Ua iu manuia le fuaina o eleele o Vaiusu. Ole galuega na amata lava pei ona taupoina. E ui ina sa iai le taofiga mai se vaega ole aiga o Seiuli, ma toe oo atu ai alii ma faipule ile ofisa o faamasinoga ile Aso Gafua 12 Setema e toe fesiligia le iuga. Na toe faamanino le faaiuga ale faamasinoga ele Lesitala, ma fautuaina ai le nuu e faaauau ona fua eleele e pei ona fuafuaina.
Ole taeao ole Aso Lua na sosoo ai, 13 Setema na ala usu ai loa alii ma faipule faapea le malosi ole nuu mole faamoemoe. Na toe molimauina ai foi le iai lava ose tasi ole aiga lava lea na tetee na faaoo atu lava lona lē fiafia ile togavao.
Sa toe fofola atu iai le faaiuga ale faamasinoga e pei ona ua mae‘a ona faamanino mai ele Resitala, ma faapea ai loa ona masuiga mālie le faagaulēmalie o lea sui ma faaauau ai loa le fuaina ole fanua.
E vaelua afea le 100eka a Seiuli ma Ulugia?
Na ole lima lava aso na faatino ai le vavaeeseina mai ole 100eka mai fanua ole malo i Falemauga mo Vaiusu. E pei ona molimauina, na ona fua lava ole poloka 100eka ma faapine, ae lei vaeluaina.
Ae ua molimauina ole tausaga nei na tuua ai le malo ele Susuga Seiui Patau Lino sa fai ma fofoga ole aiga Sa Seiuli i meafai ale nuu, ma avanoa ai lona nofoa e oo mai nei. E lē taumate ole a tālia se taimi e vaevae ai le 50eka ale pito a Sa Seiuli, pe a pale mai se nofo e tausia le aiga.
E fia se tau e vaefā ai le 50eka?
E $8,300 na totogi ele nuu ile fua fanua e fua ai le poloka 100eka ma faapine. Peitai ua sauni foaifale ole aiga Sa Ulugia e totogi se tau e vaefā ai le latou 50eka.
E oo mai nei ua silia male 50 tausaga talu ona galue ai le tofa a Ulugia Polisi ile talaloa lea ua oo atu iai le fua. “Ole 1963 na amata ai ona ou galue i eleele nei.”
“Ole fanua ua foai motu mai lava ele malo i alii ma faipule e galulue ai i aso ua tuanai, ua uma ona faato‘a uma.”
“O tuaa o matou mātua na galulue ai, ole tausaga e 1942 na tuu mai ai ele malo o Siamani le eleele. Tusa ole 4 ile 5 ai lenei o augatupulaga a Vaiusu ua galueaina eleele nei, ae o lea faato‘ā faamatuu mai e le malo mo matou.
E iai se tapu o ia eleele?
E lei ma‘oti mai tapu o eleele matuu o Vaiusu i fanua oloo galueaina. “Ole fono ale nuu ile vaiaso nei, e iloa ai le tonu o tagata oloo i fafo male nuu, e faatatau i eleele fou ia ua uma ona fua.
Peitai e mautinoa lava, e maua mai loa se tau ale fuafanua, Tuala Piki, ona faataoto loa lea ole fuafuaga ale aiga Sa Ulugia mole vaefāina ole latou 50eka. O foaifale e fā e aofia ai:
Ulugia Taualaimuamua, oloo saofai mai ai nei Ulugia Aukuso.
Ulugia Aitilotilo, oloo saofai mai ai Ulugia Tovi‘o.
Ulugia Maluseu, oloo saofai mai ai Ulugia Toese.
Ulugia Tamate, oloo saofai mai ai Ulugia Mata‘u.
Na saunoa ai le Tofa Ulugia Aukuso, oloo sologa ma taoto lelei lava foaifale ole aiga Sa Ulugia, mole gasologa i luma ole atinaeina ole nuu. Ua maitauina foi ole aiga Sa Ulugia, o isi ona foaifale oloo i totonu o Vaigaga.
