O le faatasiga i le pitonuu o Magele i Sasa‘e e pei ona faataunuu i le Aso Toonai talu ai, aso 28 o Novema 2015, i le Walter Massey Park, na iloa ai le lagolagoina malosi o lenei fuafuaga, i lona autu ina ia mafai ona omai uma faatasi le tele o atunuu eseese o loo aumau ai e lē gata i Magele a o isi pitonuu uma o loo i totonu o Aukilani i Saute.
Ma o se vaaiga matagofie le lolofi atu o le toatele o tagata mai atunuu, lanu ma gagana eseese e opogi ma saosaolaumea i le faamatagofieina o lenei aso faapitoa. Na felanulanuai vaaiga i lea aso i le tele o faafiafiaga, o taaloga, ma le anoano o i latou sa faaali ma faatau atu foi a latou oloa ma mamanu eseese o faiva alofilima na faalauiloa atili ai tu ma aganuu a o latou atunuu eseese o tupuaga.
O le isi itu na tele ina lolofi i ai le au maimoa, o le pito na faatau ai taumafa sasala manaia a i latou sa fai o latou faleaiga. E mautinoa o lea aso, sa faatulaga ina ia tofu si tagata ma sana vaega sa faatino ai sona sao auā le saga faamatagofie atili lenei aso faapitoa.
E tele ni vaiaso na faaaluina e vaega o komiuniti eseese e tapenapena ma faamaopoopo ai mea uma sa faataunuu i lea aso. O le autu e pei ona faamaonia mai lea aso i faatinoga uma na fai, le mataina o ma le galulue faatasi o kulupu eseese o loo aofia ai totonu o lenei faaitu o Niu Sila.
E tusa ma le 50 kulupu poo vaega mai komiuniti eseese, o kalapu ma faalapotopotoga sa aofia ai i lenei fuafuaga, ma sa taufai galulue faatasi e faatino lo latou sini autu, ina ia omai faatasi uma tagata o loo aumau i totonu o lenei faaitu, ma faamanatu faatasi se aso ua patino mo i latou lava ma o latou olaga.
Na faaaogā lelei foi lea avanoa ua potopoto faatasi ai le toatele o tagata, e nisi o faalapotopotoga o loo taulamua i totonu o le atunuu i le uunaia o a latou auaunaga poo tautua mo le soifua laulelei, le soifua saogalemu, ma le soifua maloloina e pei o le vaega o loo taulamua i togafitiga o le gasegase o le gugu, le Arthritis New Zealand, o le vaega a leoleo, ma le vaega mai le Fale Mataaga poo le Auckland Museum.
O le afioga i le alii faipule o Magele, Tofa Su‘a William Sio na saunoa i le saunoaga autu mo le tatalaga o lenei faamoemoe. Sa auai atu foi i ai sui o Komiti Faafoe i totonu o Pitonuu taitasi, ma isi lava sui taualoa o pitonuu eseese i totonu o Aukilani i Saute.
O le vaaiga na iai le Aso Toonai o se faamaoniga o loo lelei ma lagolagoina e le toatele lenei aso faamanatu faapitoa, ma e mautinoa o loo toe tulimataia foi e komiuniti se isi aso fiafia faapenei i tausaga o i luma.
