E ese lava le lalolagi pisi o fafo o le Malumalu o le Peace Chapel latou, i le feoai ai o taavale i le auala lea e i Vaimea, ma le feoai o tagata o loo feagai ma galuega ma feau masani o le aso, ae tatala loa le faitotoa ma e savali i totonu o le malumalu i le tumutumu o tamaitai, o le leo o viiga ma lauga o loo matuā vevela ai le tapuaiga lea ua faafeiloai mai ai oe.
O tamaitai o loo moeiini, o isi o loo siisii lima ma valaau Amene, o isi o loo i luga o le nofoaga o loo momoli mai ai feau faamalosiau, ma le faaili o loo lagolagoina le lauga ua oo i ai le faasologa o le polokalame ma viiga e matuā fofoe ese lava le vevesi o fafo i le auala tele ae sagai ane loa oe lenei faato‘ā alu atu i le sauniga lea o loo faaauau.
Mo se tasi e lē lotu ai i lotu Papatiso, o le vave ia o le suiga lea auā e lē masani ai le vivii faapea ae o le feau ua faamalosi ai le ola faaleagaga o tamaitai e ese foi le auala ua aumai ai ma e lagona lava i le loto le suiga ua pa‘i mai ua vavae ese ai le mafaufau i le mafuaaga o le oo atu i lea Mafutaga.
O lagona ia i le oo atu e fia maua se lipoti o le Fono Faaletausaga i lona usuia faatolu lenei. O le Fono Faaletausaga a Afafine o le Tupu, le igoa ua faaigoa ai tamaitai ua auai atu mai i ekalesia Kerisiano eseese i totonu o Samoa ma fafo atu.
O se fonotaga ua vaaia le faatuputupulaia vave o le numera o sui auai ma o se taumafaiga ua vaaia ai foi le tele o le suiga i le feagai ai o tina ma tamaitai o Samoa ma le faatinoga o o latou tiute i totonu o a latou lava aulotu, totonu o o latou aiga ma nuu.
O se mau lea a le tamaitai na faavaea lenei fono faaletausaga, le faletua ia Alesi Unoi o le Peace Chapel o Apia.
“O se faaaliga mai i le Atua na oo mai ia te au ae na faaali mai i le 20 tausaga talu ai, peitai sa na ona faataatia seia iai se taimi,” o le saunoaga lea a Alesi.
E ui ina faataatia lea faaaliga ae na fai lava ma manatu i ai le tamaitai ma iu ai lava ina lē mafai ona ia toe taofia lea faaaliga tāua ma ia talo ai loa finagalo o tamaitai, amata mai i totonu o lana lava aulotu ma faalautele atu ai loa i isi aulotu ma isi ekalesia seia oo lava ina taunuu ma amata le uluai fono faaletausaga.
O le taimi lenei o le matuā faatumulia lava o lenei fono ma ua lē na o tamaitai Samoa foi ua auai, ae o tamaitai o isi atunuu ua faamautu ma galuue i Samoa ua faaavanoa lava le vaiaso lenei o Novema o tausaga taitasi ina ia mafuta ma maua ai se upu faamalosi mai i isi tamaitai aemaise i latou ua valaaulia e saunoa i lenei vaiaso faapitoa.
O le faamalosi o tamaitai e ala i le upu a le Atua le auga lava o lenei faamoemoe ma o se auala ua fetufaai ai tamaitai i tiute ua feagai ma i latou, o faafitauli o loo feagai ai ma tamaitai o le atunuu, o auala e tali atu ai i ia faafitauli ma le faamalosi e lē mafai ona tuua ina ia faaauau tiute ma galuega ma ia manatua le pule o mea uma, le TUPU, o ia foi le tali o loo ua faamamafa i lenei mafutaga.
O le igoa Afafine o le Tupu o se igoa na aumai lava i le faaaliga na faapea ona momoli atu i le faletua o Alesi Unoi ma o le siosiomaga atoa o lea fonotaga e mafai ona faapea ua faatautaia i le maualuga ua ave i Aiga Tupu.
E amata mai lava i teuga o le nofoaga lenei ma le faaeaea ua ave i tamaitai auai uma. E alu ese lava le tagata e auai ma le lagona o le faatāua ua taulai ia te ia ma le Tama o i le Lagi. O le faaaloalo ua maua e sui auai ona o le malosi o lo latou talitonu i le Atua.
O Afafine o le Tupu o i latou ua maua le ola faaolaina ma soo se tasi e talia le tala‘iga a le Atua poo ē foi o loo iai le manaoga e talia lea tala‘iga, na ta‘ua e le tamaitai o Alesi Unoi, o i latou nei ua faaigoaina o Afafine o le Tupu.
O se faasinomaga matagofie ma na ia faaalia o soo se tamaitai lava e tatau ona valaauina o le Afafine o le Tupu.
O se avanoa tāua lenei e feiloai ai foi tamaitai i nisi foi ua iloga i le galuega tala‘i i le Talalelei, lea na aofia ai le tamaitai e oo atu le tatou sui e lipoti mai le mafutaga o loo saunoa, le tamaitai o Debbie Katina mai i Hawaii.
O lona foi unai i le talalelei ma le faamalosi ai o tamaitai na faapea ona momoli mai i lana lauga ma le tāua o le tulai mai o Afafine o le Tupu e tali atu ma ofo atu le fesoasoani i tamaitai na auai atu i lenei mafutaga, ma ia faia se suiga i olaga o soo se tamaitai e ala i le feau a le Atua.
O le faaiuga o lenei mafutaga e matuā fai ai lava se fiafia tele, ua faamalosia ai le laei o nei tamaitai uma e auai i laei o Purinisese ma e lē tuumāmāina foi e sui auai lenei vaega e faaiu ai le mafutaga, ma e mae‘a lea fiafia ua na o Purinisese lava e tumu ai totonu o le Maota lenei o le Peace Chapel.
O teuga felanulanuai o tamaitai ua o gatasi lava ma le malosiaga ua vaaia ia i latou ma o se faiga ua manatu Alesi Unoi, e tatau ona faamanatu ai le tāua o tamaitai o le Atunuu ma le tāua o lo latou sao i le galuega a le Atua i totonu o Aiga, Nuu ma Ekalesia.
O le tausaga lenei o le tausaga lona tolu o lenei fono faaletausaga, ma le faamoemoe e faaauau pea i tausaga taitasi.
