O fea ua galoma i ai suesuega o le faaaogā sese o tupe Ofisa o le Tiute?

Ua lata i le lua tausaga o faatalitali pea poo fea ua fai i ai le suesuega faalotoifale sa feagai ma le vaega suesue o le Matagaluega o Tupe ma le Komisi e Pulea Tagata Faigaluega a le Malo le PSC, i se tagata faigaluega sinia sa galue i le vaega o tupe o le Ofisa o le Tiute, lea o loo aofia i totonu o le Matagaluega o Tupe Maua o loo iai ma le Ofisa o Lafoga.

O faaletonu i tuua‘iga o le faaaogā sese o ni tupe a le Ofisa o le Tiute sa agai i ai ia suesuega faalotoifale, lea na mafua ai ona lē toe filifilia se tasi o tamalii sa avea ma Pule Sili o le Matagaluega o Tupe Maua.

O le alia‘e o ia faaletonu na lē mafai ona maua le tagata faigaluega sinia (taofia le suafa) ina ua saili atu o loo ave ona aso mālōlō i atunuu i fafo.

O loo iai ni molimau ua ta‘ua ai na ave le mataupu i leoleo mo ni suesuega peitai e lē o mafai ona faaauau lea galuega ona e lē o maua tonu lē o loo tuua‘ia mo le suesueina i faaletonu tau tupe i lea ofisa o le Malo sa galue ai.
Ua faailoa mai e se molimau sa lotolotoi i suesuega faalotoifale i le mataupu, ua tuuina atu le mataupu i le Loia Sili a le Malo ma lona ofisa mo le faia o se isi gaioiga faaletulafono e sailia ai lē o loo tuua‘ia. Talu mai lea taimi umi e lei toe maua se faamatalaga poo fea ua faatūtū i ai ia gaioiga. E lei maua se avanoa i le ofisa o le Loia Sili e fesiligia ai e tusa o le latou pitolaau i le mataupu.

O le faaletonu na aliali mai e lē o mafai ona iloa i le taimi nei pe fia se vaegatupe a le ofisa o le Tiute ma le Matagaluega o Tupe Maua na aafia. Faaalia e se tasi o tamalii sa galue i le Komisi e pulea tagata faigaluega a le Malo ma o loo ia silafia lenei mataupu, e faapea ua mae‘a uma suesuega faalotoifale ma na pau le tulaga o loo faatali i ai, o le toe aumai i Samoa o lē o loo tuua‘ia i faaletonu.

O le a tuliloaina pea lenei mataupu mo le fia maua pea o le taunuuga o le a oo i ai. E iai se isi faaletonu na aafia ai seleni a le Ofisa o le Tiute sa suesueina e leoleo, ma sa molia ai nisi o tagata faigaluega sinia. Sa faasalaina e le faamasinoga ma ua mae‘a ona tuli o latou faasalaga ma totogi ni sala tupe.