O se saunoaga a le tamaitai minisita o Paula Bennett i le Aso Tofi o le vaiaso na mavae atu nei na faailoa mai ai se fuafuaga ua faataatia a le faigamaloa a le National, lea ua faamalosia lona faatāuaina e le sui tauva o Manurewa le susuga ia Simeon Brown.
O le faatāuaina la o lea mataupu ua faalauiloa mai e le susuga ia Simeon Brown, ona o lona talitonuga ma ua ia mautinoa e toatele lava aiga o loo afaina i le maualuluga o tupe tului a fale nonotupe o loo faaaogāina e le toatele o tagata aemaise lava i pitonuu o loo toatele tagata Pasefika ma Maori o loo alala ai.
O le faatinoga o nonogatupe e mai le faalapotopotoga a le Salvation Army ae faatupe e le faletupe o le BNZ (Bank of New Zealand) faatasi ai ma le fesoasoani malosi a le malo ma le faalapotopotoga a le Good Shepherd Trust.
Na saunoa le sui faaolioli o Manurewa, Simeon Brown, o se fuafuaga lelei tele lenei o le a mafai ai ona taofia le faafaigofie e tagata ona faaaogā auaunaga a fale nonotupe laiti nei, ma atili le talafeagai ai lava le paketiina o tupe maua ma saga mafatia ai lava i le toe totogiina o nonogatupe ua tetele ma maualuluga ona o tupe tului.
O le autu ma le faamoemoe tāua o lenei fuafuaga, o le mafai lea ona fesoasoaniina o le mafatia o aiga i le maualuluga o tupe tului o loo faaopoopo i le nonogatupe ma faapena ona faaumiumi ai taimi faatulagaina o le togiaitalafu aemaise foi le tulaga i le gafatia o le toe totogiina o le nonogatupe.
E lua ituaiga nonogatupe o le a mafai ona maua, o le nonogatupe e leai se tupe tului e ta‘ua o le “NIL” pe a nono se tupe e oo atu i le afe tala mo le 18 masina mai le amataga o le masina o Setema, ma le nonogatupe e ta‘ua o le “StepUp” i le va o le afe tala ma le lima afe tala mo le tolu tausaga i le 6.99 pasene o le tupe-tului.
O lenei fuafuaga e faapitoa mo le pitonuu o Manukau ma Henderson o iai lala o le Salvation Army. Na saunoa foi Simeon ua alagatatau lelei lenei fuafuaga e tua i ai tagata mo taimi e manaomia ai se fesoasoani i tulaga e pei o le faaleleia o se meatotino e pei o le taavale, o le manaomia o se fesoasoani mo le soifua maloloina aemaise o se fesoasoani mo aoga a fanau.
O se fuafuaga foi e faamautina ai le fesoasoani mo le tau mamao ma le toe aveeseina o se meatotino (repossession) aemaise foi o nisi aiaiga e le mafai ona faailoa ma le faamaoni i taimi o nonogatupe.
O lea la ua faailoa mai e tusa ma le faatalanoaga o le sui o Manurewa, o lea ua avanoa lenei fuafuaga mo tagata lautele o ē manaomia ina ia agai atu e faaaogāina mo le faaitiitia mai ai o le pologa ma le mafatia i le maualuluga o tupe tului a fale nonotupe laiti e pei ona masani ona faaaogāina e le toatele.
