O leaga ma lelei o Kevin Barry ma le lumanai o Parker

Kevin Bary
Kevin Bary

I taumafaiga a alo ole atunuu i fusi maualuluga ole Paga Mamafa ale lalolagi, e tasi le tagata ua iai ile ogatotonu o talafaasolopito o ia taumafaiga o Kevin Barry Jr.

Ua leai se tasi e lei lafo manatu ile agavaa o Barry e tauaveina le lumanai o Lupesoliai Laauli Joseph Parker mo se isi laasaga o lona taumafai i fusuaga faapolofesa, aemaise le tumutumuga ole paga mamafa ale lalolagi.

Ua uma foi ona faailoa le manao o Barry e faaauau pea le la faiga paaga ma Parker mo fusuaga e oloo lumanai nei. E talitonu Barry e lei mae’a lana galuega mo Parker e ala lea ile toe faafoi mai ole fusi ole lalolagi ia Laauli.

Peitai, ua leva ona tuufesili le toatele ile talafeagai ai ole avea o Barry ma faiaoga a Parker. O nei fesili e lē fou, ae ua leva ona fesiligia le agavaa ole alii faiaoga e faaauau ai le la faiga paaga ma Parker.

Na amata mai ile faaletonu na oo ia Toaletai David Tua. O ā lelei o Kevin Barry i lana galuega na mafai ai ona oo Tua ile fusi ole lalolagi, peitai, na lapelapea foi i faaletonu na tulai mai i mea tau tupe.

Taatia ese la le fesiligia o Barry i faaletonu tau tupe na aafia ai Tua. E lē ole agaga foi lea o lenei tusitusiga, peitai, ole itu oloo agai iai le manatu, ole agavaa lea o Kevin Barry na te a’oina ma faasauni Parker ise tulaga maualuga atu, nai lo le tulaga o iai nei, ina ia mafai ona ia toe maua mai fusi ole lalolagi sa ia umia.

Ile fusuaga a David Tua ma Lennox Lewis ose mea fua ia Lennox Lewis ona taofiofi osofaiga a Tua i totonu ole maea. Tusa poo le eseese o maualuluga o  Lewis ma Tua, ae e uma le fusuaga lea e lei pai Tua i foliga o Lennox Lewis.

Ile fusuaga a Parker ma Anthony Joshua, na tau sa’o Parker e faafetoai Anthony Joshua ae uma ane le 12 o taamilosaga e lei vaaia se afaina o Joshua ile fusuaga atoa. Ole isi tulaga e tutusa ai fusuaga ia e lua ole faatulagaina o sikoa a faamasino. Ile fusuaga a Parker ma Joshua e 119-109, 118-110, 118-110 mo le Malo le Fesiligia (Unanimous Decision) mo Anthony Joshua.

E tai tutusa pepa sikoa a Parker ma Tua vs Lennox Lewis – 117-111, 119-109, 118-110. E matuā mamao le malo a Lewis e pei ole manumalo a Anthony Joshua ia Joseph Parker.

E ta’u mai ai iina e leai se suiga tele ua aumaia e Barry i totonu ole fusu a Parker na maua mai ile fusuaga a Tua ma Lewis. O mea tuai lava, leai ma se mea fou.

E tuu fesili ai la, pe afai e koleni pea e Kevin Barry ia Parker ile lumanai, o ā ni suiga fou ole a iai le fusu a Parker e toe maua mai ia Kevin Barry? Auā, e na’o le pau lea ole tulaga oloo manaomia o aupega fou mo Parker e fusu ai ma siamupini e iai Anthony Joshua ma Deontay Wilder le siamupini a le WBC.

Na fesiligia Kevin Barry poo ā lesona mai le fusuaga lea a Tua ma Lewis na ia maua mai mo le fusuaga a Joshua ma Parker.

O lana tali mai ole taumafai lea ia maua le fiafia a’o faagasolo tapenaga ma le fusuaga, ae uma ane, ole faaiuga lava e tasi ile tai tutusa ole sikoa a Parker ma le sikoa a Tua i lana fusuaga ma Lennox Lewis.

E fesiligia foi le Team Barry, o Kevin Barry, Tay Barry (atalii o Kevin) ma Bryan Barry (le uso o Kevin), e ao ona fesiligia e Parker nei tulaga uma pe a manao e maua e ia ni faiga fou mo le lumanai.  Ae e iai foi tulaga lelei o Barry oloo fiafia iai Parker ma lona aiga. Ole vaaia lelei o Parker pe a koleni i Las Vegas. Ole aiga o Barry ua pei lava foi ose aiga lona lua mo Parker, e mafana lelei le mafutaga a aiga e lua, Parker ma Barry. O lenei sootaga lelei ile va o aiga e lua, ole a faigata ai ia Parker ona momotu le mafutaga mafana ua iai ma Barry.

Ole isi itu lelei, e faamoemoeina tele Barry ele Duco Events mo le vaaia o Joseph Parker. Ae o lena Mafutaga ma Duco Events. E iai le taimi e faamuta ai foi le mafutaga a Parker ma le Duco Events, e leai se isi o iloa poo afea, auā na’o Parker ma lona aiga, oloo iai le tali atoa o lea fesili. Afai e tumau pea Parker i lalo ole vaaiga a Kevin Barry o lona uiga ole a taumafai o ia e toe maua mai nisi lelei ma metotia fou e toe siitia ai le taumafai o Laauli, afai e leai ua muta le silafia o Barry, ole faaiuga sa’o mo Parker ole saili se isi ana faiaoga. Ae mo le taimi nei, oloo iai pea le faanaunauga o Kevin Barry e galulue ma Parker.