O le ā le umi e nofo ai le talita Ranfurly Shield ia Counties Manukau?

E alafa‘i mai le ‘au tapuai a Counties i le lotu o le Aso Sa na se‘i mavae nei, ma le tala faafiafia loto, i le seia o le talita le Ranfurly Shield e le aulakapi a le Counties Manukau i le taaloga ma Hawkes Bay i le faaiuga o le vaiaso, ina ua manumalo i ‘ai e 27 i le 24 Hawkes Bay, i le taamilosaga o le ITM Cup o loo faagasolo nei.
Na faamae‘a le vaiaso lona fā o le taamilosaga i le sola mai o le Steelers ma le talita i le faatoa 9 o aso talu ona uu ma faafeao e Hawkes Bay i le vaiaso na tuanai atu nei.
E aga mālie lava le faataamiloga o le malaga faatupu a le Talita (Ranfurly Shield), vaiaso muamua o le taamilosaga manumalo ai le ‘au a Waikato i le taaloga ma Northland 31 i le 22, ma mau ai le talita ia Waikato mo nai aso. Vaiaso lona lua o le ITM Cup, taaalo Waikato ma Otago, se‘ia mai foi lea e Otago ina ua manumalo 26 i le 19, faafeao ma nofo i Otago mo le 9 aso, i le faatoa toe tauaaoina lea o le talita talu mai le 56 tausaga talu ai. Soosoo ai le taaloga i le vaiaso lona tolu, na faate‘i ai e Hawkes Bay le aulakapi a Otago ma manumalo i le ‘ai e tasi, 20 i le 19, ma faaauau ai le talaaga o le Ranfurly Shield i Hawkes Bay, faatoa toe manumalo foi lea i le talita talu mai le 44 tausaga talu ai.
O le faaiuga o le vaiaso na taaalo ai loa Hawkes Bay ma le ‘au a Counties Manukau ma suipi faalelei ai Tana Umaga ma le vaega, manumalo i le taaloga i ‘ai 27 i le 24 ma sola mai ai ma le talita.
O le tupua ua leva foi ona taumate e le ‘au tapuai a le Counties pe tua ma ni ā le taaloga na se‘i mavae atu, auā na finau mai foi Hawkes Bay latou ia toe tatao le faafeao o le talita i totonu o le latou pitonuu, ae pagā lea, ua malolosi tele tamaiti o le ‘Uamea.
E pei ona silafia o le aulakapi lea a le Counties o loo faiaogaina e se tasi o alo Samoa sa avea ma kapeteni o le All Blacks i tausaga ua mavae, le susuga Tana Umaga. O se tulaga maualuga lea i le tulai mai o lea foi alo Samoa i le tofiga faiaoga.
O le manumalo ai o Counties i le faaiuga o le vaiaso, faatasi ai ma le se‘ia o le talita, o le lona 17 ai lea o aulakapi faaitumalo ua mafai ona manumaloina le talita talu ona faavae mai.
E tolu ‘au malolosi o loo i le pito i luga o le faatulagaga o aulakapi a le ITM Cup i le taamilosaga, ua mae‘a a latou taaloga muamua uma o le taamilosaga, e leai ma se faiaina, Ueligitone, Aukilani, Canterbury, ae lona fā i ai le Counties Manukau, peitai e lei manumalo lava se aulakapi o le toatolu lea i le talita, ae o le taimi muamua lea i le talafaasolopito a le aulakapi a Counties ua tauaaoina ai le talita.
O le la aso ananafi, o se aso faapitoa lea na faatumulia ai magaala o Aukilani i Saute i le toatele o le ‘au tapuai a le Counties Manukau, ua lanu mūmū pa‘epa‘e ma uliuli faasolo atoa ai le auala, i le fia auai o tagata e molimauina le faafeaoina mai o le talita le Ranfurly Shield i se solo tele na amata atu lava i Manukau, faasolo atu ai i Papakura ma Pukekohe i le 3:30pm.
O se vaaiga maoae le tumutumu o le mamalu o le atunuu, auā e le gata o aoga i le faaitu atu lea o Aukilani i Saute, ae o fale faigaluega foi ma le atunuu lautele.
O le vaiaso lona 5 lenei o le ITM Cup, ma o le Aso Sa 15 o Setema, e faamoemoe o le a taaalo ai Counties Manukau ma Taranaki, e faia lea i Pukekohe i le 2:35pm i le aoauli. O le fesili taumate la lea o le a nonofo ma le ‘au tapuai a Counties i lenei vaiaso, faamata la o le a mafai ona toe mau le talita ma puipui le manumalo o Counties i le faaiuga o le vaiaso nei?
O le ā le umi o le a nofo ai le Ranfurly Shield i Manukau? Ia ua na o ni nai mafaufauga lava, ae ia manuia tele lau tapuaiga.