Ole aso muamua o Aukuso e oo atu ile aso 18, na ole pau lea ole taimi na faaailoa ai e fomai i aiga ole susuga ia Saunoa e leai se togafitiga, leai se taotoga e toe mafai ona faia ona ua soo le gasegase ole kanesa i lona tino. Ose faaiuga na matuai oia ai finagalo ole aiga atoa e lē gata o mātua, uso ma tuafāfine ma aiga, ae sili ai ona lē mautonu si ona faletua ma nai ona alo.
Ina ua logoina e fomai le aiga, na fetagisi ma si‘o Saunoa ua lē mautonu manatu peitai na faalototele lenei alii talavou i ona aiga e aua le loto vaivai ae lototetele ua na ole pau a ia o ona tausaga e 28 na aumai ai o ia ele Atua ile lalolagi ae oloo iai se isi galuega e ao ona toe avatu ai lona agaga.
E maeu foi le lototele o lenei alii talavou. Ua tele ana galuega lelei ua molimauina e lana Ekalesia Iesu Kersio ole Au Paia o Aso e Gata ai, e pei ona avea ai o ia ose fesoasoani lua ile Uarota a Brassall. O isi sao tāua ua lē masino ole ala lea e manatua ai pea o ia e pei ona molimau ai foi le toatele o ana uo.
E lē gata o ana galuega lelei i totonu ole aiga ae na molimau faapitoa sui mai lana galuega, le Bendigo Bank ile tele o manatu o Saunoa oloo latou amanaiaina. Na malaga atu ma ia tatalaina se isi lala ole Bendigo Bank i Nauru.
Ole isi itu na faateia ai le toatele ona sa ofoina iai ese tasi o ona uso se vai ua aloaia le faatagaina le cannabis oil, lea ua manuia ai nisi peitai na tautino ma faafetai Saunoa isi ona uso e leai na te lē toe taliaina nei vai, o ia lava ia ua sauni e feiloai ma lona Matai.
E toatele ona tauaiga mai Niu Sila, Amerika, ma nisi setete o Ausetalia na malaga mamao mai ona ole fia auai i toe taimi o Saunoa. E ui lava ina auina atu si ona tina ile falemai ile po na aumai ai lona tino maliu i tua i lona aiga ona e maua foi le faletua ia Itele ile gasegase, peitai, na matuai sioa ma lologo le aofia i molimau logomālie a nai ona tuaa ile manino male loto tetele. E faafiafiaina i laua ile tapena o Saunoa i lana faigamalaga.
Ole Aso Lulu na tea nei na faia ai sauniga faaleaiga ole susuga ia Saunoa Lealaogata ae ole Aso Tofi na faia ai ona toe sauniga. Ole susuga lava ia Howard sa vaavaalua male susuga ia Raymond (Fesoasoani muamua) ile po ole family service. Na tuuina ifo lona tino i lona oliolisaga tumau ile fanuamaliu i Wacol.
O Saunoa se alo e faasino ia Alema ma Itele Lealaogata mai Fasitoo ma Satupaitea faapea Siumu ma Neiafu. O ona mātua na avea ma Epikopo i tausaga e tele. Ua faaipoipo atu ia Ana ma e toatolu si ana fanau. Na taualuga le aso faapitoa o Saunoa ise taumafataga tele sa saunia ele Uncle Sam’s Take Away.
Tau ina ia faamaise atu le Agaga ole Atua i aiga faanoanoa ona ole misia ai ole mafutaga male susuga ia Saunoa.
