O le lou ma lona fuata, o aso o le filiga o aso foi o le mata‘igatila

“Ua tatau foi ona fai se suiga”, o le saunoaga lea a Campbell Newman e pei ona lē mapu ai le saoasaoa o folafolaga ua folasia. O nisi aso ua timu o isi foi aso ua susulu le la, e faapena foi le fesuiaiga o tu ma aga masani o le olaga e oo lava i tiute ma faiva ma soo se matata. A toilalo i se faagatama ua tulai mai se lagona faanoanoa, a manumalo, e faaosofia lagona i le meemee, mitamita ma le faagaeetia.

O le mafuli o le toatele e lagolago le LNP (Liberal National Party), na mataina ai le see mamao o le sā o le susuga ia Campbell Newman e pei ona lē o toe po ai se lilo i le faigapalota i le faamanuiaina i le tele o sui faipule o le Itu agai, e ui ina sa‘e le sā ma faaseetuāgalu le tamaitai sa iloga foi lona tulai mai e avea o se Palemia i le faigamalo faa-Setete o Kuiniselani, o Anna Bligh. O ia o se uluai tamaitai Palemia faasetete sa tulai mai foi i le lona 23 o paeaiga.

E tele galuega lelei e manatua ai pea e tagata Pasefika o ia i totonu o Kuiniselani, aemaise lava le afi lea na sasao ma maliliu ai tagata e 11 i Slacks Creek faapea lologa.  E lē galo foi le sunami, na tu malosi ai lea tamaitai e saili seleni mo Samoa i le 2009 ma le tele o vaega lelei sa ia faataunuuina a o tu mai i le foe. E ui ina malolo le tamaitai peitai sa momoli lava lona agaga faafetai ma ana faamanuiaga i le taitai o le LNP ma lona tulai mai aemaise lona agaga faafetai i le lagolago a sui faipule a le Labor faapea tagata lautele sa palota mo lana faigamalo. E 89 nofoa o le Palemene faa-Setete a Kuiniselani. E 11 sui faipule a le Labor ua toulu ona o le malolosi o palota na manumalo ai sui faipule faaitumalo a le LNP. E tusia lenei ripoti e iai le talitonuga e ono oo atu nofoa a le LNP i le 78, Labor i le 7, ma le Australian Party e 2, a o le isi 2 e ono faaopoopo i nofoa a le Labor pe a iloga ona mautinoa lelei, ma o se tulaga faanoanoa tele lea i le Labor a o alo atu i le palota tele o le faigamalo faa-Feterale a Ausetalia i le isi 17 masina o lumanai.

Ua mataitu ma susue uma laupepa ma taufai fālō tagata lautele i folafolaga a Campbell Newman ma lana paeaiga ma le mau fesili ua tulai mai, poo fea o le a sau ai le tele o seleni e faataunuu ai nei folafolaga, ae tatau lava ia Campbell Newman ona tumaoti ina ia taofia pea lona faamaoni i taimi o i luma.

Fai mai le isi toeaina, a maua loa le avanoa apakaki loa lava, ae sei tālia ia poo fea o le a falala i ai lau o le niu, pe faamata e mafai ona faataunuu nei folafolaga i totonu o le 3 tausaga.

O le saunoaga a Campbell Newman o le a ave pea lana faamuamua i le soifua maloloina aemaise lava tulaga tau aoaoga. O Campbell Kevin Thomas Newman, na soifua mai i le aso 12 o Aukuso i le 1963. Sa galue i le vaegaau (army) a Ausetalia ma aotauina i Canberra, Sydney ma Brisbane ma avea ai o se Civil Engineer e pei ona tauaaoina ai se faailoga tikeri faapea le faailoga o le Master of Business Administration mai le Iunivesite o Kuiniselani. Sa avea foi o se Lord Mayor o Brisbane talu mai le aso 14 o Aperila 2004. E tele faailoga ma matata, ma nisi tomai e agavaa ai e ui lava sa lei avea o se sui faipule o le Palemene ae o lea ua tulai mai e avea ma taitai o le faigamalo faa-Setete a Kuiniselani.

O loo aumau i Windsor Kuiniselani ma ua faaipoipo atu ia Lisa, ma e toalua o la alo tamaitai. O Campbell Newman, o lona tuaa tina o Jocelyn Newman, lea na avea ma Senate o le pati a le Liberal mai Canberra, o se Minisita foi o le Community Services i le faigamalo a John Howard i tausaga ua tuanai seia oo ina litaea i le 2002.

O le Aso Gafua, 26 Mati 2012 sa faia ai le sauniga aloaia mo le faatautoina o le alii Palemia (Premier) fou faa-Setete a Kuiniselani, Campbell Newman, ae o le Aso Lulu, 28 Mati 2012 o le a faatauto ai isi minisita fou ua filifilia.