Tusa Tavau Junior Misikau o le fomai o le gasegase o le gugu

Tusa Tavau Junior Misikau o le fomai o le gasegase o le gugu

O le galuega a le Samaria agalelei le susuga ia Tusa Tavau Junior Misikau lea ua fesoasoani ai i le mamalu o le atunuu i le fofoina o le tele o gasegase e pei o le gugu, stroke ma le tele o isi mai, o se faamanuiaga na ia maua mai i ona mātua aemaise lava isi ona tina ia Eleni Talamoa Tavau Misikau.

O le tina lenei sa galue i totonu o le ekalesia Aso Fitu i Lalovaea i le Home Health Education Service, i le vaega lea latou te faatauina tusi i totonu o aiga. O le tele la o aiga e alu iai lenei tina e tau atu loa o iai se tagata o gasegase ona ia fofoina lea, auā o le tuaa o le susuga ia Tusa Tavau e tupuga mai i le aiga Tuvalu e fiafia e fai fofo.

O le masani la a le tina, a oo ina alu e fai lana galuega lenei, e alu lava ma ave lana tama lenei o Tavau e fesoasoani i le aveina o lana ato, ma o iina na amata mai ai loa ona puepue mai e lenei alii le galuega a lona tina sa fai. O le tele foi o taimi e masani ona faatau ai e le tina tusi faafomai (medical book) e fesoasoani i lana galuega lenei o le acupressure, ma o le tasi lea vaega sa sili ona fesoasoani i le alii o Tavau e suesue ai i le uiga o le galuega a lona tuaa sa fai.

Sa iai le naunautaiga o le alii o Tavau e fia ulufale atu i le army a Amerika ina ua mae’a lana aoga tulagalua i Lalovaea ae faaauau loa ana aoaoga i Tutuila. Peitai ane sa lē mafai ona aveesea mai i lona loto le galuega a lona tina sa taumulimuli ai a’o laititi.

Na toe taliu i Upolu ma fai le faiva o le fatu aiga tausi i le tausiaina o ona mātua. O le tele o taimi sa ia fesilisili ai i lona tina i le uiga o le fofo ma lona faaaogāina. Sa faamatala iai e lona tina, ae ina ua ia malamalama i le acupressure ma le pressure point i totonu o le tino o le tagata, na faaosofia atili ai lona agaga e suesue pea e faalautele lona tomai, ma ulufale atu ai i aoaoga i Amerika faapea ma Niu Sila nei i le faatinoina o le fofo.

O le tele o taimi e lē uma ana aoaoga ona e ave lana faamuamua i lona tina o loo i Samoa pe a ta’u mai ua gasegase. E tele ina nofo i Samoa i le fitu masina ona o le tausiaina lava o lona tina. O lona talitonuga e toe maua aoga, ma isi mea o le lalolagi ae lē toe maua ni mātua. O le tala foi a lona tina ia te ia e faaaogāina e le Atua lau taleni ma lana meaalofa oloo ia te oe e manuia ai le toatele o le atunuu.

I le taimi nei ua tele tagata ua sulufai atu i le fia maua o lana fesoasoani i le gasegase lenei o le gugu ma le stroke, ua iai ma’i ua manuia i Samoa a’o aumau ai ile tausiga o le gasegase o lona tina. O lea ua toe taliu mai i Niu Sila nei, ae ua maitauina ai foi le lolofi atu o tagata i le fia maua o le fesoasoani, aemaise lava i gasegase o le gugu ma le stroke faapea ponaivi tiga o le tino.

O le molimau a nisi o ma’i sa fofo e le susuga ia Tusa Tavau, ua faasolosolo manuia o latou gugu, pe a faatusatusa i le tele o taimi e faaaogā ai tootoo pe a oo ina tetele le ma’i, ae o le taimi nei ua lē toe faaaogāina ni tootoo. O le tele o nei molimau oloo i luga o le upega tafailagi o loo faasoa ai molimau ola a nei tagata i le tāua ma le aogā o le fofo.

O le toatele foi o nisi o le atunuu o loo aumau i isi atunuu o le lalolagi, o loo fesili mai i le susuga ia Tusa Tavau pe mafai ona malaga atu i Ausetalia, poo Amerika ona o loo fia maua foi e latou le fesoasoani i le ma’i lava lenei o le gugu. Ae na saunoa le susuga ia Tusa e lē mafai ona malaga mamao ese atu ma Samoa ona o loo ave lana faamuamua i lona tuaa (tina) ua gasegase.

O le sulufai atu o le mamalu o le atunuu i le susuga ia Tusa i le fia maua o le fesoasoani i lana fofo, ua toe manatua ai e Tusa le tala a lona tina, e faaaogāina e le Atua lau taleni ma lau meaalofa e manuia ai le atunuu.

Comments

comments