Ole ‘afa o tagata na taufetuli ile polokalame ale Highest Body Fat Loss o fanau laiti ile ta‘i 8 tausaga agai i luga ile ta‘i 18 tausaga.
O nisi o fanau oloo aooga ile tulagalua a‘o nisi o luga i aoga maualuluga ile kolisi.
Ose tasi lenei polokalame o lea ua fesoasoani malosi ile tuualalo a faiaoga ma fomai oloo vaaia fanau aoga, ole taumafai lea o mātua ia faaitiitia le fafaga o fanau i meaai ga‘oa, vaiinu suamalie ma meaai e ono maua ai fanau ile tino puta, poo le tino lapoa.
Ole Nutrition 3Plus East Tamaki oloo faaauau pea le latou polokalame lenei mo le lautele o tagata Samoa, ua faaigoaina ole Highest Body Fat Loss, ma oloo tatala le avanoa i soo se tagata matua ae faapea foi i fanau e fia finauina lea anavatau lelei mo le soifua maloloina ole tagata.
E 21 tagata na toe auai i lenei polokalame ile 6 vaiaso ua mavae, ma ose polokalame tāua tele mo fanau aemaise o tagata matutua sa taufetuli ai ile fia lusi lea o latou pauna. E fai le Zumba ile 2 aso ole vaiaso, ona alu lea ole tagata latou ia e saili ana ia koleniga ma ana faamalositino ia faalusi ai ona pauna.
E fai fuaga pauna i vaiaso taitasi e saili ai poo ai le tagata oloo faamaoni i aiaiga ole polokalame.
Ose tasi o tamā matua ia Nanai Levi ua 63 tausaga le matua o lona soifua, sa finau ai foi i lea famoemoe, i lona naunautaiga ia maua e ia se tino maloloina lelei aemaise foi oni ma‘i e ono aafia ai lona tino.
Ta‘ua e lenei tamā, e 105kg lona mamafa sa iai, ile fuaina muamua a‘o lei amataina le tauvaga, ae fua lona lua ua pa‘ū ese le 4.5kg. Ina ua amata le tauvaga, e leai ma se meaai lololo na ia toe tago iai e oo foi ise talo poo se iputi suamalie, e oo lava i vai suamalie.
E ui ile faafaigata ia te ia ile tauamataina ae ina ua masani ai ua faafaigofie lava ia te ia le tausiaina o lona tino e ala i meaai.
Sa tele ina ia tausami ile supo e tuu iai maukeni ma isi fualaau‘aina, e togi ai foi i totonu le umala faapea se fasi moa ua aveese le pau e faamanogi ai, ma o ana meaai lava ia i aso uma.
E toaga e inu le iputi lauti e leai se suka faapea foi ma le vai auli. Ma ua ia faalogoina ai lava le telē ole suiga i lona tino, e fai ole usu malosi e galue malosi ma ua lē toe faalogoina ai foi se ma‘i.
Ta‘ua e Nanai talu mai ona amata lenei polokalame ua fiafia ai lava e fai ana meaai ia, ma ua lē toe popole ai foi ise suka mo lona aiga poo se masima auā o lea ua ia iloa le tāua ole leai ose suka poo se masima i totonu o meaai.
Ma ua mae‘a nei lea tauvaga ae oloo ia faaauauina pea ia meaai i totonu o lona aiga auā lava lona soifua maloloina lelei.
Ole afiafi ole Aso Lua ua mavae, 18 o Oketopa na tolaulauina ai loa suafa o i latou ua faamanuiaina i lenei tauvaga ile komuniti hall i East Tamaki, ma ole tamā matua ia Nanai Levi na sola ma le faailoga tupe $500.00, lea e 18kg lona mamafa ua lusi, ae ole tulaga lua o le tamaitai ia Pemita Misipati ma le tulaga tolu ole tina ia Sau.
O nisi sa auai i lea polokalame, e oo lava i fanau laiti sa maua uma a latou faailoga na saunia ele Nutrition 3Plus East Tamaki.
