Toe faatalofa atu i le paia ma le mamalu o le au faitau. Talitonu o loo manuia i le agalelei o lo tatou Alii o Iesu Keriso, e ui ina lutia pea i futia o le soifuaga nei, ae lē mafai ona aveesea ai tatou mai le alofa silisili ese o lo tatou alii faaola.
O le mafuie na luluina ai le aai o Kalaiesetete ma maliliu ai tagata e toatele, faaleagaina fale, auala ma le tele o meatotino, o se tala faanoanoa toe faamomoi loto.
E lē gata i lea, o le tele o isi tala e matautia lona aafiaga, e pei ona iai le faapapaina o vaalele e tagata faatupu faalavelave i le aso 11 o Setema 2001, lea ua matuā suia ai le taaviliga o le lalolagi mai lona saogalemu sa masani ai i tausaga e tele ua tuanai.
Ae lē faitaulia le mau vevesi o loo tulai mai i isi itu o le lalolagi, a tatou manatunatu i ai e maofa, pe faapefea ona tutupu nei mea tiga. Ae pe faapefea foi ona faataunuu e tagata soifua ni sauaga matuia i isi uso a tagata.
O nei mea uma, e tatau ona fafagu ai ni lagona ma taulai i ai manatu o soo se tagata soifua, ma maitauina ni mea e lē mafai e se tagata soifua ona alo ese mai ai.
Muamua, o le olaga lenei tatou te iai, e puupuu, ma‘ale‘ale ma saasaa. Fai mai le Iakopo 4:14 “a e le iloa e outou se mea e tupu a taeao. Aua pe se a lo outou ola? O le puao lava lea, ua aliali mai i se itu aso itiiti, ona mou ai lea.”
O le aai o Kalaiesetete, sa fausia i le poto ma le malosi faaonaponei. Sa alafai tagata i o latou tiute masani, ma le leai o se manatu, o le aso lea e oo mai ai puapuaga.
E lei tofafā ma fai ni faalepo, o le aso lea e maliliu ai. E lei ala usu foi ma faatofa i aiga ma se manatu, e lē toe foi mai pe toe fevaaia‘i. Peitai, sa faafuasei ona oo mai le mafuie ma lepeti mea sa faamoemoe i ai, ma segia le ola o le mea e aputiputi e le tagata soifua.
Afai la o le olaga e puupuu ma saasaa, o ā la ni fesili e tatau ona tatou fesili ai i taimi faapenei?
• E tatau ona e fesili ifo, po ua e sauni e te oti. Tulou. Le atunuu e Samoa, e lē se faamata‘u lenei mataupu, o se fafagu. Afai ae oo faafuasei mai le oti, ua e sauni ea? Ua faatulaga lelei le fanau e ola i se soifuaga manuia, tusa lava po ua e leai? Ia mautinoa, o le olaga lenei, matou te ola ma outou soifua, ina ia tatou feoti. Ae poo le ā le taimi ma le ituaso, pe faafuaseia pe leai, poo le pulapula-la-goto foi o le soifua poo talavou foi, a oo mai le oti, e tatau ona sauni.
• O le isi fesili e tāua tele, poo tatou ola faalagolago moni i le Atua? O le tala a le aposetolo o Iakopo 4:15 “ … A finagalo iai le Alii …” O se tasi o vaivaiga faaletagata, o le lē amanainaina o le Atua i ana polokalame ma lana faatatau. Ae e tatau ona tatou manatunatu e saunia mea uma ma tatou faalagolago i le Atua e faasino mai, poo lona finagalo lea pe leai foi. Ae a oo loa ina feto‘ai ma faafitauli, ona faato‘ā apaapa lea i le Atua. E moni ai muagagana a le atunuu; mu loa le lima tapa i le i‘ofi. E tatau ona lolo o tatou manatu i le Atua ma lona finagalo.
O le manatu lona lua, ia mautinoa, o le Atua o loo faamoemoe i ai. (Salamo 46:1-3 “O le Atua o lo tatou malu ia ma lo tatou malosi, e fai o ia ma fesoasoani silisili i puapuaga. O le mea lea tatou te le fefefe ai, pe a faaliliuina le lalolagi, ma luluina mauga i totonu o le sami; pe a taalili ma sousou ona suasami, ma gatete ai mauga i lona maualuluga.”)
O loo aumai i nei fuaiupu se a‘oa‘oga, ina ia lē fefe, ae ia faamoemoe i le Atua i taimi faigata. Auā a oo ina luluti mai faigata, e faigofie ona manatunatu faapea; “Pe iai ea se Atua? Ae afai e iai se Atua, aisea ua tutupu ai pea nei faalavelave? Afai e alofa le Atua, o le ā ea le mea na te lē taofia ai nei mau puapuaga?” Ma le tele lava o nisi fesili e fetuleni mai i mafaufau.
Le au uso, o loo ta‘u mai e le Tusi Paia e moni o loo soifua le Atua. O mea foi e tutupu i le soifuaga lenei, o ni faailoilo mo tagata soifua uma ina ia o latou iloa, e tatou te manaomia le Atua.
Aua ne‘i galo, o le Atua foi na ui i ni puapuaga mamafatu. Ina ua liutino tagata le Lokou e ala mai ia Iesu, sa inosia ma tuulafoaia. Sa tauemuina e oo lava i ona aiga sa manatu i nisi o taimi o Iesu ua faaletonu le mafaufau. Sa fia inu ma fia taumafa.
Sa oo lava ina maliu i se tulaga sili ona maualalo ma le lē taualoa. Sa faanoi le mea e teu ai lona tino maliu, ae sosola lona ausoo sa latou mafuta i aso e tele.
A o ona puapuaga ua taitaiina ai i tatou i le manuia. O ona faalavalava ua mālōlō ai i tatou e pei ona ta‘u mai e le perofeta o Isaia. E lē gata i le soifuaga lenei, ae o le faamoemoe atu i le ola atalī. O lo ta faaolataga, na maua i totonu o ona puapuaga.
O le mea ia mautinoa, ola ae sauni e oti. E lē gata i lea, ia ola faamoemoe i le Atua.
Soifua.
