Sa ou oti ae ua ou toe ola
E matautia vavega a le Atua na toe faatuina ai mai ile oti, se tamā matua ua 81 tausaga o lona soifua e suafa ia Lemafua Sema AhYou, ina ua tupu ai se faalavelave i totonu o le malumalu o lana Ekalesia i Manurewa ile masina o Ianuari o le tausaga nei. O le koneferenisi aoao ale ekalesia sa usuia mai i laufanua o Aukilani, na aofia ai susuga i faafeagaiga ma faletua ma taitai o ekalesia eseese mai Ausetalia, Samoa ma Niu Sila.
Ise faatalanoaga ma le tamā ia Lemafua sa ia faamatala ai, le faatumulia o lona loto ile olioli ma le fiafia i lana faalogologo ile upu folafola, aemaise le mafutaga faatasi ma le Auuso. O se vaega o le polokalame na tatalaina ai le avanoa e fai ai aitema poo se taleni foi a soo se tasi.
Na ta‘ua e Lemafua na ia tulai ile taimi lea ma faatino loa lana aitema, o le siva faitaga ma faasoa foi lana molimau. Na ta‘ua e Lemafua lona fiafia tele, ma ua faasasau ai foi ona uiga mālie. Na mae‘a lana aitema, ona agai mai lea ma saofai ile laina nofoa sa nofo ai le faletua ia Lili‘a Sagala, o le peresitene ole mafutaga a tagata matutua o le ekalesia. Na ta‘ua e le faletua ia Lili‘a, na ia faalogoina le pa‘ū o le tagata, peitai, sa lē ano lava iai, o lona manatu ai ose tamaitiiti lea e pa‘ū, auā o lea faatoa mae‘a mai aitema a tamaiti. Na ia ta‘ua e lei ano ane lava iai sa faasaga pea i luma ile mea o faasolo mai ai le polokalame.
O le laga‘i a tagata na liliu atu ai, ma na faateia o ia ina ua vaai atu o Lemafua oloo taatia mai, o tagata sa i tua o le toeaina ma muamua oo atu iai. Ua amata foi ona mumu ane ma le toatele ile mea o taatia ai Lemafua.
Na ta‘ua e Lili‘a e lei mafai ona oo mai ile mea o taatia atu ai Lemafua, ae na ia tauvalaau e vili le ambulance. Na saunoa foi Lili‘a, a leai sona mafaufau ose tulaga faapea o le a oo iai Lemafua, meaane o lea faato‘a mae‘a mai lana aitema mālie.
“Ua lē toe ano se tagata ile polokalame oloo faagasolo, ae ua taufai laulaututu ua meia. O taimi o faalavelave faapenei, e lē mautonu ai le tagata, o uiga foi nei na vaaia, a‘o taumafai e vau ma lomi le toeaina ma tauvalaau le igoa Lemafua, Lemafua, ae ua leai lava se tali mai a le toeaina.”
“Na lagona le popole, ua segia foi le mauli, o isi ua na o le laulaututu ma sioa, ae o isi ua tootutuli ma tatalo ile Atua, e anau lana faamalologa mo le tamā. Ua vaaia le loimata maligi i nisi. O faafeagaiga ma faletua, ua latou tutu filemu ma tatalo ile Atua, ina ia faaalia lona mana.”
O le tina ia Jeanie Hansell, sa tofia na te vaaia faalavelave e tutupu faafuasei ile taimi o le Koneferenisi. Na ta‘ua e Jeanie i lana molimau, o ia sa i fafo o le falesa ile taimi tonu na tupu ai le faalavelave. O tagata sa i totonu na tauvalaau atu ia te ia ma ta‘u atu le mea ua tupu ia Lemafua.
Ina ua oo mai i totonu na ia vaaia ai le tumutumu o tagata ile vaega tonu oloo taoto ai Lemafua, na ia taumafai e faaofiofi mai i tagata i lona fia oo mai ia Lemafua. “Ua vaaia foliga o le oti, ua leai se mānava, ua leai se faailoa mai o tata le fatu, ua fiu foi e tauvalaau ua lē tali mai le toeaina,” o le tala lea a Jeanie. “Ua laue tagata, auā e foliga lava ua maliu le toeaina”.
“O le taimi lea ua na o le nofo filemu o le tina ia Salu o le faletua lea o Lemafua, ua omai lana fanau taitai ese atu mai totonu o le falesa, e tau faato‘ato‘a le loto mafatia o le tina”.
O le tina ia Jeanie, e iai lona tomai i galuega laveai poo le fesoasoani muamua. E lei toe maimauina se taimi ae na faataunuu loa le CPR, ma taumafai e pamu le fatafata o le toeaina. Na ia talosaga atu ile faletua o le faafeagaiga mai Brisbane ina ia fesoasoani mai e fai toalua le la galuega.
O le molimau ase tasi o taitai sa auai, o le taimi lena, o le toatele o tagata ua tau fai alalaga, ua feei ua fetagisi, o nisi ua leo tetele malosi ile tatalo faatauanau, ua tootutuli ua aioi atu ile Atua i lana faamalologa, ua valaau atu ma ta‘uta‘u atu le suafa manumalo o Iesu Keriso. Ae o nisi ua na o le tutu sioa, ua faaali foliga o le popole ua pei ua leai se faamoemoe.
Na faamatala e Jeanie, e tusa pe 10 minute o latou taumafai togafitiga faaola ile toeaina, ae taunuu atu loa le vaega a le fuimu ma le St Johns Ambulance, ma faaaogā loa latou masini e faate‘i ai le fatu, ae pagā lea ua lē vaaia lava se foliga o le ola, e lē o mautinoa foi poo mānava pe leai.
E oo foi i masini na faapipii i lona tino, na vaaia le sasa‘o o laina ile masini, o le faailoga lea e iloa ai, e lē o mafai e masini ona piki se tata o le fatu. E ui lava i lea, e lei malolo le tatalo ma le siigama‘i ile Atua.
E lei faavaivai foi le ‘aulaveai ile faatinoga o le latou galuega, e ui lava ina umi se taimi o taumafai, ae maeu le tali mai o le Atua, ina ua toe vaaia le mānavanava o lona fatafata, ole faailoga e iloa ai ua toe foi mai le ola. Ua tau fai alalaga leotele tagata ile fiafia, e pei ua sikoa le Manu Samoa, ina ua vaaia ua toe mānava le toeaina.
E ui oloo vaaia pea le tuga o le tulaga oloo iai Lemafua, ae o le agaga faafetai ile Atua ua tali mai i talosaga, ua faia le vavega, viia le Atua ua toe faaola mai Lemafua. Ina ua mae‘a tapenaga a le ‘au laveai, na faapea ai loa ona faatopetope le auina atu o le tamā ile maota gasegase i Middlemore mo togafitiga.
Ile molimau ale afafine o le toeaina o Lea Key, na ia ta‘ua ai, o le taimi na taunuu ai ile falemai, sa vave ona faatino togafitiga a alii ma tamaitai fomai. Peitai, e ui lava o lea ua vaaia ua mānava lona tamā, ae oloo ia mautinoa oloo lamatia pea le ola o si ona tamā.
Na ta‘ua foi e Lea e faapea, o le lipoti a fomai na ta‘ua ai e tusa ma le fā minute na nofo ai le fatu o lona tamā, o lona uiga e fā minute na oti ai le toeaina. Na ia ta‘ua foi na faafetaia e fomai galuega laveai, na mafai ai ona toe te‘i mai le fatu o le toeaina, faatasi ai ma le faagaau na pamu atu ai le okesene i ona māmā e manava ai.
E ui lava ile tomai o alii ma tamaitai fomai, ae talitonu Lemafua o le mana o talosaga na afua ai le vavega mo ia. E tele siaki na faia e fomai, sa fai foi le faaata o lona faiai, o le popolega tele sa tulai mai, ona o lea ua faamaonia e fā minute o oti le toeaina, o lona uiga e leai se okesene na sao i lona faiai i lea taimi atoa. E tele se aafiaga o lona mafaufau e ono alia‘e mai. O le talitonuga o fomai, afai e toe maua le malosi o Lemafua, e ono aafia o ia ile gasegase o le stroke.
O le tina ia Salu, o le faletua lea o Lemafua, na ia ta‘ua ina ua fesiligia e le Samoa Times. E tolu lelei aso e lē ala mai le toeaina. O nei aso e tolu, sa auauai atu le latou ekalesia, aemaise o si ana fanau ile falemai, sa o latou nonofo i fafo o le potu ma momoli ai a latou talosaga ile Atua mo lana faamalologa.
E leai se isi o latou e mafai ona alu i totonu o le potu sa taoto ai le toeaina, auā e faasā, ona o le potu oloo iai le toeaina, o le potu faatalitali mo tagata o le a maliliu. O nisi taimi e omai isi ile fale e malolo, ae sui atu isi e faaauau taloasaga, ma tapuaia taotoga tiga o le tamā ia Lemafua.
Na ta‘ua foi o totonu o aso nei e tolu, na faapotopoto ai e le tina ia Salu si ana fanau ma o latou talanoa, ise tapenaga, mo toe sauniga o le toeaina, e peiseai, ua tapena le mafaufau o le tina ia Salu ma nai ona alo, e talia soo se tali e ono tulai mai ile gasegase o le tamā.
O le aso lona tolu ile ta o le tasi ile aoauli na alu ane ai le feau a le fomai e alu atu se isi o le aiga i totonu o le potu, o le a taumafai e faate‘i le toeaina pe te‘i i luga.
Sa alu le isi ona atalii i totonu ae nonofo le toatele i fafo ma fai talosaga ile Atua, o le mea moni o le iuga lea ua oo mai, auā afai e faate‘i atu le toeaina ae lē ala mai, o lona uiga, ua maliu lava, ae afai e faate‘i atu le toeaina ae ala mai, o lona uiga ua amata ona foi mai lona malosi.
E lei umi, ae vaaia le alii fomai ua savali mai i fafo ma le potu, ma agai mai ma faapea mai ia i latou, “Ua ala le toeaina.” Na ta‘ua e le tina le agaga vivii ma le faafetai ile Atua, ua ia tali mai ile tatalo faatauanau. O le taimi foi lea na faatoa mafai ai ona o latou o uma i totonu o le potu e vaai le toeaina, e ui lava e lei malamalama lelei o ia, ae o le itu e sili ona tāua, ua toe ala mai, e lagona ai le agaga faafetai ile Atua.
Na ta‘ua e Lemafua, na asiasi atu le susuga ile Faafeagaiga ia Lui Ponifasio ia te ia ile falemai, ma fesiligia o ia poo ā ni ona faalogona sa iai i taimi o taufao le vai ma le magalo.
O le tali a Lemafua, e pule lava Iesu i lo‘u ola.” O le tali a Lemafua e ogatasi ma le mau a fomai, e pei ona faaalia e le tina ia Salu. O le talitonuga o fomai, o se vavega le mea lenei, e faigata ona talitonuina le toe ola mai o le toeaina, pe a fua i lona matua ua 80 tausaga, faatasi ai ma le tulaga matautia na oo iai, e fā minute na nofo ai lona fatu, peitai, o lea ua toe ala mai ma e leai ni aafiaga tuga o maua ai.
Atonu o le tomai o le tagata e muta e pei ona maofa ai fomai i lenei mea na tupu, peitai, e pule le Atua ile ola e pei ona toe faafoi mai le ola ia Lemafua.
O le tautinoga a Lemafua ile taimi na taoto ai ile falemai, na fai ai lana miti o le feau na ave e le Atua ia Esekia e sauni e fai sana mavaega i lona aiga auā o le a maliu. Ona liliu lea o Esekia ona fofoga ile pa o le fale ua tatalo atu ia Ieova ma aioi atu ile Atua, ona toe foai ai lea e le Atua o isi tausaga e sefululima ile soifua o Esekia. O Lemafua e mai le afioaga o Malie, o le masina o Me na atoa iai le 81 o ona tausaga. Oloo tumau pea lona malosi, oloo faatino uma foi ona tiute e pei ona masani ai i totonu o lona aiga, aemaise lana koko Samoa oloo faatau atu ile mamalu o le atunuu. E leai ma se aafiaga o vaaia ia Lemafua ona o le mea na tupu ia te ia.
“O a‘u o se tagata faatuatua ile Atua, oute fiafia e galue mo le Alii i totonu o le Ekalesia, oloo avea foi a‘u ma sui o le aulotu e asiasi i aiga lotu i aso o le vaiaso, oute auai i mafutaga a tagata matutua, aemaise o la‘u tatalo lagolago ile galuega a le Atua”.
Na ia ta‘ua foi lona agaga faafetai ile Atua, ma le vavega ofoofogia ua ia faia mo ia. Auā sa oti ae ua toe ola mai.
