O le avā o se fesoasoani tāua ma se soātau o le tamā i totonu o aiga

Ua moni upu o le pese, o se moemoe ua taunuu, ia ta upu na tuu mumusu, ne‘i te‘i ua moamoa lulu. A o le alofa ua avea lena ma asoa, tausi i ai i aso uma o lou olaga atoa.
E tele nisi o tamā ua motusia mafutaga ma tina e ala i le maliu ma le oti, e lē mafai ona toe tutusa le lagona fiafia e pei ona faatasia ai, aemaise lava taimi ua maua i gasegase o le tino auā e moni o le fanau e fai ma augata i isi taimi ae pei o le loomatua lava o se fomai sili e atili faafouina ai le malosi o le tagata ma‘i aemaise lava pe a faauagagau le itupa malosi.
Na lagilelei le aso taupoina na moemiti pe sa momoo i ai le afioga ia Leota, poo le fetalaiga i le tulafale alii ia Fiu Tu‘ipala Vaigafā Lemaluovailoa (Sili, Lalomauga, Uafato i Fagaloa ma Samusu i Aleipata) na tuufaatasia ai ma lana manamea, le afioga ia Fotumalamaosamoa, poo le faletua ia Nepuolevaiosinālemaoe‘e Ulaitino Silipa (Lelepa & Samauga i Savaii).
Sa faapaiaina  le ulugalii fou e le susuga ia Rev Milo Faaleava auā o se tasi o tiakono faamoemoeina a le ekalesia EFKS Brisbane.
Sa ia tauaveina foi le tofi tiakono toeaina o le Matagaluega EFKS i tausaga ua mavae, ma o ia foi o se tiakono ma se tulafale alii e maualuga lona tapulaa ma taulamua i meafai a le matagaluega.
Sa matagofie le aso fiafia i fuafuaga uma ae taualuga i le taumafataga mamafa sa fiafia ai ma aiga ma uo i le nofoaga a le ekalesia i Inala.
Na ta‘ua  e Fiu Vaigafā, ua atoa le tausaga talu ona amata le la mafutaga ma si ana paaga a o valavala ma va  i vasa, ua loa ona talotalo ina ia vave ia na oo mai se aso e tuufaatasia ai i laua auā foi o la le Tusi Paia, “E lē tatau ona toatasi se tagata” o le iai o se soātau, o se fesoasoani sili lea e lē gata i totonu o le aiga ae sili ai tiute ma faiva o le galuega a le Atua.
O le tamaitai faaipoipo sa aumau i Niu Sila ae o le paoa tele o upu ma tala a le tama o le Tanifa na mafua ai ona tuua Niu Sila e le tamaitai ae malaga mai i Brisbane.
O lea foi mafutaga sa mauaa fesootaiga i luga o upega tafailagi e pei ona masani mai ai le soifua o le alii faaipoipo i Savaii.
O le tofa ia Tiaseu Lopeti sa fai ma Fofoga o le aso, a o le afioga ia Tia Samuelu na saunoa e faafetaia le paia i aiganalua mo faaaloaloga ma le fofoga taumafa.
O le failautusi o le ekalesia EFKS Brisbane i Inala, le fetalaiga ia Puialii Fidow sa fai ma uosili a le alii faaipoipo ae o Line Muliaga sa fai ma uosili a le tamaitai faaipoipo.