O le vaiaso na tea nei na faamanuiaina ai le faletua ia Vini Afutoto Lale Peteru ina ua faauu ma to i ai le pale sa tausinio i ai i le tulaga tau a‘oa‘oga o le poto salalau.
O le faailoga o le Bachelor of Applied Social Work ua tauaaoina ma faauuina ai.
Saunoa Vini e faapea o le olaga tauivi latou lava ia, e leai sona mutaaga, ma e leai foi sona pa puipui.
O le soifuaga ma meaalofa a le Atua, e lē o iai foi se pa puipui, e ono taofia ai soo se tasi lava e fia sailiili ma tofo i ai. Ae peitai o le tagata lava ia o le a lē mafai ai ona ia tago ma talia le sasaa mai o faamanuiaga e ala i le poto mamā ma agavaa, aemaise lava foi o taleni mai le Matai.
O le talitonuga ma le silasila mamao a le faletua ia Vini, sa ia ta‘ua ai foi e ui lava o loo galulue i le galuega a le Atua, peitai o le a lē avea lea ma auala e taofiofi ai le olaga saili malo ma le finau.
O le soifuaga foi e mavae atu, e oo lava foi i mafutaga i totonu o le aiga i le va o le tamā ma le tina, faapea le va ma le fanau, e iai lava taimi e oo mai ai aso faigata.
Ae o lana mau e lelei lava le oo mai o aso e lē taugalemu ai, a o lava pea nai vaega ma faapolopolo e tua i ai aso leaga ma taimi faigata.
E lē gata i lea, ae o le a‘oa‘oina pea, e matuā telē sona tāua ma sona aogā, e saga lagolago ai le galuega a le Atua e pei ona tofia ma valaauina e galulue ai.
E moni ua iai taleni pese ma nisi lava foi o agavaa ma silafia ua oo i ai taumafaiga, peitai e naunau pea le loto ma le agaga e sailiili ma suesue pea auā o tapenaga lava ia a le tagata ia faaaupegaina ai ma faatalitali ai le Alii, e tusa ai ma le tautinoga a le faletua.
O le vaega mulimuli, o le faafetai faapitoa i le tamā o le aiga, ona o le lagolago i taimi umi sa faafeagai ai ma le faamoemoe, ma o se isi lea oso tāua ua toe faaopoopo atu mo le faaleleia pea o le galuega a le Atua.
E lē galo foi le tautua ma le faamalosiau a mātua sa ifo mai ai i le lalolagi, e ui ina ua fai i lagi le folauga, peitai ona o le galuega tele ma le a‘oa‘oga sa faatonutonu mai ai, na mafua ai ona tulai ma manumalo i le tele o tausinioga o le olaga o loo iai. Malo lava le tauivi!
