Ua faatiga fofoga i le toatele le vaaia o taifau taaloa o feoai solo i vaipanoa eseese o le taulaga e oo lava i le falemai i Motootua. O le lē manuia o lea vaaiga ona o le faaleaga e nei meaola o lapisi a aiga ae o le feavea‘i o faama‘i e lamatia ai le soifua lelei o tagata. O le isi itu sili ona lē lelei o le osofaia o tagata aemaise o tulisi e nisi o taifau taaloa. O se tala ave i atunuu i fafo ua faamanu‘alia ai tele le atinae o tagata tafafao mai fafo, ma o le naunautaiga foi lea o le Malo ia faia se galuega e taofia ai, e pei ona iai se tulafono ua mae‘a ona pasia e le Palemene ua aiaia ai faaletulafono le vaaiga lelei o nei meaola, atoa ai ma faasalaga e faia e le faamasinoga mo nisi o le a faatamala i le vaaiga o a latou taifau.
O lea la ua sauni le Malo e ala i le matagaluega o leoleo ma falepuipui e faatino le lesitalaina o taifau ma togafiti le faafitauli o taifau taaloa solo e lē gata o le taulaga a o nuu ma afioaga eseese o le atunuu. O se galuega na faaalia e leoleo o le a taumafai ai e ausia se manaoga o le Malo ia vave faia se fofo a o lumanai le taligamalo tele i le fono a atunuu laiti o le lalolagi o le a faia mai i Samoa i le faaiuga o Aukuso faasolo atu i le vaiaso muamua o Setema.
I ni tali i fesili sa tuuina atu i le Matagaluega o leoleo e faatatau i lea galuega, ua faailoa ai e se tasi o Komesina lagolago le afioga Afamasaga Michael Soonalole, o le a faaaogā se ituaiga o laau malosi e faamoe ai taifau poo se tranqualizer gun. O se faiga foi o le a mafai ona tapue ai meaola e sesegi ma a maua ona ave lea i se nofoaga i Tafaigata pe afai o ni meaola taaloa. O le a tuu ai ae o atu tagata e ana ia meaola e toe aumai ma tausi lelei pe o le faalalo loa i se faiga talafeagai. O le galuega la o le a nafa ma se vaega o leoleo o le a lē tafanaina ai ia mamate nei meaola pe a maua o taaloa, ae tafana faamoe i se vaigase ona faatino lea iai o aiaiga ua tapena i ai. O aiga uma o le atunuu ma tagata taitoatasi o loo aiaia i le tulafono ua pasia e tatau ona laisene a latou taifau, ma o le a tautau i le ua o se meaola se fusipau laititi e iloa ai ua uma ona laisene e pei lava o faiga o loo faia i isi atunuu.
O meaola la e toe maua ane o loo taaloa ae leai ni laisene o feoai ma latou o taifau na o le a tafana faamomoe ma ave i Tafaigata. Ua iai foi faasalaga e faasala ai tagata e ana ni meaola e maua e lei laiseneina. Ua aiaia foi i le tulafono le tatau ona tausia lelei taifau ma pa puipui lelei mai le ono osofaia o se tagata, ma o se faiga o le a puipuia ai le saogalemu o le atunuu feafioai ma tagata tafafao.
