O le faaiuga a le faamasinoga i le tagi tau palota mai le itumalo o Anoamaa i Sasae lea na faamaonia ai moliaga o faiga faaalatua ma soloia ai le tofi faipule o Alai‘asa Filipo, o loo momoli mai ai se atugaluga o le faamasinoga i le pitolaau a Pulenuu. I se vaega o lea faaiuga o loo fautuaina ai e le faamasinoga le Palemene ina ia faamanino tiute ma matafaioi o pulenuu, ina ia lē aafia ini taupulepulega faapolokiki pe faaituau.
Na mafua lea fautuaga ona o aafiaga o se pulenuu i tuuaiga a Moefaauo Lufilufi faasaga ia Alai‘asa Filipo ma lana komiti. Peitai o le palota laititi a lea itumalo i le Aso Faraile a sau nei o le a toe sailia ai sona tofi faipule, ua aliali mai ai foi se isi tuua‘iga e aafia ai le tofi Pulenuu o Falefa le afioga Savea Sione, o se tasi sa avea ma faipule o le Palemene i ni paeaiga ua tuanai.
O le sui tauva tamaitai o le vaega faaupufai o le Tautua Samoa, Alai‘asa Elena, sa faigata ona lesitala lona suafa e avea ma sui tauva o le palota laititi ona e faapea sa musu le Pulenuu e saini lana pepa faatumu. O le sui o le Malo mo Falefa na ia sainia ma mafai ai ona lesitala.
O le finagalo o Savea Sione e pei ona lausilafia ai lea tamalii i luga o se tasi o alaata tau televise sa ia faaalia ai, na oo atu le savali a le Tautua Samoa ma faailoa atu ua uma ona lesitala lo latou sui faatu.
O lana faamatalaga i luga o lea televise e leai la se isi tulaga o le a toe tapa ai o ia auā ua uma ona lesitala. Peitai e lei faaalia se finagalo o le Pulenuu pe aisea na musu ai e saini le pepa faatumu. Ua saunoa Alai‘asa Elena i se feiloaiga ma tusitala o le mafuaaga o le musu o le alii Pulenuu ona e lagolago uma le afioaga i sui o le HRPP.
E lē o solomuli ai le taitai o le Malo i le alii Palemia susuga Tuilaepa L Sailele Malielegaoi, i le folasia o sona finagalo ma ia faamamafa le tutoatasi o le Pulenuu i ana faaiuga aemaise o le faatinoina o ona tiute. O le finagalo o le Palemia e ao i le Minisita o Pulenuu ona silasila i le mataupu ma faia se sailiiliga pe faamaonia.
Afai e faamaonia ua tatau lona ona faamuta le tofi o le Pulenuu o Falefa. O se tasi lea o aiaiga i lalo o le tulafono o faigapalota o le a toe silasila i ai le Komisi suesue o le a filifilia e le Malo e toe lauliliuina lea tulafono, ina ua tuanai le faigapalota tele sa faia i le aso 4 o Mati o le tausaga nei.
