Nisi sauniga o le Lotu a Tamaiti i Niu Sila 2014

O se tasi lea o aso faapitoa i le kalena i tausaga taitasi o le Aso Sa e patino lava i le fanau. O sauniuniga i tala faale-Tusi Paia, tala faaleagaga, o pesepesega faaleagaga, o lauga, o tatalo, o tauloto faatasi ma le tele o isi auala ua faaaogāina faaonaponei e momoli ai le talalelei ia Iesu.

O se vaaiga matagofie i Maota tapuai i le tele o falesa Kerisiano aemaise lava i Ekalesia Samoa. O nisi o Ekalesia e lua sauniga o le Aso Sa o le taeao ma le afiafi, ma o loo faaauauina ai pea lagona fia molimau i le matagofie silisiliese o le Atua.

Ma o se avanoa foi lea i nisi o tapuaiga kerisiano e papatisoina ai nisi o fanau ma ofoina atu i le Atua. E fa‘i foi o le sauniuniga o le tauloto a o sauniuniga foi o taumafa o lea aso.
O se tasi o taiala o le talalelei ia faagaganaina fanau i le talalelei a le Atua, latou te molimau ma tautalatala ai i le tala e lelei.

Ua maeu le felanulanuai o sauniuniga i nei onapo i tala faatino, siva faaleagaga, o metotia ma auala ua faaaogāina i nei vaitaimi ma le talutalu foi ua iai nei, o faiga ua vaai ai le tele o le agaigai pea i luma o le tomai ma agavaa i fesuiaiga o le soifuaga.

E moni ai saunoaga masani a le atunuu, “e sui faiga ae tumau lava faavae”, ma e talitonu foi o le loto saili malo foi lea o le tagata Samoa, o lana talitonuga Faakerisiano i lana “Tapuaiga” ma le “Aganuu” ua vaai i le olaola pea o lea lamepa i totonu o Ekalesia i alo ma fanau o nisi foi ia e tauavea faiva o le talalelei i le lumanai.

Ave le faamalo i Taitai o Ekalesia i le galuega folafola aemaise galuega fesoasoani i agaga o le fanau i le tuputupu a‘e i le talalelei ina ia mauaa ma mautu, faapei ona faamautuina Aso Sa Paepae i tausaga uma faapea foi ona tumau ai lea avanoa e molimau ai le fanau i le atoatoa ma le matagofie o le talalelei ia Iesu Keriso.
Se vaaiga i le Sauniga o le papatisoga Ekalesia Metotisi Manukau; Susuga i le Sea Masunu Utumapu

Se vaaiga lena Sunday School EFIS Newton Rev Rolani ma Lemafo‘e Mika