O ai o le a avea ma MISS SAMOA NZ 2018

Le tamaitai o loo avea nei ma Miss Samoa NZ, Vaiotausala Natalie Leitulagi Toevai
Le tamaitai o loo avea nei ma Miss Samoa NZ, Vaiotausala Natalie Leitulagi Toevai

E toalima tamaitai o le a faia i ai le faaiuga faaiu a faamasino i le afiafi o le Aso Toonai nei, aso 14 o Iulai 2018 i le Fale o Samoa i Magele i Aukilani, e avea ma Tausala Samoa Niu Sila poo le Miss Samoa NZ mo lenei tausaga 2018.

E toafā tamaitai mai pitonuu eseese o Aukilani ma le toatasi ua auasa mamao mai lava i le motu i Saute, i Kalaiesetete, le tamatai o Cecilia Tufuga Fatu, o ia lea e toalima iai i latou mo le faiga filifiliga faaiu.

I se faatalanoaga a le Fetalaiga Seumanu Simon Matāfai ma tamaitai tauva i luga o le polokalame a le K.O.K.O Samoa Youth Show, a le Radio Samoa i le afiafi o le Aso Toonai talu ai, na maitauina ai le taufai mataalia o tamaitai uma e faatalitalia le afiafi o le a faaali uma ai le atoaga o a latou tapenaga mo lenei tauvaga matagofie.

O le tamaitai o Cecilia Tufuga Fatu e 23 tausaga le matua, o le tamaitai muamua lea o le tauvaga, sa soifua ane i Kalaiesetete ae o ona tuaa e tupuga mai afioaga o Asau i Savaii, Toamua, Levi Saleimoa, Solosolo ma Salelologa i Savaii. Ina ua fesiligia Cecilia i le mafuaaga ua naunau ai e ulufale i lenei tauvaga, na toe ave le mafaufau o le tamaitai i le taimi sa aofia ai lona tuaa (grand-dad) i tuā i upufai o malo a Samoa, sa tautua ai lona tuaa o le minisita o le soifua maloloina i le uluai faigamalo ina ua tutoatasi Samoa, ma e iai lona talitonuga o le laa atu i le avea ma Miss Samoa NZ e ono laasia ai foi e ia lea laasaga o se ta’ita’i, e avatu ni faatonuga ma taiala i nisi tagata. E lē gata i lea, sa asiasi Cecilia i Samoa i le tausaga talu ai, ma feiloai atu ai i le tamaitai sa avea ma Miss Samoa 2016, le tamaitai o Precilla Olano, ma na matauina ai e Cecilia le telē o se aafiaga lelei na mafai e le tamaitai o Precilla ona faasafua atu i isi a’o ia tauaveina le pale o le Tausala Samoa, ma ua oso a’e ai foi sona lagona e na te fia faia foi se aafiaga faapea i soifua o isi aemaise lava isi tamaitai talavou.

Tamaitai o le a tauva i le Aso Toonai nei mo le pale o le Miss Samoa NZ 2018
Tamaitai o le a tauva i le Aso Toonai nei mo le pale o le Miss Samoa NZ 2018

Mai le faatalanoaga a Seumanu ma tamaitai o le a tauva, na matauina ai le tele o taleni ua faa’oaina ai nei tamaitai, aemaise lava i le tulaga o taaloga, faapea foi isi tomai maoa’e tau a’oa’oga. O nisi o nei tamaitai e maualuluga tulaga tau aoaoga ua oo iai o latou tomai, o nisi o i latou o loo faaauau pea a’oa’oga tau iunivesite, ae o nisi e ui e lei ausia a’oa’oga faaiunivesite, ae na matauina le matua faalemafaufau o nei tamaitai uma i le auala sa faaleo ma faasoa mai ai o latou lagona e tusa o le tauvaga ma mafuaaga o lo latou fia auai i lenei taivaga.

O le latou faanaunauga uma mo le ulufale atu i le tauvaga o le Miss Samoa NZ, ina ia faalautele ai lo latou malamalama i le latou aganuu o ni tamaitai Samoa, ma mananao foi e faatino nisi o vaega o lena aganuu o loo mitamita ai. O nisi o i latou sa ta’ua le telē o se aafiaga mai o latou mātua sa faalaeiauina i latou ia tauva, ae o le mea moni lava o lo latou foi lena faanaunauga moni, ia iai se vaega o latou olaga ia tofo ai i le avea moni o se tamaitai Samoa.

Sa ta’ua e se tasi tamaitai, e iai foi lona faanaunauga ia lagona sona leo i meafai aemaise nisi o mataupu tāua e aogā mo ona tagata Samoa. Na ta’ua le avea mo se tamaitai i totonu o le Palemene o Samoa, ae o le amata atu i polokalame faapenei e pei o le avea ma Tausala Samoa, o le a amata ai ona ia faatinoina ituaiga o tiute faapena.

E tele manatu lelei ma le ‘anoa sa faaleo e nei tamaitai uma, ma e mautinoa o le a matuā faaatoatoa mai e nei tamaitai o latou lagona uma nei i le afiafi o le a faataunuu ai loa le faiga filifiliga faaiu mo le latou tauvaga.

E to’a 28 tamaitai na faaulu o latou suafa na amata mai ai le sailiga i luga o le initaneti, ma filifilia mai ai tamaitai e to’a 8 mo le faagasologa lona lua, seia oo ai loa ina totoe mai le to’alima lea o le a faia i ai le filifiliga faaiu.

O le tausaga foi lenei, ua atoa i ai le 27 o tausaga talu mai ona faagasolo lenei polokalame mo le sailiga o se Miss Samoa New Zealand, e pei ona faaauau mai pea e le tamaitai le afioga ia Ulalemamae Teeva Matafai. E momoli atu ai foi le faamanuiaga ma moomooga alofa o le Samoa Times i tamaitai uma e toalima o le a tausinio i lea afiafi. O outou māmā na!

Cecilia Tufuga Fatu

Tausaga: 23

Afioaga: Asau Savaii, Toamua, Levi Saleimoa, Solosolo, Salelologa Savaii

Isabella Fraser Fruean

Tausaga: 25

Afioaga: Apia, Lalovaea, Samatau, Faleseela, Fagalii, Satitoa

Hilda Elizabeth Nofoaofia Pitone Teleaga

Tausaga: 25

Afioaga: Tufuiopa, Solosolo

Flora Neemia

Tausaga: 21

Afioaga: Uafato Fagaloa, Lalovi Mulifanua, Pata Falelatai, Talimatau, Aai o Niue

Taryn-Indianna Hainsworth Faaofo

Tausaga: 19

Afioaga: Faleapuna, Magiagi, Vaimoso