E poo ā lava manatu faaalia o le atunuu pe a oo ina silasila i fuaitino ma foliga o tamaitai talavou o le atunuu e lesitala atu mo le fia auai i tauvaga i tausaga taitasi i le taimi o le vaiaso o le Teuila, e tofu lava le tagata ma lana faaiuga i le tamaitai e sola ma le manumalo.
Peitai o le faaiuga mulimuli lava e taatia atu i faamasino o le a latou faia le galuega o le togi o tausala taitasi i vaega lautogia o le tauvaga ma maua ai le tamaitai e sola ma le pale o le tausala o Samoa.
O le tulaga foi lea i le faamoemoe o lenei tausaga a o faagasolo polokalame eseese o le Teuila o lenei tausaga 2014. O le tausaga nei e faigata tele le filifiliga ma se faaiuga a faamasino ona o le ausia e tamaitai uma o foliga vaaia i lo latou lalelei ma le fetaui o o latou fuaitino.
Pau lava le itu e faigata i se molimau lava ia i o tausaga taitasi i tapenaga a nisi sui o le tautala i le gagana Samoa, ona o nisi o alo tamaitai sa soifua i atunuu i fafo.
O le matau foi i ai o se itu faigata foi lea mo nisi o tamaitai tauva mai Samoa ona o le faavasegaina o le tautala i le gagana Peretania pe a oo ina tali fesili o se isi vaega togia lea o le tauvaga.
E siamu ai tamaitai tauva mai Niu Sila ma Ausetalia ma Amerika, ae siamu ai tamaitai mai Samoa i le tatou lava gagana, e ui ina iai nisi vaega e tau feto‘i ai ona o suiga i le tatou gagana tautala o aso uma ua iai i nei aso.
O le uluai feiloaiga a tusitala ma tagata faasalalau ma tamaitai tauva sa faia i le faletalimalo o le Orator e laugatasia finagalo faaalia o tamaitai e toasefulu, i le faapea mai, a avea ma tausala o Samoa o le a liliu e faatino le mea silisili mo le faalauiloaina o le atunuu, ma ia unaia le itu i aoaoga mo alo ma fanau lalovaoa o le atunuu.
E lē fuatasi i tauvaga i tausaga taitasi o le faamoemoe foi ia o nisi o sui tauva, peitai na faaalia e se tasi o sui tauva sa auai i nei tauvaga i tausaga ua mavae, e lē faigofie tapenaga pe a oo ina feiloai tamaitai ma nonofo faatasi, auā e tasi lava le sini o tapenaga ia manumalo.
O le tausaga nei e toalima tamaitai mai fafo, toalima mai Samoa o le a tausinio i le po o le Aso Toonai o le vaiaso nei, e sailia ai se lalelei o Samoa.
O i latou nei e aofia ai:
• Miss Polynesian Shipping Line:
Josephine Mafoa
• Miss Thomsen’s Bridal Couture:
Faalagilagi Vaifale Tuisalega Farani
• Miss Le Spa Lelalelei o Samoa:
Monica Giselle Sene Schwenke
• Miss Moataga Enterprises:
Tuutasio Aiga Jessica Taulaga
• Miss Samoa Australia:
Tusipepa Sandra Lilomaiava
• Miss Veronica’s:
Tili Lafaele
• Miss Lavashe Couture:
Monica Tuaimau Evans
• Miss SuperKidz Samoa Foundation:
Fa’ailoga Leagiagi Leota
• Miss My Tiara’s Boutique:
Cheyenne Faapaia Maiava
• Miss Samoa New Zealand:
Latafale Auva‘a
