Ona o le tusitusiga muamua lea o lenei tausaga fou – ou te faatalofa atu i le paia maualuga o Samoa o loo maua lenei nusipepa. O outou Paia faale-Ekalesia, faale-Malo ma Paia faaleatunuu, o le a nuunuu atu ia Tumua ma Puleono i Salafai ma le latou fatuaiga tausi.
Tatou faafetai i le alofa o le Atua o lenei ua tatou aulia ma le manuia lenei Tausaga Fou – 2012. Ua atoa ai le 50 Tausaga talu ona pulea e Samoa, Samoa lava ia.
Ou te talitonu o loo alofagia pea Samoa i le Pulefaasoasoa a le tatou Tapaau Silisiliese, o lea o loo maua pea e Samoa ma ona tagata le ola filemu, i le tele o tausaga ua tuanai.
Faamalo le tauivi i galuega ma outou tiute tauave i soo se matata, i soo se tulaga, auā le tausiga o aiga i aso taitasi.
O le faamoemoe maualuga ia te au ia fesoasoani mai le tatou Alii Faaola ia folau ma le manuia le sa o Samoa i lenei tausaga, ma ia taunuu o tatou faamoemoe o le maua o se lumanai manuia mo aiga uma, ma ia faapea foi ona faamanuia tupulaga lalovaoa – o taitai o Samoa mo taeao.
O lenei faato‘ā taliu mai le matou faigamalaga mai Samoa i le vaiaso ua tea. Na mafua ona ou alu i Samoa ona o faamasinoga tau fanua ma suafa i mataupu a le matou aiga. E tele suiga fou ua ou vaaia i Samoa. Ae e tele foi lava mea o loo tumau e lē suia. Ua fou uma maota o loo faatino ai faamasinoga a Samoa. E ese le matagofie o nei maota fou.
A o le itu o tapuaiga a nuu ma afioaga – o loo tumau pea uiga masani. O lauga foi o loo faalele pe a mae‘a mai faamasinoga o lauga masani lava e lē suia.
“O lea sa matou tatalo ma tapuai atu…..” E ese le faigata o uiga ia o le tatou Atunuu. O isi lava lauga ua mamalu ma ua avea ma faamāmā avega i le aiga o loo tulai ai se faatafa gasegase, a o isi foi failauga, e tasi lava le autū.
O le faigata o tatou lea e malaga atu i Samoa mai Niu Sila poo Ausetalia – e tatau lava ona faasoasoa lelei nai seleni auā le faamoemoe ma feiloaiga foi ma aiga.
E uma loa tatou tupe na o atu ma tatou, ua tatau loa ona toe vave sue le vaalele e toe foi mai ai i Niu Sila.
E tele atina‘e a le Malo o loo faatino mo le manuia o le Atunuu ma ona tagata. Ua iai le faamoemoe o le tausaga 2014 e iu mai ai Samoa mai le vasega o atunuu tau atiae, ae avea loa ma atunuu ua lelei le tamaoaiga, e pei o Niu Sila ma Ausetalia.
E tele lava atina‘e e avea ma pine faamaonia o loo solosolo lelei le tamaoaiga o Samoa. Ua tofusia le tele o alalafaga ma le malosi o le moli eletise. Ua tofusia foi aiga ma le suavai taumafa ua tuusa‘o i o latou fale.
Masalo foi toe lava o tamaiti pepe e leai se telefoni feaveai, ae ua tofusia uma tamaiti aoga ma tagata matutua ma telefoni feaveai i Upolu ma Savaii.
Ua toatele foi tamā ma tina matutua ua malolo litaea mai galuega mai Niu Sila ua toe foi i Samoa.
O le toatele lava o loo fesoasoani i ai le penisione mai le Malo a Niu Sila, auā o loo mafai ona talosagaina le ave o lau penisione i Atunuu mamao pe afai o loo e fuafuaina e te nofomau i Samoa.
Ua toatele foi nisi mai Niu Sila ma Ausetalia ua toe foi i Samoa ma amata ai latou pisinisi. O nisi o loo faigaluega i galuega a le Malo poo pisinisi tumaoti. E ui o loo fiafia i le toe foi i Samoa, ae fai mai i latou, e tele lava suiga nai lo le mea sa masani ona iai i Niu Sila. E ui i lea o loo fiafia pea i le toe foi i Samoa.
I matou talanoaga ma nisi ua toe foi i Samoa, fai mai nisi, e lelei lava Samoa pe a iai sau alagatupe e faatino ai mea faalenuu, faaleekalesia ma faalavelave faaleaiga.
O isi fai mai e sili lava ona faatau le fanua umia saoloto i Samoa ona leai lava lea o se toe popole i ni mea faalenuu, poo ni saoga mea faaleekalesia. O ia finagalo faaalia ua ataata mai ai suiga ua amata ona ofi atu i talanoaga o loo fai i Samoa auā le sailiga o se lumanai manuia.
Ua fesiligia le faa-Samoa o loo faia i nei tausaga. O le tele lava o faalavelave ua faatino tupe lava e nisi o aiga ma alalafaga – ua lē toe faaaogā le toga poo palapala malo. Ua fesiligia le mamalu o ia faiga – na o le tino i tupe ua faaaogā.
Ua fesiligia foi e nisi le tāua o faiga o taulaga i Ekalesia, saogamea i faalavelave, faiganuu ma fafaga i faiaoga o loo galulue i nuu.
I le vaiaso sa matou iai i Samoa, e toatele nisi o le aufaigaluega i se tasi o kamupani na faatea uma ona ua tuua‘ia i latou i le gaoi.
Fai mai nisi ua mafua ona gaoi i galuega ona o le tele o saogamea faalenuu ma le tele o faalavelave faaleaiga. Ae fai mai nisi ua mafua ona gaoi ona o le mamafa o saogamea faaleekalesia.
I le vaaiga faaletulafono lava ia o le gaoi o le gaoi. O le pepelo o le pepelo. E lē mafai ona e faamalieina lau solitulafono ona o nisi mafuaaga, se‘i vaganā ua faamalosia oe, poo se gaioiga taufaasese a se isi tagata.
Ou te talitonu o le faatalanoaga o nei mataupu e tāua tele mo le sailiga o ni suiga fou e manuia ma lelei ai o tatou aiga ma le tatou Atunuu.
O le isi 50 tausaga o i lumanai, e ao ona sili atu ni tulaga lelei e oo i ai Samoa. E mafai ona faataunuu lea faamoemoe pe a amata atu i le faatinoga o ni suiga fou i lenei tausaga i totonu o o tatou lava aiga taitasi. Ia manuia galuega o lenei vaiaso.
