Taualuga ole faamoemoe ole atunuu ile latou tapuaiga

Taualuga ole faamoemoe ole atunuu ile latou tapuaiga

A’o loma ai le taaloga faitaulia ole alo ole atunuu le alii o Laauli Joseph Parker ile taeao ole Aso Sa, na tapena ai ele atunuu i Aukilani se sauniga lotu tuufaatasi ile maota o Samoa i Magele ile afiafi ole Aso Faraile e momoli ai le agaga ole faafetai ile Atua ona ole avanoa lea ua toe maua ele alo o Samoa e fusu ai mo le tuufaatasia o fusi ole paga mamafa ole lalolagi.

A faatusa ile 18 tausaga talu ai a’o iai le afioga ia Faumuina Toaletai David Tua, na ia ausia ai le sailiga ole fusi ole lalolagi ile taaloga lava lenei.

Ole vaega lona lua o lenei sauniga tāua ole nono manū faatasi lea ile Atua ma tapua’ia faaleagaga le alofaiva atu o Laauli Lupesoliai Joseph Parker i lana taaloga ile taeao ole Aso Sa.

Ose tumu uigaese sa iai lea afiafi, auā ua lē maua se avanoa i totonu ole fale, ae ua laulau tutu le toatele o tagata i fafo ona ole fia auai faatasi lava e molimauina lea sauniga tāua mo lea alo ole atunuu. A masii se faiva ile sami poo ni taaloga mai le isi nuu ile isi nuu, e tatau lava ona iai se tapuaiga, ina ia a’e ma le manuia lea faiva, poo ia foi taaloga.

E lē ole manumalo la, ae ia toe foi mai ma le manuia, ole tāua lea.

O susuga i faafeagaiga mai ekalesia eseese, aemaise ole mafutaga a faifeau soofaatasi sa ta’ita’iina lea sauniga, e pei ona ta’ita’i ai le susuga ile teoaina ia Rev Laki Slade, ma le loaloa o Samoa sa tumutumu ai i lea afiafi.

Sa faapea foi ona auai le afioga ile Konesula o Samoa ia Faolotoi Reupega Pogi, ole saunoaga autu foi lea a Samoa i Aukilani sa fai ma sui ole malo o Samoa, faapea le afioga ile Minisita o tagata atumotu ole Pasifika ia Aupito Su’a William Sio ole tasi lea saunoaga autu ole afiafi, ma le alo ole atunuu sa ia uluai asaina le gasū ole taeao i lenei lava taaloga ole faipele ile fusi ole lalolagi, le afioga ia Faumuina Toaletai David Tua lea sa ave faatasi ai ma ana faamanuiaga ma ona alofaaga ile afioga ia Laauli Joseph Parker mo lana taaloga.

O sui o Local Boards mai itumalo taitasi, faapea nisi o tagata mai Tonga ma Niue sa militino faatasi i lea afiafi e opogi le tapuaiga a Samoa mo lana tamafanau.

Ua felanulanuai faamanuiaga mai le aufaigaluega paia ale Atua, faapea tamā ma tina matutua seia oo lava i fanau aoga sa iai i lea afiafi, aemaise ai o faamanuiaga mai isi alo o Samoa oloo aumau i isi atunuu ole lalolagi sa tuuina lea i luga ole facebook ale leitio Samoa auā sa latou maimoa tuusa’o mai ai i lea sauniga lotu ina ua faasalalau tuusa’o ele Radio Samoa i luga o upega tafailagi.

Na maualuga le faamoemoe ole sauniga lotu i faafiafiaga eseese na saunia ele aoga maualuga a teine mai McAuley lea sa siamupini ile Polyfestival a Samoa i aoga a tamaitai i lenei tausaga, faatasi ai ma le lauga ale Kolisi o Magele lea sa suipi foi ile tauvaga tautalaga a aoga maualuluga ile Polyfestival.

Na taualuga polokalame ole po ile faamanuiaga tuufaatasi ale atunuu sa auai, ma faaiu ai loa ile malu afiafi na saunia ele susuga ia Papaliitele Lafulafu Peo ma le latou komiti.

Ole agaga faafetai lava lea ole susuga ia Papalii Lafulafu Peo sa ia tuufaatasia lenei faamoemoe ile atunuu ona ole titifaitama ma le lotonuu, ua auai faatasi ai e tapena lenei sauniga lotu e tapuaia ai le alo faiva ole alo ole atunuu i lana taaloga.

Momoli lona agaga faafetai i nisi o tamafanau ole atunuu sa tuu atu o latou tau’au ma lagolagoina lenei faamoemoe e pei ona iai lea afiafi tāua ma le matagofie.

Comments

comments