Tapuaiga a Malisi i Aukilani ma le au lakapi taitoafitu sa malaga atu i Samoa

Tapuaiga a Malisi i Aukilani ma le au lakapi taitoafitu sa malaga atu i Samoa

E le sili le ta’i nai lo le tapuai, o lagona ia o le pulega o le au taitoafitu a Malisi i Aukilani ma tama taaalo na faailoa i le po o le Aso Toonai 2 o Iuni i le hall a le iuni lakapi a Otahuhu, ina ua feiloai le au sa malaga i Samoa i le taamilosaga o le taitoafitu o le Sisigafu’a ma le tapuaiga a Malisi i Aukilani ina ua foi mai ma le ipu o le siamupini o lea taamilosaga sa faia i Samoa i le faaiuga o le vaiaso ua mavae. E lua aso sa faagasolo ai lea taamilosaga, o le Aso Tofi ma le Aso Faraile, ma sa tele i ‘au mai Smaoa sa auai faapea foi nisi o ‘au e lua mai Fiti ma le tasi o le ‘au mai Niu Sila nei lea sa malaga ai Malisi Samoa Aukilani.

O le agaga faafetai o le pulega o le ‘au, e pei ona fai ai le fofoga o Tuala Sila Vaifale ma sui o le aumalaga i Samoa e momoli le agaga faafetai i le paia lasilasi o le mafutaga a Mailisi Samoa i Aukilani nei e tusa ai ma le nofo tatalo ma tapuai lea ua sola mai ai Malisi ma le siamupini o le taamilosaga o le Fu’a i lenei tausaga. O le tausaga 2016 na auai muamua atu ai Malisi, ae lei faamanuiaina lo latou taumafai, ae o le tausaga lenei lea ua toe folau atu ai le vaa o Malisi i Samoa ae o lea ua a’e manuia loa lana faatautaiga.

E 21 ai na manumalo ai Malisi i le laua sailiga siamupini ma le au a Savaii Vikings. O le loto faafetai o le afioga ia Lemalu Ben faapea le susuga ia Tuala Sila Vaifale ma le susuga ia Seumanu Francis Ioane sa taitaiina le malaga i Samoa, i le loto e tasi sa faatino ai e tama le taaloga, aua o le latou silasila i le maualuga ma le saoasaoa lea ua iai le taaloga lakapi i Samoa, e lē o toe faatamala foi tamaiti o Samoa i le taaloga. O le Aso Lulu na faapaiaina ai le latou togiga fou lea sa taaalo ai, na foaiina e le Taula ma o le kamupani lea sa lagolago malosi i le ‘au a’o iai i le atunuu.

O le afioga ia Leota Isaako o le peresetene a Malisi Samoa i Aukilani, sa fai ma sui o le tapuaiga e faafeiloai le aumalaga ma momoli foi le agaga faafetai i tama taaalo faapea uso a Malisi sa taitaiina le au i Samoa. Faaopoopo foi le saunoaga a le afioga ia Aiolupotea John Roache i lona agaga fiafia ua malaga mai le ‘au e tasi i Niu Sila ma le ipu o lenei taamilosaga. Ua le gata i le auai atu e fai ma sui o ‘au i Niu Sila ae ua tele foi le sao o Malisi i le atinaeina o le taaloga o le lakapi i Samoa mo alo ma tamafanau o le atunuu. Ua alo atu nei Malisi Samoa i Aukilani e puipui ana Ipu e lua lea ua umia nei, o le Ipu o le Taitoafitu a Malisi Samoa ma le Ipu o le Taitoafitu a le Sisigafu’a.