O le Faiava

Ata faamatala – South Seas Pictures


O le Faiava, o le igoa lea ua faaigoa ai le ata fou a le South Seas Pictures lea ua faamoemoe e amata faatau atu i tua i le faaiuga o le vaiaso nei. O le FAIAVA o le vaega muamua lea o Vaega e 5 o ata faasolo i le Soifuaga o Samoa. O le ata fou lenei e le o se ata tifaga e pei o le Naomi ma le Tautoga Gausia, ae o se ata faamatala (Documentry).

O le ata lenei o le a toe faatepa ai Samoa i le soifuaga moni sa soifua mai ai Samoa i tausaga ua mavae. O le soifuaga galue, e tagi lava i lima le tausiga o le ola. O le ituaiga soifuaga foi lenei e le toatele ni aiga poo ni afioaga o Samoa o ola ai, ona o suiga televavave o le soifuaga ua iai i le taimi nei.

Na ta‘ua e le Faatonu o le ata le tofa ia Tanupo Fiu Fogalevai Aukuso, na mafua ona filifilia le FAIAVA e amata ai le vaega muamua ona o le agaga e fia aumai le olaga tautua ma le olaga tagi i lima, o le anava lea o le olaga o Faiava tausi aiga.

E le tutusa uma Faiava, auā o isi Faiava o loo galulue i galuega ma maua mai ai tupe e tausi ai o latou aiga; o isi foi Faiava e tataa solo ma faaalu lē aogā le taimi, peitai, o loo iai lava Faiava o loo faaaogā tatau le malosi, e atiae ai lona aiga ma fai lana tautua, e ala i le vao, o le sami ma le vai. O le ituaiga Faiava tonu lea o loo agai i ai le ata fou lenei.

O le ata foi lenei e faamaonia ai le mau o loo alalaga ai le toatele, e afua ona mativa ma ola faalagolago tagata Samoa ona o le lē galulue. “E lei faigofie le pueina o lenei ata, ona sa pueina i le vaomatua, o vaitafe ma le sami, e tele ni vaaiga fou o le a maimoaina i le ata lenei.

“O le Faiava e pei o se upu faalumaluma e masani ona taufaifai ma faasinomia ai nai tamaloloa o loo nonofo i aiga o latou taitoalua. Peitai, o le ata lenei o le a uma ai lea lagona taufaifai ona o le tāua o le sao o le Faiava i lona aiga ma lona nuu. O se ata e tele ni aoaoga lelei e maua mai ai, e le gata i alagaupu ma o latou uiga, ae o le gasesega o taumafa ma le faatinoina o le Tautua.

Ua iai le faamoemoe o se taimi lava o le tausaga nei e pueina ai lona vaega lua, o le a faaigoaina o le NOFOTANE.

E mafai ona maua sau kopi o le ata fou lenei mai le Samoa Video Center i Otahuhu poo faleoloa o loo masani ona faatauina ai ata a le South Seas Pictures.