“Ua afaina a‘u aiātatau faaletagata soifua oloo aiaia ile Faavae”…Opapo Soana‘i Oeti
Ua pua‘ina i ala i faasalalauga ma fesootaiga televavave faaonapo nei tala ole faaiuga ale Autoeaina ole Ekalesia Faapotopotoga Kerisiano Samoa ua faatumau ai le iuga na faia ele Komiti Faatonu ale Autoeaina e aveese tofi faifeau ole susuga Opapo Soana‘i Oeti.
Ole taunuuga ua oo iai le mataupu lenei ua fesiligia ai ma taiala oloo lima taitaiina ai faaiuga fai ale Autoeaina ole ekalesia ile faatinoga ole faimea tonu ma le sailiga ole amiotonu.
E manino mai ile finagalo ole susuga Opapo i lana talanoa ile feiloaiga ma tusitala ile vaiaso ua mavae, e lei valaauina sona avanoa e oo atu ai i luma ole Autoeaina a‘o usuia le latou fono faaletausaga e faaali sona finagalo ma fesili atu foi Toeaiina ae folasia sana tali e tusa ole mataupu na tuua‘ia ai ele Toeaina ole latou Pulega ua lē usitai ile tuutuuga o lana malaga na alu i Roma ile momoliina o lona afafine o Toaipuapuaga.
Ole isi vaega o tuua‘iga o faatusa o Iesu ma Maria sa i totonu ole Malumalu EFKS Siufaga e pei ona faavae ai se isi vaega ole faaiuga ale Autoeaina. Oloo finau mai Opapo o faatusa na faameaalofa atu ele ekalesia Katoliko, ae oloo iai foi se faamatalaga ua ta‘ua ai ole susuga Opapo na ia talosagaina le Katoliko mo ni faatusa. Oloo tuua‘ia e Opapo le Toeaina le susuga Tautiaga Senara ile femoumouai o ana saunoaga. E ese le tala e fai i isi faatatau ile mataupu, ese foi ana saunoaga pe a feiloai ma Opapo ma lona faletua.
Ole femoumouai o mau ale Toeaina ona o lea na faaalia e se tasi o matai o lana aulotu i Matautu Falelatai e faapea, ole latou feiloaiga ma le Toeaina ile afiafi ole Aso Sa lea na tu ai le Tootoo ma faatea nisi o matai ole nuu, na ia faailoa ai e faapea e na ole tasi le tausaga ole faasalaga ole faifeau Siufaga (Opapo). Peitai ina ua aumai e Opapo le faaiuga tusitusia ale Autoeaina e leai se aiaiga ose taimi e aveesea ai tofi faifeau o Opapo.
E fua lea i faaiuga na faamautu ma faamaonia ele Autoeaina i lana fono faaletausaga oloo aveese ai tofi ose isi faifeau ae oloo aiaia ai le taimi ona toe tuuina atu lea ile Autoeaina e iloilo pe toe maua tofi pe leai.
E le o toe po se silafia ole atunuu ile mataupu lenei auā o lea ua faaalia e Opapo ua ia talia le finagalo ole Autoeaina, peitai ua ia maua faamatalaga mai nisi o faifeau Toeaiina ole ekalesia, o nisi e iai ona sootaga faaleaiga, o faifeau Toeaina sa avea ma taitaifono ole ekalesia i tausaga ua tuanai, sa tutulai ma faaoioi ile Taitaifono e taatia le faia ose faaiuga e aveese ai tofi o Opapo ona e le ose mataupu matuia ma e le o solia ai foi se faavae ole ekalesia.
Na oo le tusitala ile maota ole susuga ile Toeaina o Tautiaga Senara i Vaitele ma talosaga ai pe mafai ona maua mai sona finagalo e tali ai tuua‘iga ua faaalia e Opapo. Peitai sa le finagalo le Toeaina e faaali sona lagona. O lona talitonuga a tali mai, e faaauau ai lava ona fetaliai ma lē maua ai se toafilemu.
Ua faailoa e Opapo ile feiloaiga ma tusitala nisi o aafiaga ole faavae ole ekalesia faasino i nisi ole aufaigaluega faifeau ae e le o faia iai se finagalo ole Autoeaina. Ose faifeau oloo tausi nuu i Samoa ae oloo faigaluega uma le faifeau ma lona faletua ise la pisinisi.
Ose faifeau na ta‘ua e Opapo na faaoolima ise Aoao Malua ae oo mai ile taimi nei e le o faia foi iai se finagalo ole Autoeaina. Ile pepa o faaiuga ale Autoeaina na faamaonia i lana fono tele faaletausaga na usuia ile vaiaso ua mavae oloo faailoa ai nisi ole aufaigaluega ma Aoao fesoasoani ua faia iai faasalaga.
Ose tasi o Aoao fesoasoani ua maliu lona faletua e lima tausaga ua aveesea ai ona tofi ona ua nonofo faapoulipouli ma se isi tamaitai. Ose isi Aoao fesoasoani ua faasala mo le 3 tausaga ona ole gutuoso ile faifeau.
Ose faifeau ua aveese ona tofi mo le 3 tausaga ma ua tatala foi le feagaiga ma le aulotu ona ole ona ile avamalosi ma laulauvavale i nofoaga faitele.
Ole faaiuga ole masina fou o Aperila 2017, ole a faatoa tuua ai ele susuga Opapo ma lona faletua o Luisa ma le nofo a alo le aulotu i Siufaga. Faaalia e Opapo ole a foi e tausi lona aiga ona oloo lesitala ona suafa matai e lua. O lona finagalo ole a faaaoga ai ona tomai faafaifeau e saili ai se manuia o aiga ma le nuu.
Ole masina fou e atoa ai le tausaga pe a aulia le aso Maliu talu ona vaaia faailoga o manua ole Faaola ile alo tamaitai o Opapo o Toaipuapuaga.
Ole a faia se lotu faamanatu e pei ona faailoa e Opapo, ma ole isi mafuaaga lea o lona faatoa tuua ole aulotu ua 24 tausaga o galulue ai ile faaiuga ole masina fou.
