O Iele, o se alii e te le iloa pe iai se mea e te ono ita ai i ai. E fiafia lava o ia i taimi uma, ma soo se taimi e te tau fetoi ai pe oo ane ni lagona le fiafia ia te oe, e mautinoa lava e toe faafouina ou faalogona ma e toe ata, i se tala fiafia ma ni upu faamalosiau a Iele ia te oe.
E te fiu foi e limu se isi tagata ia Iele ma faamatalatala uma i ai ni masei o lena tagata, e le taitai ona e lagona atu faapea, ua ‘au mai Iele ia te oe ma lagolago mai i sau taumuimui o fai atu.
Afai e fesili se tasi ia Iele poo a mai o ia, e tasi lava le tali e te faalogo soo ia Iele o fai, “Ana mafai ona ou faia, semanu ua iai so‘u uso masaga!” o le uiga o lana faamatalaga, ua ova lona fiafia ma le lelei o mea uma, e mafai ona faaluaina ai ma se isi tagata ia tutusa e pei o ia.
O Iele e galue o se supavaisa i se tasi o faleaiga i totonu o le aai, ma e matua mataina tele le auala e faatino ai ana galuega. E iai se mea uigaese ua matauina ai foi ma e mautinoa ona o le mataina o uiga o lenei alii.
Soo se faleaiga lava e galue ai Iele, e mautinoa le matua olaola o lena faleaiga, i le gasolo atu i ai o tagata e fia tausasami ai.
E le gata foi i lea, ae e faamavae loa Iele ma see atu i se isi faleaiga, e mautinoa lava e le umi ae amata foi ona faamavae ese nisi sa latou galulue faatasi, ae tau mulimuli atu i le faleaiga lea ua galue ai nei Iele.
Sa fesili se tasi alii suesue i se tamaitai sa aofia ai i le vaega lea o loo tautuaina tagata i faleaiga, poo le waitress, pe aisea lava ua latou tau mulimuli solo ai ia Iele.
Na tali le tamaitai lea, e tasi lava le mafuaaga, ona o uiga o lenei alii pule. Na faapea atu le tamaitai lea o Maria i le alii suesue: “E te iloa lau susuga, maimau pe ana faapea uma supavaisa, lona uiga e te le augata e galue, ma e te fiafia foi e usu mai le galuega i taeao uma.
O le ala lena o le matou fetaumulimuliai solo ia Iele, ona o ia lava o se faaola totoga ma se faafiafia loto i aso uma o a matou galuega.”
“Afai e iai se isi o le au faigaluega e usu mai se aso o loo sau ma sona faafitauli mai le aiga, pe te’i foi ua iai se mea e faaletonu ai ma se isi tagata i totonu lava o le galuega, e mautinoa lava e le umi ae toe sologa mālie mea uma, aua e tu loa Iele i ou autafa, lona uiga ua avatu ia te oe upu e sili ona faalaeiau ma e lagona ai le tagata o loo fia fesoasoani moni ia te oe.
O se supavaisa e le faaituau, e tutusa ia te ia matou uma lava, tusa lava poo le a le tele poo le itiiti o ni mea na e faataunuu i lena aso i le galuega.”
