Ole Aso Faraile ole vaiaso talu ai le aso mulimuli ole afioga ile faamasino, Justice Lesatele Rapi Vaai ile Faamasinoga Maualuga i Mulinuu.
Ole faaaliga lea na tuuina ane ile loia, Leuluaialii Olinda Woodroffe ma Semi Leung Wai, o loia oloo finauina le mataupu ile va o Faatonu ale kamupani nonu ale LPA Nonu.
E lei valaauina faalauaitele lea mataupu ile potu faamasino Numera 2 o Lesatele, peitai sa faatalanoa ile potu ole alii faamasino (in chamber).
Ua lē mautinoa ai nei ma le faaiuga ole mataupu ile finauga a faatonu ole kampani nonu. Ole faamasinoga mulimuli lava o lea mataupu, na talosaga ai Peseta ina ia tuuina atu le pulega ole LPA ia te ia, mai le alii Tausitusi le Susuga Tagaloa Faafouina Su‘a, na tofia ele faamasinoga nate vaaia le kamupani nonu talu mai le faaiuga ole tausaga 2015.
E tele mafuaaga na faamauina e lea talosaga a Peseta, e aofia ai le popolega ne‘i mamulu lona fanua na faamau ai le aitalafu tupe e faatau ai le kamupani nonu lea, mai le pulega nai iai muamua.
Ole isi mafuaaga ole leai ose tupe na teuina ile tusitupe ale kampani nonu le LPA. Peitai ise tusi a Su‘a ile faamasinoga, sa lē mafai ona ioeina e Peseta vaega na faailoa ane i lea tusi. O nisi o vaega na ta‘ua ile tusi e aofia ai le faaaogā o tupe a Laauli ma Apulu faapea tupe ale ofisa o Su‘a e totogi ai tagata faigaluega, ole eletise ma le vai.
Ile faaiuga tuufofoga a Lesatele o lea lava mataupu, na ia folafola ai foi lona tusi atu lea ia Su‘a ma tuuina atu iai le fitu aso e tali ane ai. O lena vaega sa faataunuu ise talanoaga faasamasamanoa ma le lesitala i fafo mai ole potu faamasino.
Peitai na faateia le loia a Peseta, ina ua oo ane ile Aso Faraile na atofa mo lenei feiloaiga ile potu ole Faamasino, ma iloa ai, ole aso mulimuli lea ole Afioga a Lesatele, ma ua lē mafai ai ona ia faatino pe faaauau lea mataupu.
Ose laasaga na faaalia ai le matuā faanoanoa tele ole Susuga Peseta Vaifou, na ia talanoa ai, e lē gata ole faatuai ai ona maua ose faaiuga o lenei mataupu, ae o popolega o lona tagata ile mafuaaga o lana talosaga ile faamasinoga, e pei ona ta‘ua i luga.
Saunoa Peseta, afai e lē mafai ona toe alu ane Lesa e faamasino ile mataupu lenei na ia amataina ma malamalama iai, o lona uiga, e umi foi se isi taimi e toe faatalitali ai se faamasino fou e suesueina le mataupu.
Ua tuuina atu ile aso 13 o Fepuari le mataupu lenei e toe valaau ai mo sona aso faatulagaina e fofoga ai i luma ole faamasinoga.
Peitai ile taimi nei, oloo molimauina le tapunia o faitotoa ole lotoā ale Kamupani nonu i Vaitele.
O isi ana kalone nonu oloo teu ile fale teu nonu ile fanua o Laauli i Vaitele, ma isi kalone ile fale i Salelologa.
Ole moomooga o Peseta ina ia faamae‘a e Lesatele Rapi Vaai le faamasinoga ale LPA Nonu, ona faamalolo ai lea.
Peitai e lē o iloa ile taimi nei, le mafai ona toe suia ose faaiuga ua mae‘a ona faailoa atu ele Faamasino Sili, Afioga Patu Tiavaasue Falefatu Sapolu ile alii faamasino o Lesatele Rapi Vaai. O lea tulaga ua oo nei iai faamasinoga, na saunoa ai Peseta i ona atugaluga i lenei mataupu, ona e lē gata ina atili ai ona faatuai, ae ole fesiligia ai foi ole amiotonu o faaiuga fai i mataupu ma‘ale‘ale e pei ona tatalo ai ile faamasinoga.
E lē gata i lea ae ole alu ole taimi, ae leai lava se tupe mai le pisinisi o maua ane e totogi ai le aitalafu ale kamupani ile NPF.
Ole taimi nei, e lē o iloa poo ai le Faamasino ole a ia faaauauina le suesueina o lenei mataupu ile lumanai.
