Ole tausaga muamua lenei mai le 54 tausaga talu ona faavae le kalapu a tama tuai ole malisi i Niu Sila, ua faatautaia ai se taamilsoaga taitoafitu e pei ona iai foi le taamilosaga tele ale Malisi i Samoa, lea e atoa ile amataga ole tausaga fou lona tolusefulu tausaga talu ona faagasolo.
O lenei taamilosaga ose moemitiga a tamalii ole Asosi ua lagomau mai tiasa i tausaga ua alu, ole fia faia lea ose taamilosaga taitoafitu. Ole saunoaga lea ale peresetene ole Asosi a tama tuai ale Malisi i Niu Sila ia Leota Vui Isaako. “O lenei faamoemoe oloo faafoe i lalo ole faamalumaluga ale Aukilani Samoa, e pei ona aloaia i totonu ole Iuni Lakapi a Niu Sila auā le faamatuuina mai o alii laufali oloo faatautaia taamilosaga tetele faapenei i Niu Sila nei, mo le faafoeina o lenei faamoemoe. E faafetaia ai le peresetene ole Aukilani Samoa, le afioga ia Aiolupotea John Roache mo lea fesoasoani.”
E 16 aulakapi taitoa 7 sa tausinio i le Aso Toonai na tea nei, e aofia ai ma le ‘au e tasi mai Samoa, le ‘au tuufaatasi ale Apia West ua faaigoaina ole Faleata Knights. E $500 tala Niu Sila le tupe faaulu o ‘au i lea taamilosaga faatasi ai ma le lagolago mai ole faletaavale ale Henderson Cars, sa fesoasoani tele ile tuufaatasia o lenei faamoemoe.
Ole afioga ile Peresetene ole Iuni Lakapi a Samoa ia Su’a Peter Schuster, o ia foi ole sui peresetene ole ‘au tuufaatasi ale Faleata Knights mai Samoa, na ia viia lea faamoemoe ua ausia ele tama tuai a Malisi i Niu Sila. “Ole mea tāua ua amata lenei taamilosaga, faafetai ai le peresetene ma le laulau ale Malisi i Niu Sila mo le sailiili avanoa mo le atinaega o tupulaga taalo.” Na ia faaopoopo i lana saunoaga le ‘au e tasi mai Samoa oloo malaga mai ai. “Ole ‘au lea ale Faleata Knights oloo filifilia lava i ‘au mai le itu i Sisifo ole itumalo Faleata. O tama na malaga mai, ua na’o se vaega toaitiiti mai le toatele ua le saofia mai ona o suega ulufale i Iunivesite ile Papaigalagala faapea galuega.”
E tasi le aso atoa na faatautaia ai lenei taamilosaga mai lona amataga se’i oo ile faaiuga. Ole ‘au taitoafitu tuufaatasi ale Auckland Marist Saints ua lua tausaga o malaga ile taamilosaga a Malisi i Samoa ma siamupini mai ai. O lenei taamilosaga oloo tatala le avanoa e tausinio ai tama taaalo mai atunuu a Toga ma Fiti faapea papalagi ma soo se isi ile taamilosaga lenei.
Faauiga ole taamilosaga
Ole ‘au tuufaatasi na faaigoaina ole Tamatoa na manumalo ile Ipu Faaofuofu na maua foi le latou faailoga tupe. Na sailia e Laulii ma Nofoalii le Ipu Mafolafola lea ua muamua faapipii ai le igoa o Nofoalii i lenei tausaga. Ole sailiga siamupini ile Ipu Autu ole taamilosaga na sailia lea e le ‘au mai Samoa le Faleata Knights ma le ‘au ale Auckland Marist Saints.
Ose taaloga finau mai lona amataga seia oo ile minute mulimuli ole taaloga, peitai e lei malo le moa folau ile moa fanua. Ua nofo nei le ipu ia Malisi i lenei tausaga e tālia ai le tausaga fou ise ‘au nate toe lu’iina, ose itu lelei foi lea i tapenaga ale Auckland Marist Saints mo le agai atu ile taamilosaga taitoafitu a Malisi Samoa ile amataga ole tausaga fou ma faamanatu ai le tolusefulu tausaga ole taamilosaga ale Malisi Samoa. Na maualuga le faamomoe ile auai atu ole Konesula ole malo o Samoa i Niu Sila le afioga ia Faolotoi Reupena Pogi, le Peresetene ole Iuni Lakapi a Samoa ia Su’a Peter Schuster, peresetene ole Aukilani Samoa ia Aiolupotea John Roache, faapea le mamalu ole atunuu na o latou tapuaia lea taamilosaga matagofie. Na faafetaia ele Peresitene o Tama Tuai ai le Malisi le mamalu o Samoa na faatasi atu e lagolago ma tapua’ia lo latou faamoemoe.
