O ai na te‘i i le lē taalo o Julian Savea i le taaloga a le Afā ma le Kings i le faaiuga o le vaiaso ua tea nei? Atonu e toatele nisi o le atunuu ua tau iite i le lē filifilia o le tama malosi a le Olopeleki. Ae e lē falala fua le niu.
Saunoa le alii faiaoga o Chris Boyd, “E lē po se lilo i le vaaiga ia Julian, e foliga mai e lei tausisi i le vaaia lelei o lona tino i le mae‘a ai o le Ipu a le Lalolagi.”
“E lē uma ai foi aso. E umi le taamilosaga, ua tatou vaaia foi le lelei o Savea i taaloga ua uma nei.”
Ae o le taimi nei, ua lē filifilia Savea auā e lē o lava le mānava, e pei o le tala a tamaiti. O le vaaiga lava ia Savea ua oso le tino. Tele le tausami i taumafa e fiafia i ai. E lē o le taimi muamua foi lea ua oo ai Savea i lea tulaga. Na faapea foi ona faamalolo e le Olopeleki i le amataga o taaloga a le ‘au a Niu Sila i le tausaga ua mavae.
E iai le malologa a le Hurricanes i le vaiaso lona ono o le Supa Lakapi. Atonu la e iai le avanoa e toe vaaia ai Savea i le aso 9 o Aperila.
Ta‘ua e Gregor Paul o le NZ Herald, o Julian Savea o le faataitaiga moni lea o se tasi ua faasulu e le lē faamaoni le tele o le taleni ma le lelei o le taalo. O ā lelei uma na maua i le taimi o le Ipu o le Lalolagi ua mou ese nei – ma lē vave.
Fai mai Gregor, o Savea, ua na o le pau lea o le uigi talu mai le lua sefulu tausaga e mafai ona faatusa ia Jonah Lomu.
E eseese ai la i lea o ma taofi ma Paul. Ua ou vaaia faalua le taalo a Savea i luga o le malae. O iinā e te vaaia ai le matuā telē o le taleni a lenei alii. E lē na o le tamoe e pei o Lomu ae o le pue, aemaise le lelei ma le tomai o le puipui ma le lautele o lana vaai mamao i le taaloga, o mea ia e lei iai i le taalo a Lomu. E sili ai la Savea i la‘u va’ai i tulaga ia.
Peitai, e tutusa ai la ma‘ua ma le Tusitala a le NZ Herald i le fesiligia pe mafai e Savea ona pulea e ia lava ia. I le taimi o iai i totonu o le lio a le aufili aemaise le aasa o taamilosaga, e faigofie lava ona toe maua le mānava ma le malosi, auā o lena e pulea e isi oe. I le aveesea la o ia puipui, o ina la e lē o mafai ai e Savea ona pulea e ia o ia lava.
O tulaga faapea, o le alu i luga ma lalo o le tino, o mea ia o aso ia. A o aso nei, e lē mafai ona lafi se tasi i lana taleni ma lona lelei faanatura.
Ua tatau ia Savea ona vaai loloto i totonu o ia lava, pe faapefea ona taofia lona lē faamaoni i le taupulea o ona manao ma le augata e koleni na o ia ma tausisi i ai ma le faamaoni.
E faigofie lava i le taimi nei o talavou le alii nei. O loo maua pea le saoasaoa ma le malosi e toe foi ai i le ‘au tele. Ae sau aso, e lē o toe mamao foi e o tutusa ai le lē lava o le mānava ona o le lē koleni ma le faamaoni ma tausi le tino e tatau ai, ma le o a‘e i luga o le lelei o taalo a se isi tagata.
Ona faigata loa lea ia te ia ona toe ofi i totonu. O le taimi lava lenei e tatau ai ia Savea ona vaai mamao, e pei o lana vaai mamao i totonu o le malae, lea e mafai ai e ia ona vavalo mea o le a tutupu i le taimi o le taaloga.
E faapena foi le taleni o loo manaomia e ia mo ia a o iai le taimi e matuā sui ai lona olaga taalo. Ne‘i te‘i ua lē manao mo‘i le Hurricanes ia te ia, poo le Olopeleki foi.
