O ao Sinasina o Punavai o le Malamalama

I atunuu mamao e pei o Ausetalia nei o le sootaga a tagata matutua poo tuaa sinasina ma le tupulaga talavou o se itu tāua e faamatala ai talatuu ma uiga o alagaupu ma agaifanua i tupulaga fai a‘e mo le teuina o measina a Samoa mo le lumanai.
Ua molimauina i atunuu na faoa ma leiloa a latou tu ma aga e pei o Hawaii, Maori ma Aporiti le mamafa o tapenaga e toe faaolaola le gagana tautala ma le silafia o a latou faasinomaga mai anamua auā le silafia e tupulaga lalovaoa.
O le tāua lea o se mafutaga a tamā ma tina matutua o loo tapena mo le Aso Tofi nei e lau Samoa e faia i le Maota o le P.I.C. i Lakemba e amatalia i le itula e 10 i le taeao ae taualuga i le afiafi. O le faatāuaina o le mafutaga a tuaa sinasina ma lo latou sao i aiga ma Ekalesia i le faasoaina o lo latou silafia.
O le polokalama e amatalia i le taeao ma e silia ma le selau sui mai mafutaga eseese o le a auai. Na faaalia e le Peresetene a lau Samoa Alaalatoa Emani o lenei mafutaga tuufaatasi e aofia ai sui mai Campbelltown ma Bankstown seia oo atu i Penrith.
“Na faia foi se mafutaga muamua i le tausaga talu ai i le Maluapapa o le talalelei a le EFKS i Fairfiled, lea na auai ai le Komesina aoao ia Samau Lemalu Tate Simi ma le sui Komesina ia Luciano Fonoti. Na auai potopoto ai foi susuga i faafeagaiga na valaaulia mo lea aso faapitoa.
O loo fuafua o le polokalame o le Aso Tofi nei 29 o Aokuso o le a vaaia ai faafiafiaga ma siva e tapenaina lava e mafutaga eseese a tina ma tamā matutua lea e faatumulia i le ata ma le fiafia i taga ma uiga mālie foi o tuaa sinasina.