o latou tina (stepfather).
O nisi nei o faafitauli o loo puipuia pea e le Ofisa o Toomaga e ala i le aveeseina mai o fanau mai o latou aiga auā le puipuiga malutia o i latou, a o faasavali moliaga o latou ua faaooina nei solitulafono i le fanau.
O le Ofisa o Toomaga ua iai nei ona lala i Niu Sila (Aukilani & Ueligitone) Amerika, Amerika Samoa faapea Sini ma Ausetalia.
O le aso 19 ma le 20 o Oketopa lea o le a tatalaina aloaia ai lala i Ausetalia e le afioga i le Palemia o Samoa, Susuga Tuilaepa Sailele Malielegaoi ma le faigamalaga a sui o le Palemene i le masina fou o Oketopa i Ausetalia nei. O le aso 25 o Aukuso ma le 1 o Setema na faia ai uluai faatalatalanoaga i Kuiniselani, ma na matagofie le lagolago a nisi o tamalii ma failauga faapea faletua e ala i le lagolago ma le fesoasoani i lenei polokalame tāua.
Sa auai le afioga i le Peresetene o le Aiga Samoa Inc i le itu i Matu, Taulapapa Lemalu & faletua ia Joyita Slade.
Na faatasi atu foi le Peresetene o le South Pacific Youth Justice, le faletua ia Theresa Butler, Pastor Carolyn Epa (Ekalesia Evangelism Ministry, Gold Coast), Pastor Poamo ma le faletua ia Folole Savaiinaea (Ekalesia Evangelism Ministry Bethania i Logan), Pastor Netanie mai le Island Breeze Ministry, faapea le toatele o ē sa lagolago atu ma opogi lea foi polokalame sili ona tāua.
O loo loma le faatalatalanoaga i le Aso Toonai 22 o Setema i le nofoaga o Logan, Inala, Ipswich ma nisi o pitonuu lata ane. O le masina fou o le a malaga mai ai le faletua ia Vitolina Chang, o ia o le Peresetene o le SVSG Samoa faatasi ma nisi o sui o le ofisa auā le faamoemoe i Kuiniselani nei.
O le Peresetene o le QLD South Pacific Community Support Group INC, o Pastor Manutoao Tauveve Campbell. O le failautusi o le faletua ia Eseta Galumalemana Afamasaga Frost, ma le teutupe o Nome Tuagalu.
E iai le talitonuga o le ofi mai o nei faletua ma nisi o taitai o faalapotopotoga faapea susuga i auauna Paia a le Atua e faatu lenei lala i Brisbane, o le a mafai ai ona lagolago ma auai le mamalu o le atunuu, ona o le taumafai i ni auala e foia ai nei ituaiga faafitauli e lē tatau ona tupu i o tatou tagata auā o se atunuu Kerisiano.
