Albert Tupuola ma Alofa Tagaloa, oloo autu iai le ata tifaga ole MATAI

Albert Tupuola ma Alofa Tagaloa, oloo autu iai le ata tifaga ole MATAI

Ua mae‘a nei ona pueina ma tuufaatasia le Vaega 6 ole ata tifaga ole Matai. Ose ata tifaga oloo faatalitali iai le maimoaga ale atunuu, e le gata i Niu Sila nei, ae o Samoa ma atunuu i fafo.

Ole 2012 na amata pueina ai le Matai, ose tala ile alii talavou o Lui oloo faatinoina e Albert Tupuola, na faaee iai e lona aiga le suafa Safuiane, ole suafa Sa‘o ole afioaga o Falesoa. E ui ina faatamaoaigaina Safuiane Lui ele Atua, ile tomai e tausi ai lona nuu ma lona aiga, peitai, e iai vailiu o lona olaga oloo fesoua‘ina ona o lona alofa faavalea ile tamaitai o Oketi oloo faatinoina e Alofa Tagaloa, ole alo ole faafeagaiga ia Ieremia oloo faatinoina e Tagaloa Fiafia Manase.

Ole Vaega 5 ole Matai, na ioe ai Oketi i lona tamā faifeau o Ieremia, ole a faaipoipo ile alii Aoao o Ulisese oloo faatinoina e Lorenzo Kaisara. Ole ioega a Oketi ina ia faamalie ai le loto o lona tamā, ae ole fatu ma le mafaufau o Oketi e le faaluaina Safuiane Lui. E lei faigofie ia Lui ona ia talia le mea ua tulai mai, ina ua faailoa iai e Oketi, ua ioe e faaipoipo ia Ulisese.

Na sola faasulusulu Safuiane Lui i Samoa, se‘i tau fofo ai manu‘a o lona loto. E moni lava e tiga ma matuitui le alofa. E tasi le faaiuga a Safuiane Lui ole a tafi ese Oketi mai lona mafaufau seia oo ile faavavau. E pau lea ole auala e mafai ai ona agai i luma lona olaga.

E le o iloa e Safuiane le faigata oloo feagai ma Oketi, ua uma ona ave lana upu i lona tamā, ae o lona loto e mamao ma le manao e faaipoipo ia Ulisese. Ose olaga faigata ua feagai ma Oketi, ua avea ma mafuaaga ua suia atoa ai lona tagata, mai se tamaitai filemu ma le tauagafau ua suia ise tamaitai, taliupu ma le lotomalosi.

E le na o Oketi foi oloo mafatia, oloo faapea foi ona fememeai le alii A‘oa‘o o Ulisese, auā ua ia mautinoa lelei, e fai toa‘i le faaipoipoga pe a taunuu, ae leai se alofa o Oketi mo ia. Ae pagā lea, ua maoaluma. Ua mae‘a foi ona faamuta le la faigauo ma le tamaitai lalelei o Fetuleni oloo faatinoina e Siva Palota. Peitai, o uiga o Oketi oloo ia vaaia, e tasi le tali e sili pe a tuu. Ae faafefea ona toe faafoi mai le faigauoga ma Fetuleni ua masofa? Na iu ina sola Oketi i Samoa se‘i oo lava ia Safuiane, e iai lona manao e fia ta‘u atu ia Safuiane. Ole ā le manao o Oketi, ae faamata na talia e Safuiane le manao o Oketi? Ae faafefea le la faaipoipoga lea ua tapena ma Ulisese?

E tele ni lesona aogā oloo molimoli mai ele Matai 6, aemaise mafatiaga o fanau pe a faumalo le manao o mātua i faaiuga tupito ile olaga o fanau. Ole Aso Tofi ole vaiaso nei  15.06.17, lea ua faamoemoe e amata faatau atu ai i tua le Matai Part 6 mai le Samoan Movies i Otahuhu, ae ole Aso Faraile 16.06.17 ole a maua ai ile tele o isi faleoloa i totonu o Aukilani, ua iai le faamoemoe ole Aso Faraile ole a maua ai foi i Ueligitone ma Kalaiesetete, ae ole Aso Toonai e oo atu ai le tatou ata i faleoloa masani i totonu o Ausetalia.

O Amerika ole a maua ile isi lua vaiaso o lumanai. Mo nisi faamatalaga faamolemole faafesootai mai le Samoan Movie Center 09-2764417, poo le Mobile 0272764417

Comments

comments