Ua mae‘a nei ona pueina le ata tifaga fou ua faaigoaina, “O le isi itu o le Paratasio”, o lenei ata tifaga sa pueina le tele ona vaega i totonu ole taulaga o Apia.
Ise feiloaiga ma le tofa ia Tanupo Fiu Fogalevai Lemalu Aukuso, ole Faatonu ole ata tifaga fou na ia ta‘ua ai. Ole ata tifaga fou lenei, ose ata faasolo e pei ole ata tifaga lauiloa ole Matai.
“Sa ou manao e faaaogā tagata fou ile ata lenei, ma ole toatele lava o i latou oloo faatinoina le ata lenei e fou, e lei silasila muamua foi iai le atunuu, se‘i vaganā tagata e toalua oloo iai ile ata sa iai muamua foi i isi ata tifaga na pueina e Tanupo ma le South Seas Pictures”.
Na ia ta‘ua foi e lē faigofie le pueina ma le tuufaatasia o lenei ata fou, peitai, o lea ua mae‘a ma ose ata ole a fetaui lelei ma faigamalologa ole Kirisimasi.
Ina ua fesiligia le Faatonu ile tala oloo aumai ele ata tifaga na ia ta‘ua ai, “O Samoa ua lauiloa ile lalolagi atoa ole Parataiso, ona o lona lalelei faalenatura faapea le mamalu ma le matagofie o lana aganuu, aemaise le agaga talimalo o ona tagata, peitai, e iai le isi itu ole Paratasio, o lona itu lea e lē o silafia ele lalolagi, se‘i vaganā ai lava tagata oloo nonofo ma aumau i Samoa ma soifua ai ile ituaiga soifuaga lenei.
Na ta‘ua e Tanupo ole tala lenei oloo faaautu ise tamaitiiti e valu tausaga lona matua e igoa ia Samu, sa tia‘i e lona tina ile taulaga o Apia, na ola Samu ose tamaititi e leai sona aiga ma nofonofo solo i totonu ole taulaga.
O mea na tutupu ile olaga o Samu, oloo aumai ai le tala ile ituaiga olaga oloo soifua ai tagata ile isi itu ole Parataiso.
Ise talanoaga ma le alii talavou o Solofa Peti valu tausaga le matua oloo autu iai le ata tifaga na ia ta‘ua ai. “E faigata tele le pueina ole ata, e tele taimi oute tau tagi ai ile faigata o a‘u vaega oloo faatino ae oute lei faavaivai ai.”
Na ia ta‘ua foi a uma puega ata ma alu ile latou fale, e fiu le latou aiga e valaau mai lona igoa o Solofa, ae ua lē tali atu iai, ona ua manatu lava ia, o ia mo‘i o Samu.” O Solofa e mai le afioaga o Malie oloo aoga foi ile aoga tulagalua a Malie.
Ole finagalo faaalia foi lea ole tamaitai ia Elaine Betham, na ia ta‘ua o lona taimi muamua lea ua auai ise ata tifaga Samoa, ma ua ia iloa nei e lē ose mea faigofie le faatinoina o ata tifaga, ae sa ave atoa iai lona mafaufau ma lona loto ina ia lelei le faatinoina o ana vaega i totonu ole ata.
O Elaine oloo galue ile ofisa ale Samoa Sports Complex, e mai le afioaga o Levi Saleimoa.
Ose tasi o tamaitai faafiafia lauiloa i Samoa ia Gustav Su‘a, lea na manumalo ile tauvaga a Faafafine 2015, oloo iai foi ile ata tifaga fou, na faaalia e Gustav lona fiafia ile avanoa ua ia maua, auā o lana taleni lea ole faafiafia. O Gustav oloo galue nei ile Sheraton Aggie Greys Hotel, oloo nofo nei i Vaitele uta.
Oloo iai le faamoemoe ole South Seas Pictures ole a amata faatauina atu i tua le ata tifaga fou ile faaiuga ole vaiaso nei, i totonu o Niu Sila ma Ausetalia, ole a faapea foi ona mafai ona maimoaina i soo se itu ole lalolagi ile pay per view, pe a asiasi ane ile http://samoavisual.niche.com/
Na ta‘ua foi ele afioga ile Faatonu, ole ata tifaga fou lenei sa ia taumafai e tuufaatasia se ata e faafetaui ai le ata tifaga ole Matai, afai oloo fiafia tagata ile Matai, e faapena foi ona fiafia e matamata ile ata tifaga fou lenei, “O le isi itu o le Paratasio”.
Sa molimauina ele tusitala nisi o vaega na pueina o lenei ata, ma sa maofa foi ona ole agavaa ua iai i o tatou tagata, e faatino ai mea nei o ata tifaga.
