Na faatumulia i le auvalaaulia, aiga, uo ma ē masani i le faamoemoe o le Mafutaga a Tina a le Ekalesia a le First Samoan Full Gospel Pentecostal Church i Manurewa i le afiafi o le Aso Sa.
O le tele o faafitauli ua tulai mai i lenei vaitaimi i le va o alo tamaitai poo le fanau teine, talu ai le leai o se mafutaga lelei ma tina, na mafua ai ona a‘e se tofa a le taitai o le Mafutaga, le faletua ia Logotaeao Perina Atoa, e faatāua lea sootaga e ala i le Polokalame tāua sa faaigoaina o le “Mother and Daughter Thanksgiving Night”.
Na amata lava i le Sauniga Lotu e masani ai le Ekalesia ona faato‘ā sosoo ai loa lea ma le polokalame na matagofie lona faataunuuina, e ala i le tapenaina lelei o tina uma ma o latou alo tamaitai i aitema. E tofu lava le tina ma le aitema, a lē o le pese, siva poo tala faatino foi, lea na maualuga lona faatinoina.
E talitonu foi na maua ni feau tāua e ta oso ai le aiga e ala i le va lava lea o tina ma fanau teine, aemaise o lenei vaitau faigata. Na iu i se viiga o le Atua mea uma ma le manuia i le vai vevela matagofie na tapenaina e le Mafutaga a tina.
E moni lava, ‘E au le inailau a tina’.
