O popolega ma atugaluga o leoleo ile filifilia ele Loia Sili le afioga Lemalu Herman Retzlaff, ose isi loia e finauina moliaga ole Komesina o Leoleo, le afioga Fuiavailili Egon Keil, ua galoma ma nimo vave ese ina ua talosaga le alii loia o Paul Dacre ile faamasinoga e toe faaui uma i tua moliaga e fā.
O moliaga e aofia ai le tauto pepelo, pueina ose tagata ise auala ua solia ai le tulafono, tuuina atu o faamatalaga sese ile Komesina o Sulufaiga ina ua faia le Komisi Suesue ile gaioiga a leoleo na faia ai le osofaiga ile maketi i Fugalei ia Oketopa ole tausaga ua mavae, ma le moliaga ole faia oni amioga lē talafeagai ise nofoaga faitele.
Ole Aso Faraile ua mavae na toe fofogaina ai le mataupu ma le faamoemoe e valaau ai molimau ale itu ale Komesina ma le itu ale ofisa o moliaga solitulafono e finauina ai le talosaga ale Komesina e soloia ma faaleaoga moliaga.
Faaalia ese leoleo sinia (taofia le suafa) na faia le feiloaiga ale Sui Komesina susuga Leiataua Fata Aviga ma le loia o Paul Dacre, sa auai ma le leoleo na faia le suesuega poo le Investigating Officer ma le tamaitai loia ole ofisa o moliaga solitulafono o Leone Mailo.
Ole feiloaiga na faia ile Aso Tofi a‘o lumanai le Aso Faraile 11 o Novema na valaau ai le mataupu. Faaalia ele leoleo sinia, na faailoa ai ele alii loia ua lelei tapena vaega uma mo le finauina ole itu ale ofisa o moliaga solitulafono ma ua malosi foi molimau ma e lē mafai ona manumalo le talosaga ale Komesina.
Peitai ina ua fofogaina le mataupu na muamua tulai le loia ale Komesina o Komisi Koria, ma faailoa lona tauaveina ole itu ale Komesina, ma tulai ai loa le alii loia o Paul Dacre ma faailoa lona tauaveina o moliaga. Sa ia faia ai loa ma lana talosaga e toe faaui ai i tua moliaga uma i lana saunoaga ile faamasinoga ua lē talafeagai molimau (insufficient evidence).
Faaalia ese molimau faatuatuaina ose leoleo sinia sa lotolotoi ile tapenaina o vaega uma o moliaga, na matuā faateia lava o ia ina ua faalogo atu ile talosaga ale loia ua ia ta‘ua ai le lē talafeagai o molimau.
Sa ia saunoa ile loia ina ua mae‘a le faamasinoga o ia e lē o malamalama ile mea ua tupu mai. Peitai ole tala ane ale loia, e faigofie lava le mataupu ole tulaga lea ua oo iai e pei ona ia faailoa ile faamasinoga.
Ole loia o Kiren Raftery sa faamautu ele tamaitai loia sinia o Muriel Lui a‘o lei faia le faaiuga e faamalolo lē tumau, na ia tapenaina uma vaega ma faamautinoa le faia e lea loia sinia i Niu Sila ole mataupu.
Peitai ina ua tauave ele Loia Sili tiute ole faatonu ole ofisa o moliaga faasolitulafono mo se taimi lē tumau, na ia toe suia ai le loia e tauaveina moliaga. E lei talia ele sui Komesina, le afioga Samoa Mulinuu i sana tusi ile Loia Sili, le loia na filifilia e tauaveina le itu ale ofisa o moliaga faasolitulafono.
“Ua matuā faate‘ia lava matou ile mea ua tupu mai, ma ete valaau mai o lea matou te talatalanoa lava iai”.
Ole saunoaga mai lea ase leoleo sinia ina ua fesiligia ise latou manatu e tusa ole faaiuga ma le latou tapenaga na faia. Ina ua mae‘a le faamasinoga o Fuiavailili Egon Keil ile Aso Faraile ua mavae, na ia faaalia ua naunau e toe foi i lana galuega.
Ua ia faaalia foi ina ua tuusa‘o iai se fesili e iai se vaega toaitiiti o leoleo e latou te lē o talia lana pulega. O lana fautuaga ia i latou ia, ole saili ose isi galuega pe afai e lē fetaui ma latou lana pulega.
Na vaaia ile fale faamasino nisi o leoleo oloo faamalolo lē tumau ona oni moliaga oloo molia ai o feofoofotai ma le Komesina ma ave iai le faamalo ina ua lē taunuu le suesueina o moliaga sa molia ai.
O moliaga ole Komesina e mafua mai ile fautuaga ale Komesina o Sulufaiga na faia se sailiiliga e ala ise Komisi Suesue na silasila ile faaseā a Suitupe Misa ona ole osofaiga a leoleo i lana poloka faatau ile maketi i Fugalei lea na masalomia ai ini faamatalaga na ia lafo na faamata‘u ai le faaoo ole maliu ile Minisita o Leoleo ma le Komesina.
O suesuega mulimuli ane ina ua mae‘a le osofaiga na iloa ai e lē sa‘o le tagata na pueina ma taofia e leoleo o lea tagata o Suitupe Misa. Oloo taoto nei ile faamasinoga maualuga le tagi poo se su a Suitupe faasaga ile Minisita o Leoleo, le Komesina ma le Matagaluega o Leoleo ona ole gaioiga na latou faia.
