Ole Tweet ale alii o Taylor Taylor ile Aso Faraile ole vaiaso na tea nei na faailoa ai oloo sauni Laauli Joseph Parker e fusu ma Deontay Wilder mo le fusi ale WBO.
O lenei fusuaga e foliga ole masina o Aperila o lea fai ai.
Peitai, ole talanoaga ma David Higgins ole Duco Events, le pulega lea a Joseph Parker, na taua ai e Higgins e leo mautinoa peo ai o lea fusu ma Parker.
Ae ole aso na sosoo ai ma le ma talanoaga ae maua ai ma le tweet a Taylor faasino ile paga o lea sosoo ai a Laauli.
Afai o lea, o lona uiga o lea faatalitali ma talosia e manumalo le fusuaga oloo loma a Deontay Wilder ma Andrej Wawrzyk o Polani.
O lea fusuaga e mo le fusi ole WBC oloo ia Wilder ua faamoemoe e faataunuuina ile aso 25 o Fepuari.
Ae i tala ua maua mai ile pulega a Wilder, oloo manao le alii Amerika e fetaui ma Parker ile masina o Aperila. Fai mai a ia, e mafai ona sosoo ana fusuaga, Fepuari ma Aperila. Ae e manao foi o ia ile fusi ale WBO e tuu faatasi ma le fusi ale WBC oloo ia te ia.
E le ose tagata faigofie Deontay Wilder. Ua atoa nei le 36 fusuaga aunoa ma se faiaina, 36 malo ile tuioti. E talitonu foi o lea manumalo i lana fusuaga ma Wawrzyk.
Ole manao foi lea o Duco Events ma Joseph Parker, ia tuufaatasi fusi ale Paga Mamafa. E iai ma le talitonuga a Duco Events e matua mafai e Parker ona uuina nei fusi uma WBO, WBC, IBF ma le IBO.
Ile talanoaga ma David Higgins na ia taua ai oloo saili pea se fusuaga mo Laauli, na ia taua, e lei mautinoa. oloo talanoa atu ia Anthony Joshua, Jarrell Williams ma Hughie Fury.
Ae ole taimi nei e lei mautinoa poo ai tonu le paga a Parker ole a la fusu ia Aperila.
Ta‘ua foi e Higgins oloo tapena malaga atu i Samoa ile faaiuga ole masina nei, Ianuari, mo le isi talanoaga ma le malo ile faatupeina ole fusuaga e sosoo ai a Joseph Parker.
E ui lava i fetusiagiga i luga e fesootaiga televavave, e pei ona faailoa ai e Taylor le fusuaga a Wilder ma Parker, peitai, faatoa maua lava le atoaga pe a faalauiloa mai faalauaitele ele Pulega a Parker, le Duco Event, le igoa ole tagata ole a fusu ma Parker.
