E $1 miliona tala se foai tupe na tuuina atu e le kamupani o le Grey Investment agai i le Iuni Lakapi a Samoa i le faaiuga o le vaiaso na tea nei e lagolago ai i taumafaiga a le Iuni Lakapi aemaise o le faatupeina lea o tapenaga a le Manu Samoa 15 mo le tau sailia ai lea o sona avanoa i le taamilosaga o le ipu a le lalolagi i le tausaga fou i Iapani.
O se sauniga puupuu na faia ai i le ofisa o le Alii Palemia i le taeao o le Aso Toonai na tea nei, na saunoa faafetai ai le Alii Palemia, o le taitaifono foi o le Iuni Lakapi a le atunuu le susuga Tuilaepa Sailele Malielegaoi i le sao o lenei aiga i le lakapi a Samoa, o le kamupani lenei o le Grey Investment ua tele sona sao i le lakapi a Samoa a’o soifua ai le Afioga ia Laauli Alan Grey.
Ta’ua e le Alii Palemia, e lei silafia uma e le toatele o le atunuu le sao o le aiga lenei o Allan Grey i le taumafaiga mai o le lakapi a’o tau sailia ai ni tupe i le tuanai, lea lava ua oo mai i lenei taimi ua faiilagi le folauga a Laauli Alan Grey, a’o lenei ua faaauau ai e le tina ia Marina Grey ma nai ona alo.
Saunoa le Alii Palemia, e iai lona talitonuga ua taunuu mai i le Iuni Lakapi le seleni e $1 miliona tala ae o le a mulimuli mai le isi vaega o lea fesoasoani.
O le tina ia Marina Grey na saunoa e fai ma sui o ona alo e faafetaia ai le Iuni Lakapi a Samoa ona o le maua ai o se avanoa e mafai ona faaauau ai pea le fesoasoani e pei ona amata mai ai e Laauli Alan Grey, na faamatala foi e Marina le taimi na tau amata mai ai le lakapi a Samoa isi ona tamai ofisa na iai, ma e na’o le toafa lava le aufaigaluega, o le susuga ia Pili Opo, Uaea Apelu, Joe Annandale ae taitaifono ai Laauli Alan Grey, o le uluai taimi na malaga ai le Manu Samoa, sa tau fonofono ai vaega ua masaesae o le togiga a tama taaalo.
Feiloai muamua le Manu Samoa ma Uelese ae tuufesili le toatele o tagata o le lalolagi poo fea e tu ai Samoa aua e leai ma se tasi nate silafia, ae ina ua manumalo le Manu Samoa ia Uelese, o iina na faatoa iloa ai e le lalolagi le atunuu lenei o Samoa. Taua e Marina, a’o mativa le Iuni Lakapi e leai se tupe i lena vaitaimi, o Alan Grey lava sa fesoasoani malosi e lagolago ma faatupe ai le ‘au a le atunuu, ma e oo mai lava i le taimi na maliu ai, o le upu lava lea a Alan Grey ia te ia ma lana fanau, ia alolofa i le lakapi a Samoa. Na faafetaia foi e le tina ia Marina si ona alo ia Lupesina Fred Grey lea ua avea nei ma faatonusili o le Grey Investment ona o lona loto ma lona taliaina o sana tuualalo na ave iai, fai mai Marina, o lana tala ia Fred, afai e alofa i lona tama, e tatau foi ona e alofa i le lakapi a Samoa ona o le fatu lea o le toeaina, lea na ioe ai Fred Grey ina ia faaauau pea lea fesoasoani.
Na toe faafetaia foi e Marina le sao o le Alii Palemia i le taumafaiga o le la pisinisi i le tele o tausaga ua alu aemaise lava o le lagolago a le Malo o Samoa. Na tauaao ai e le taitai o le atunuu se ofu jersey Manu Samoa agai le tina ia Marina Gey, ae o le ipu o le taamilosaga o le Super 9 a le Iuni Lakapi na tauaao atu e Marina agai le taitaifono o le Iuni Lakapi a Samoa e pei ona faaigoa ai lea ipu o le Alan Grey Super 9 Trophy. E pei ona silafia o le Jersey o le Manu Samoa o lo o faaogaina ai i le taimi lenei, o lo o lomia ai i le pito i luma le igoa o le kamupani a Marina ma ona alo, o le GREY INVESTMENT.
E iai le talitonuga o le tataou nusipepa e $1 miliona tala na faailoa ane i se tusi mai i le Grey Investment i le lua vaiaso talu ai peitai o se faamatalaga na maua mai i se sui o le Iuni Lakapi e sili atu ma le miliona le tupe o lea faiga paaaga a le Grey Investment ma le Iuni Lakapi a Samoa.
