Ole alii talavou o Jacob Temese na fanau i Niu Sila ma o lona tamā na soifua a’e i Samoa ae ua leva tausaga o aumau i Aotearoa. Ole taimi muamua ua malaga ai i Samoa le alii o Jacob i lona naunau e fia feiloai i le aiga o lona tamā i Moataa.
Ole la tafaoga e tasi le vaiaso na la ave ai ma se meaalofa mo le A’oga tulagalua i Moataa o polo lakapi ma polo netipolo. E ui ose tafaoga e na’o le tasi le vaiaso ae sa lagona e Jacob e pei ona talanoa ile tusitala, e fia faaali lona lagona fiafia ua feiloai ile aiga o lona tamā ae ua fiafia e foai ia mea taalo ma lona talitonuga ole a fesoasoani ile atina’e o taaloga aua fanau oloo aoaoina ile a’oga tulagalua a Moataa.
Na faateia le Pule a’oga ina ua afea ise foai e tāua ile faafaileleina ole olaga taalo lakapi ma le netipolo o alii ma tamaitai ole a’oga tulagalua. “
Oute faafetai i lenei atalii ma le afafine ua la maua se loto fesoasoani auā e taugata nei meataalo ae ua leai se seleni ale a’oga e faaalu auā ose meaalofa maua fua.
Oloo taalo le alii o Jacob ise kalapu lakapi i Niu Sila na latou foai ane ia te ia nisi o polo mo le aumaia i Samoa e faatino ai le foai. Ile malaga muamua i Samoa a Jacob ua ia tautino ole a iai isi ana malaga ole a malaga ai ma lona tamā o Emelio Temese se’i toe silasila ma vaai i lona atunuu ua leva tausaga e lei toe malaga iai.
O lona tina ose tamaitai Maori ma o lona uso matua o Cassidy Temese na malaga muamua foi i Samoa ile tausaga ua mavae e fia feiloai i aiga o lona tamā.
E toatele alo ma fanau a Samoa na fananau i Niu Sila ma isi atunuu ma ose vaega tāua o lo latou olaga tuputupu a’e le tatau ona malaga i Samoa e feiloai i isi suli oo latou aiga latou te iloa ai poo ai oloo mau ma nonofo i Samoa. Ole isi foi mafuaaga lelei lea ole faia o faatasiga poo reunion a aiga ole atunuu, auā o nei aso ua ola eseese le toatele o tagata o aiga ma ua toe fenofoa’i ai fanau ona ole lē feiloa’i ma feasiasi a’i aemaise ole faamasani o fanau e maua ai le nofo fealofani ma le nonofo fiafia.
