E 21 pasene le aofaiga atoa o le siitaga i le toe fetuunaiga o totogi o faiaoga a le Malo na amata maua i le amataga o lenei tausaga, e ala i le auauai ona totogi atu i le tai 7 pasene e maua i totonu o tausaga e tolu. O le tausaga faaletupe o sosoo ai nei o le a maua ai le isi fitu pasene, ma le tausaga mulimuli e maua ai le vaega faaiu.
O lea faaiuga a le Malo e togitogi le siitaga e le o nofo lelei i finagalo o le ta‘ita‘i ma le Itu Agai. Saunoa Palusalue i le fonotaga ma tusitala i le vaiaso ua mavae, ua amata faatino le siitaga i le tausaga nei e sosoo ma le tausaga fou e faia ai le palota tele a le atunuu.
O ni faiga faapolokiki a le HRPP o loo tu nei i le foe i le pulea o le Malo e pei ona faaalia e le ta‘ita‘i o le Itu Agai, ona o faatosina mo le isi palota o sosoo ai nei a le atunuu. O le isi itu na ta‘ua e le ta‘ita‘i sa tatau i le Malo ona maua atoa le 21 pasene ae aua le totogiina auauai ona o se fetuunaiga o totogi ua leva tausaga o nofo faatali i ai faiaoga.
“O nisi o faiaoga ua maliliu ma ua malolo litaea ae e lei maua lava, a o lea faatoā maua ae amata i le togitogi o le tai fitu pasene i totonu o le tolu tausaga”. O le feiloaiga a le Palemia ma nisi o tusitala i le taimi o le polokalame a le 2AP na fesiligia ai le ta‘ita‘i o le Malo.
O le finagalo na folasia e le Palemia, e vaivai tele manatu ma lagona ua faaalia e le Tautua Samoa poo le Itu Agai. “Afai ae totogi uma i le taimi e tasi le toe fetuunaiga o totogi o faiaoga ae lē o se siitaga e pei ona latou aumai, o lona uiga o le a faataatia uma isi atinae a le Malo e lē toe faia.
O le ala lena e faia ai i le totogi auauai ona e leai se Malo valea e faatino uma i se taimi e tasi se tulaga faapea, ona e fuafua mea uma i le tulaga tau tupe.”
“O a‘u ou ke ofo ia Palu (Palusalue Faapo II) sa saofai i le kapeneta sa faia ai mea ia, ae lē malamalama. Makua ou faagoagoa lava igi ka‘ika‘i faapea e lē loloko le kofa, se‘i vaai la i ikuaiga o ka‘ika‘i gei pe afai e o mai e pulea le Malo”. “O ā polokiki o fai i kokogi o faiaoga, o se fuafuaga ua leva ona tapena mai, ae o lea faatoa faatino”.
O le finagalo lea o le Palemia na ia fautuaina ai le Itu Agai ina ia sailiili muamua i ni mataupu ona faatoa aumai ai lea o so latou finagalo ina ia ‘anoa ma lololo i le faafofoga a le atunuu. O le mau a le Tautua Samoa e poo ā lava lagona faaalia o le Palemia e tali mai ai i ni mataupu latou te folasia mo le silafia e le atunuu, e lē tuua ai le latou galuega o le finau atu ina ia silafia e le Malo, e iai foi lo latou tiute faaitu agai e fesiligia ai ni faaiugafai a le Malo.
