E 25 gagana oloo mafai ona tautua iai le auaunaga ale CAB Language Connect i totonu o Aukilani, o lenei 25, oloo lotolotoi ai ma Samoa i totonu, ae ole atunuu muamua foi lea ole Pasifika o lea ua ofi iai lana gagana e faaaogāina i taimi e valaau atu ai ona tagata mose fesoasoani.
O lenei tautua oloo faapitoa lea i gagana eseese a atunuu, mo mataupu e fia maua ai le fesoasoani auā le malamalama i tulafono male nonofo ai i totonu o lenei atunuu, e pei ole ofisa o femalagaa‘iga, fesootaiga vavalata manuia mo tagata lautele, siosiomaga faaleaiga, fesoasoani mo tagata lautele, fale ole malo ma tagata mautotogi, mataupu tau i galuega, faalapotopotoga ma galuega faatino, soifua maloloina ma fautuaga, Paketiina o tupe ma lafoga ale malo, auala o femalagaa‘iga, fesoasoani i lou sa‘o ile tulafono, tiute ma aiātatau, tulafono ale malo i fefaatauaiga ma faamatalaga faalauaitele.
Ole Aso Gafua ua mavae 5 o Setema na tatala aloaia ai lea auaunaga i Mount Albert, ma ua faaigoaina nei ole CAB Language Connect, ma sa auai nisi o sui mai atunuu eseese oloo aofia ai le latou gagana oloo faaaogāina faatasi ai male faipule ia Phil Goff.
O Aso Gafua o vaiaso taitasi o lea ua faatulagaina e lenei kamupani mo tatou tagata Samoa e mafai ai ona valaau atu e faatalatalanoa ni mataupu e fia maua ai le fesoasoani ile tatou lava gagana ile faletua ia Sera Tuitama, ae o isi aso ole vaiaso o lea ua faasoasoa i gagana mo isi atunuu.
Ma ose fiafiaga sili foi lea i o tatou tagata ona oloo mafai lava ona talanoa i lea auaunaga ile tatou lava gagana. O lenei kamupani sa igoa muamua ile Language Link ae ole aso muamua o Iulai na suia ai le igoa ile CAB Language Connect ona ole taumafai lea ia galulue faatasi gagana oloo mafai ona faaaogāina i aso ole vaiaso.
Ole faletua ia Sera Tuitama ua loa foi lana tautua i nisi o galuega i totonu o lenei atunuu o ia lea ole Samoa ua mafai ona galue ai i totonu ole CAB Language Connect e fesoasoani io tatou tagata pe a valaau atu. Ole a mafai foi ona maua se fesoasoani mo tagata e valaau atu ma iloa ai auala e tatau ona latou faia auā le faamalieina o latou manaoga.
