Ile fusuaga mo le fusi ole Paga Mamafa ale WBC na taofia ai ele siamupini o Deontay Wilder o U.S.A, le alii o Luis Ortiz o Cuba ile taamilosaga lona 10.
Ae na toeitiiiti lava faitau fetu ale siamupini ile taamilosaga lona fitu i tu’i malolosi a Ortiz na feto’ai ma le auvae ole Amerika. Ua laki ona ole logo, e uma le taamilosaga fitu, ua matuā tigaina Wilder i lima mamafa o Ortiz.
Na avea le malologa na maua ai le avanoa e toe tului ai le malosi ole siamupini. Ae ana leai le malologa semanu ua e faaletonu Wilder. Peitai, ina ua toe maua le malosi o Wilder na faaletonu ai loa ma Luis Ortiz. Ole taimi muamua lea ua faia’ina ai Ortiz mai ana fusuaga e 28.
Na pa’ū Ortiz ile taamilosaga lona #5, ae na sao ile faitau ale laufali. Ona sui ai loa lea ole fusuaga ina ua toe foi lona malosi ile taamilosaga #6 ma le #7. Ole taimi lea na palalasi ai tu’i malolosi ile ulu ole Amerika.
E lē ose tagata faigofie le Cuban. Ana faapea ose isi semanu e vave lava ona faauma e Wilder le fusuaga ile taamilosaga 6. Peitai, na fiu Wilder e sue sona avanoa atu i totonu o lima puipui a Ortiz ae lei mafai ma tali mailava i so’a so’a malosi ma le agavale faalava. Ose taimi muamua lea ua vaaia ai foi le solomuli o Wilder i fusuaga.
E matautia le fusuaga. Ole fusuaga aupito sili lea ona fefeu mo le siamupini. Ana poto Ortiz, pe ana umi foi le taimi na totoe ile taamilosaga fitu, semanu ua see le fusi ia Ortiz.
Ae o faailoga foi ia ole siamupini moni, ole iloa lea faatonutonu lona malosi i taimi faigata. Ole talitonuga foi lea a Wilder ile fusuaga a Laauli Joseph Parker ma Anthony Joshua oloo loma nei.
E manumalo Anthony Joshua ile faitau ale toatele. Ae ile talanoaga a Wilder ina ua manumalo ia Ortiz, fai mai e telē le avanoa e manumalo ai Parker ia Joshua, auā e lē ole malosi, ae ole fatu. Fai mai a ia, e lē o aupega ale tagata e pei ole maualuga, mamafa poo le umi ole so’a, ae ole fatu ma le loto ole aupega aupito sili lea ona tāua i totonu ole maea.
Na fai lea faatusaga ina ua manumalo ia Ortiz, ae matuā leai lava ma se malosi na totoe ia te ia ile taamilosaga lona 7. Peitai e lei manao o ia e faia’ina ia Ortiz o lea na lototele ai o ia e saili pea le manumalo e ui ua uma ma lona faamoemoe.
Poo ai lava ole a malo ile fusuaga a Parker ma Joshua, e foliga mai o Wilder ole a sosoo ai, ise fusuaga sili ona telē ile talafaasolopito ole lalolagi, ole a tuufaatasia ai fusi uma ole lalolagi oloo umia e Parker, Joshua ma Wilder.
Ua uma foi ona folafola e Anthony Joshua e fia fusu ai Wilder pe a mae’a Parker mo fusi ole IBF, WBO, IBO ma le WBA.
E tasi le tulaga e mautinoa, e iai le avanoa tele e avea ai Wilder ma Siamupini Moni ole lalolagi. Auā ole a fusu o ia mo fusi ia, poo ai lava e manumalo.
Ae ole talitonuga lea ale Amerika, e manumalo Laauli Joseph Parker ia Anthony Joshua, ona la feiloai ai le ma Parker i Las Vegas. Ae e iai le lave, afai ae manumalo Parker, e iai le aiaiga ua mae’a ona ioeina ma Joshua e toe faia se isi la fusuaga pe afai e malo Parker, peitai, ole faitau a Deontay Wilder lava ia, o laua ma Parker ole a fusu ile tuufaatasiga o fusi uma ole paga mamafa.
