E toaono tamaitai talavou ua sauni atu nei mo le sailia i ai o se Lalelei o Samoa i Ausetalia. E toatasi mai Sini, toatolu mai Melepone ma tamaitai e toalua o loo tauva mai Brisbane.
Ua alo atu nei la le Komiti a le Miss Samoa Ausetalia e feiloai atu i tamaitai tauva nei e toaono ma a latou sponsors i le Aso Lulu, 10 o Iulai o le vaiaso nei. O le a amataina i le sauniga lotu i lea afiafi sosoo ai ma le ‘ava o le feiloaiga e saunia e le Faafaletui a le Tofā Saili faapea le Kalapu a le Fana Uma.
O le a se‘iina i lea po numera tauva a tamaitai, ona alo lea i le taligasua. O le Aso Tofi, o le asiasiga a Tamaitai Tauva i Matua matutua i le Ofisa o le Multilink i Logan Central.
O le a faataunuuina le tauvaga i le pitonuu o Beenleigh i le 4 i le afiafi o le Aso Toonai, 13 o Iulai, amata aloaia ai le polokalame mo le faailogaina o le 10 tausaga talu ona amata le Miss Samoa Ausetalia.
O le ta o le itula e 6, o le a alo atu ai mo le taligasua, ona sosoo ai loa lea ma le tauvaga e sailia ai se Lalelei o Samoa i Ausetalia mo le 2013/2014.
Komiti a le Miss Samoa Ausetalia:
Peresetene – Galumalemana Koleta Talevu
Teutupe – Feagiai Lilomaiava
Sooupu – Muliagatele Filipina Petelo
Faatamā – Patea Pesamino Taefu.
Miss Siuila Pouesi (21 Yrs Old)
Sponsors: Pouesi & Tauai Family
MELBOURNE
Na soifua ane le tamaitai i Maluafou, Apia Samoa. O se alo faasino i le susuga i le faafeagaiga ia Rev. Poe Pouesi ma le faletua ia Analosa Litia Pouesi. O le tuaa tamā o le tamaitai e mai afioaga o Sapapalii i Savaii ma Sapunaoa Falealili. O lona tina e mai le afioaga o Fasitootai.
O loo aoga nei mo le sailia o lona faailoga i tomai faatausi soifua ma galuega laveai i luga o ambulance (Bachelor of Nursing and Bachelor of Paramedics). E faigaluega part time foi le tamaitai i fale o loo tausi ai tagata matutua. E pele i le tamaitai o Siuila lana aganuu o lona tofi faasolo lea o se tamaitai Samoa. E fiafia foi le tamaitai i ituaiga o siaki ma fua eseese o lavalava (fashion). Ua nofo sauni atu nei le tamaitai o Siuila mo le finauina o sona avanoa e avea ai ma tausala poo le lalelei o Samoa i Ausetalia.
Miss Olivia Howman (19 Yrs Old)
Sponsor: Xervio
MELBOURNE
Na soifua mai i Sydney i le aso 30 o Iulai i le tausaga e 1993, peitai o le tele o lona soifua na ola ane i Melepone. O lona afioaga i Samoa, o Lotopa i Faleata. O le taimi nei o loo galue o se Administrator mo le ofisa suetusi (accounting firm). O se tamaitai e fiafia tele e agai i le gym mo ana faamalositino ina ia tausi pea le ola maloloina. E fiafia foi e faimalaga asiasi atu i nisi atunuu ma nisi nofoaga. E fiafia i musika, o tafaoga i le matafaga, ma e fiafia i le taaloga basketball.
E lei leva ona mae‘a aoga a le tamaitai mo ona tusipasi i le mataupu o le accounting i le level 3 & 4, ma o loo manao foi e saili sana galuega i tomai tau personal training ma hospitality. E manatu le tamaitai e ui lava o loo laitiiti lona soifua i lenei taimi, ae o ia o se tagata e ola finafinau, ma manao e faamalosiau i isi uma tamaitai talavou o Samoa ina ia aua ne‘i fiugofie ae ia mitamita o i latou o ni tamaitai Samoa, ma ia mitamita i la latou aganuu Samoa.
Miss Laina Niko Misipati (25 Yrs Old)
Sponsor: Misipati Family
MELBOURNE
Na fanau mai Laina i le aso 20 o Ianuari i le 1988. O ona afioaga i Samoa, o Leauvaa ma Levi i Saleimoa. O se tamaitai o loo faafoe lava e ia sana pisinisi (Independent Business Ower) ma faagasolo foi i le taimi e tasi ana a‘oa‘oga i le aoga mo leoleo i le Victoria Police Academy. O se tamaitai e fiafia tele i le faitautusi, aemaise lava le fiafia e suesue le Tusi Paia ma suesue tusi mo le gagana Samoa.
E masani ona fai ni ana tautalaga i le lautele ma galue fesoasoani i fale o tagata matutua. Fai mai a ia, e taumafai lava e avea o se teine talavou e lelei ma avea ma faataitaiga lelei mo isi tupulaga o loo fai mai, e ala atu lea i lana galuega lea o loo faagaioi ai lava e ia lana pisinisi, aemaise foi i lona faamoemoe lea o loo tulimatai atu i ai, ina ia avea ma se tamaitai leoleo (police officer). O loo taumafai foi e faatāua ma faapelepele i lana aganuu o se tamaitai Samoa, e ala i ona uiga ma mea uma na te faia, ina ia iai ni aafiaga lelei mo isi ona uso tamaitai Samoa.
Miss Muliagatele Renera Thompson
(25 Yrs Old)
Sponsor: United Pacific Freight
SYDNEY
O le tamaitai o Renera o se alo faasino ia Muliagatele Peter & Lemalu Rhonda Thompson mai afioaga o Motootua, Satalo Falealili, Faleula ma Leauvaa. Sa amata mai lona soifuaga i Samoa, ma na ia a‘oa‘oina ai ma ua tofo ai foi i le ‘oa o le aganuu ma tu faa-Samoa.
O se tamaitai foi ua faaee atu i ai le suafa Muliagatele a lona aiga, o se tasi o suafa matai mai ona tuaa, o ē na atiina a‘e le faavae o measina tāua a le aganuu i totonu o lona aiga ma le afioaga.
O le tamaitai o loo soifua ane nei i Sini Ausetalia, o le Setete ua matuā anoanoai le tele o aganuu eseese o loo faatino ai, ma o se fiafiaga foi lea i le tamaitai o Renera, ona o loo mafai ona ia tauaveina ai ana aganuu e lua, aemaise lava lona uumau pea faapelepele i lana aganuu faasamoa, ua mafai ai ona ia faapaleniina vala uma o lona olaga. E faigaluega le tamaitai o Renera o se tasi ua agavaa i galuega tau faufautua i inivesi (Investment Advisor) i se tasi o kamupani tele i Sini e tuuina atu fautuaga i mea tau tupe (leading financial advisory firm).
O le taimi foi e tasi o loo aoga le tamaitai o Renera mo le faailoga Bachelor of Business Degree (Finance and Economics) i le Swinburne University ae o loo tau faamae‘a foi ana aoaoga mo lona tusipasi i tomai tau faasalalau i le televise (TV Presenting Diploma) i le aoga, National Institute of Dramatic Art.
O se tamaitai e fiafia foi e galue ma lagolagosua i nisi o faalapotopotoga mo foai faameaalofa, e pei o le “Dress for Success Sydney” charity.
Miss Liuanome Kalepo
Sponsor: Kalepo Afemata Family
BRISBANE
O se alo e faasino i le susuga i le faifeau, Reverend Kalepo Afemata ma le faletua ia Susana Afemata o Magiagi ma Mulivai Safata. Ta‘ua e le tamaitai o Liuanome, o lona ola ane i se isi atunuu e ese mai lona atunuu moni o Samoa, ua tupu a‘e ai ia te ia se faanaunauga na te fia iloa ma malamalama atili i lona tofi, le auala e soifua ai le Samoa, poo le olaga faa-Samoa.
O le ala lea o lona fia tauva i le sailiga o se Lalelei o Samoa i Ausetalia, ina ia ona maua le avanoa lea e galulue faatasi ai foi ma isi ona uso, tamaitai tauva, ma a‘oa‘o mai foi ia latou a o latou naunau e faalautele lo latou silafia i le latou aganuu o ni tamaitai Samoa.
Ae mo sona lava lelei, e iai lona talitonuga o le a avea lenei tauvaga, e fesoasoani mo le faaleleia atili o lona lava ituaiga o tagata, ia avea o se tamaitai lelei e ono avea ma faataitaiga lelei mo ona uso ma ona tuatane laiti.
O se avanoa lelei foi e faaali ai ni taleni ua ia te ia auā lava le faalauiloa atili o lona atunuu o Samoa, i ana tu masani ma lana aganuu.
Miss Kristle Vaigalepa Leo (22 Yrs Old)
Sponsor: EFKS Setima o le Ola
BRISBANE
O le alo tamaitai o le susuga i le faafeagaiga ia Reverend Pevise ma le faletua ia Shirley Leo mai afioaga o Magiagi, Vaimoso, Leauvaa, Falelatai, Tanugamanono ma Fasitoouta. E ui ina ola ese mai Samoa, ae ua tofo ma a‘oa‘oina e le tamaitai o Kristle le tamaoaiga o le aganuu a lona atunuu o Samoa, e ala lea i le auai atu i meafai a lana ekalesia faapea foi i nisi o mea o loo faatino ai le aganuu.
Na soifua ane i Aukilani i Niu Sila, ona siitia atu lea i Ausetalia a o faatoa 5 ona tausaga. Peitai e 8 ona tausaga ae agai atu i Samoa ma nofo ai mo le 4 tausaga, o inā na maua ai le avanoa lelei e malamalama lelei ai i le olaga faa-Samoa, aemaise le matagofie o lana aganuu.
E manatu Kristle o se faamanuiaga lona olaga o se afafine o le faifeau, ona o mafuaaga nei: Muamua, ua faavae mausalī lona olaga i talitonuga tāua faa-Kerisiano. Lua, o aso taitasi e mautinoa lava e faatino mea uma i le olaga faa-Samoa, auā e tele taimi sa ia maua le avanoa e tautala, siva, ma faia le tele o mea faasamoa i meafai a le lotu Samo, aemaise le faifaimea faatasi ma le tele o ana uo i mea o le aganuu a Samoa.
O loo iai le faanaunauga o le tamaitai e fia fai sana ia lava faleofu (Fashion Store). Na amata mai aoga a le tamaitai i le Marsden State School, sosoo ai Apia Primary School, Leifiifi Intermediate School a o iai i Samoa, faapea le Southside Christian College i Salsbury.
