E tele ni tiute tauave oloo feagai nei ma le taimaitai tausala lalelei o Samoa, le tamaitai ia Alexandra Iakopo, oloo ia galue ai ile vaia lea ole maketiina o Samoa ile malo o Saina i lalo ole auaunaga ale Pulega o tagata tafafao mai fafo.
Ina ua fesilia i lona auai mai e fai ma sui e faalauiloaina Samoa ile Pacific Festival, poo lea sana moemitiga o iai pea maea lona tulai mai le tofi i lenei tausaga, faatasi ai mani poto masani ua ia maua mai i luga o lana auaunaga.
O lu’itau o lona tulai mai ole tausala ia Alexandra na muamua saunoa iai ile faigata ole taimi o lona nofo sauni atu ile tauvaga tele ile sailia ole lalelei ole pasefika, ae maliu faafuasei ai lona tama ile tolu vaiaso ao lumanai le sailiga lalelei ole pasefika i Fiti.
Na ta’ua e Alexandra, “O ina sa fenumia’i ai o’u lagona faaletagata pe oute manatu faapito i o’u faanoanoaga ma faamuamua o’u tiga pe oute manatu i a’u tapenaga e tauave o’u tiutefai faaletausala”. Ta’ua e Alexandra, “E ui ile faigata ole faigamalaga i lea taimi na maliu ai si o’u tamā, ae sa faamalosi lava ma natia o’u lagona faapito ae faatino pea o’u tiutefai auā le igoa osi o’u atunuu o Samoa”.
“Ua aogā foi lo’u tulai mai lenei tofi ua tupu ai lo’u onosai ma faamalosia ai lo’u tagata i totonu ina ia mafai ona ou tauaveina tiute faaletausala ma fai ma faataitaiga lelei i tupulaga ma le tele o tausala lalelei o Samoa oloo finau mai ile tofi i tausaga oi luma”.
Ole tamaitai ia Alexandra oloo naunau e siitia le tulaga o tamaitai Samoa i tulaga tau ta’ita’i. O lona lea faanaunautaiga pea mae’a lona tulai mai le tofi, ole tilotilo lea ise itu i totonu ole Palemene e tautua ai mo ona tagata. I le taimi nei ile vaaia ole maketiina o Samoa i Saina oloo ia galue ai faatasi ai ma le polokalame mo tagata e lē atoatoa ma po le vaai ma le tele o isi itu o lana auaunaga, oloo iai lona talitonuga e mafai ona ia siitia le tulaga i ia auaunaga pea mafai ae ia faaauau ai pea, pea maea lona tulai mai le tofi”.
Ole taimi lenei ile tulai mai ole tamaitai o Alexandra na ia taua “Ole a tele seisi laasaga fou ile lumanai ona o mea ua ou aoaoina atu i lou tulai mai le tofi. Ole tele o taimi oute faafoliga ai oloo sologa lelei mea uma ile tauaveina o lou tofi, ae nana ou lagona faaletagata ma faanoanoaga ile misia osi ou tama.
E lua ni luitau tetele faalemafaufau e tulai mai pea ia te au ile tele o taimi e lutia ai lau folauga ile tauave ina ole pale ole lalelei o Samoa. Ole itu muamua, pe o lava lou malosi oute gafatia ai tauave ou tiute ma onosaia luitau oloo feagai ma au, ma le lona lua ole faagalo o ou tiute ae tali atu ise faafitauli o feagai ma au’.
Ole faigamalaga faa le tausala o Samoa na ia taua, e lē gata o mata uma o Samoa oloo mataituina lau savali, nofo i lalo ma lau tautala, ae o tiute foi ma faiva i aso uma e leo malolo. I lagona natia ole tausala o Samoa na ia faailoa mai, “Ole malosi mai le alii e mafai ai mea uma i lona faatasi mai, ona e eseese ma filogia manatu faapito ma manatu ile tautua i le tele o taimi, ole mafuaaga foi lea ole faigata ole faatinoina o tiute ma faiva i nisi o taimi.
Ole auai mai ole tausala o Samoa ia Alexandra Iakopo mai Samoa faatasi ai ma le lalelei ole Pasefika le tausala o Amerika Samoa le tamaitai o Matauaina Gwendolyn Toomalatai ole a tuuina atu se vaega o lana auaunaga ile lomiga ole vaiaso fou.
