Ole fanua ma lona tapuafanua, ole tagata ma lona faasinomaga. A lē iloa ele tagata lona tupuaga, e faaleiloga lana folauga, ua lē ese ma le vaa e folau ile vasa e leai se tapasa. Ole toatele o aiga ua leva ona tuua Samoa ae malaga ma nonofo i atunuu i fafo, e tutupu a‘e fanau i atunuu oloo aumau ai, e lē malamalama ile tupuaga ma le faasinomaga.
Ole mafuaaga foi lea e sa‘i ai fanau na ola a‘e i Niu Sila pe a fai soo faalavelave faa-Samoa, auā foi e lē o malamalama ile tāua ole soifuaga sa ola a‘e ai mātua i Samoa. O nisi nei o mafuaaga e afua ai ona potopoto aiga i mafutaga e pei o reunion, e lē gata ina ia faamasani ma faafealofani ai fanau, ae ose avanoa lelei e totō ai i loto o fanau, le tāua o mea nei o aiga, ma le mafuaaga e sasaa ai le ola ole Samoa e tautua lona aiga.
Ole Aso Lua, 3 Ianuari 2017 na potopoto ai suli o Maiava Toso Ulberg ile Ngati Papakura Marae, mo le faatasiga ale latou aiga, ose faamoemoe ua lua tausaga o tapena ma faufau seia oo ina faamautuina.
Sa malaga mai ai feoi o Maiava Toso Ulberg mai itu e fia o Niu Sila faapea atunuu i fafo e auai i lenei faamoemoe tāua. E leai se isi ole augatupulaga muamua a Maiava Toso Ulberg o toe soifua mai, ae o lana augatupulaga lona lua, lea na auai ile reunion faatasi ai ma le augatupulaga tolu ma le augatupulaga lona fā.
O Gaui ole afafine matua o Maiava Toso Ulberg lea sa auai ona suli faapea suli o Pa‘u Maiava, ole atalii laititi lea o Maiava Toso Ulberg, e ui lava ina e lei potopoto mai fanau uma a Maiava Toso Ulberg, ae e silia ile selau tagata sa auai ile reunion, o ē na tutupu mai ia Gaui ma Pa‘u.
E lagona ile toto le mafanafana o mea nei o aiga, auā e ui ole taimi muamua lea faato‘a fevaaia‘i ai le toatele ole aiga aemaise lava ile fanau, peitai, na pei lava o tagata na ola faatasi ile fale e tasi. Na vaaia le fiafia ma le talisapaia ele tasi ole isi.
Ole aso muamua ole faatasiga sa faalauiloa ai aiga taitasi sa auai, na faaiu le polokalame ole aso muamua ile taimi paganoa e talatalanoa ma faamasani atili fanau. Ole aso lona lua sa fai ai taaloga na vaevae ai le aiga atoa i ‘au e ono ae tausinio i taaloga sa tapenaina ele Komiti.
Ole po ole Aso Lulu sa potopoto uma ile movie night poo le matamataga o ata tifaga. Ole Aso Tofi ole tafaoga ale aiga atoa i Parakai Pool, ae ole Aso Faraile na faamatala ai le gafa ole aiga, ina ia malamalama fanau i sootaga ma le tupuaga. Ole faamatalaina foi ole gafa na iloa ai le toatele ma le lauolaola ole aiga ua iai.
Ole po ole Aso Faraile na alo ai loa i faafiafiaga a aiga taitasi, faapea le siva e faamae‘a ai le faamoemoe, lea na foi na toe fetaui ai foi ‘au taitasi ile tauvaga siva i lea po, o aga ole fiafia ma mafutaga faaleuso faaletuafafine.
Ole mea moni ua faigata ona tatatala le mafutaga ua mafanafana, ua masani fanau ua malamalama le tasi ile isi, ua mafanafana foi le alofa faaleaiga, o mafutaga e lē laumaua o mafutaga e faagalo gata, o mafutaga e tatala gata.
E ui i lea, e iai le laolao ole alii e faasino mai foi le taimi e tatau ma onomea e toe potopoto ai le aiga ile isi Reunion, ina ia sosoo le fau ma le fau ma ia tumau le ola fealofani o fanau, ma ia iloa le faasinomaga ma le tupuaga.
Ole amataga ole vaiaso nei na amata ai ona toe foi i atunuu i fafo i latou sa malaga mai ona ole faamoemoe ole aiga e pei ona iai. E ui lava ina ua tofafa mai tiasa tuaa, ae lē fesiligia le patilima mai le lagi ile fiafia ma faataupupula mai ile matagofie ole ola fealofani ole fanau.
