E na‘o le limaafe tagata ua faaopoopo ile faitau aofai ole atunuu e pei ona faailoa ile taunuuga ole tusigaigoa ale atunuu i lenei tausaga. Ua maua ai se faitau aofai o tagata e 192 afe ma ona tupu.
E ui i ia fuainumera ua faamauina peitai ua faaalia ele Palemia, Susuga Tuilaepa L Sailele Malielegaoi, e iai tagata e lē o faia o latou tiute ona sa tatau ona maua se selau afe o tagata e faaopoopo ile 187 afe ole faitauaofai ole atunuu ile tusiga igoa ole 2011.
Ole faitau aofai ua iai nei e 98 afe ole itupa o alii ae ole 93 afe o tamaitai. “Matuā tele le lē paleni lea e tulai mai o lona uiga e telē le galuega e tatau ona toe fai ina ia taumafai e faapaleni.” “E matuā laitiiti tele lenei faitau aofai o tagata ua faaopoopo ua fiu le mea e tau sue ni tagata e faatoatele ai a tatou tagata taaalo”.
E lei faalauaitele ele Palemia poo lea tonu le uiga o lana saunoaga e iai tagata e leo faia o latou tiute ina ia maua ai le selau afe o tagata faaopoopo o loo ia naunau e siitia maualuga ai le aofai o tagata o nonofo i Samoa.
Ae ole mātau i i‘u o lana saunoaga ua lē o toe fanafanau le toatele o ulugalii ae ua foliga ua fulisia i ulugalii e na‘o le tasi pe fā foi se fanau. Ole isi lea o suiga ua iai Samoa i lenei vaitau e pei ona faaalia ese ofisa sinia ole ofisa o numera faamauina, ua suia le soifuaga ole tele o ulugalii talavou ile faaeteete ile soona faatoatele ose fanau ona ua ola fuafua ile malosi ole tamaoaiga oloo maua. Ua lē pei o tausaga ua mavae sa laualuga i fuafuaga ase ulugalii le faatoatele ose fanau.
Ua feteenai se lagona ole taitai ole Malo ile tatau ona toatele se faitau aofai o tagata Samoa e faaopoopo ile lima tausaga oloo faatino ai tusigaigoa ma le mau tauave ale Faalapotopotoga o Aiga manuia oloo tala‘iina le tāua ole aiga fuafuaina ile tapulaa ose fanau e fuafua ile soifua manuia ole tina.
Ole isi lea o vala oloo manatu nisi ua mafua ai ona itiiti pea le faaopoopoga ole numera ole faitau aofai o tagata i Samoa.
Ole isi mafuaaga ole malaga ese ma Samoa o aiga aemaise o ulugalii ma fanau, ona ole nofomau i Niu Sila i tausaga taitasi. Pe a fua ile 1,100 o tagata Samoa e mafai ona nofomau i Niu Sila i tausaga taitasi, afai e tailima tausaga ma tuua Samoa ei latou e faamanuiaina ile nofomau i lalo ole Immigration Quota Scheme a Niu Sila mo Samoa, o lona uiga pe silia lava ile limaafe tagata ole atunuu e malaga ese ma aumau i Niu Sila i totonu ole lima tausaga oloo faia ai tusiga igoa.
