O le amataga o le taamilosga e sefulu atunuu e faia ai a le taitoafitu a le lalolagi na suipi ai Fiti i le sailiga siamupini o le Ipu Autu na fetaui ai ma Egelani 28-17. O le ‘au a tamaitai Ausetalia na siamupini i le taamilosaga a tamaitai ae peitai o le taaloga semifinal a Egelani ma Amerika na faalua le tuliloa mai e Egelani o le USA ma la latou uigi saoasaoa ia Perry Baker lea na iloga lona sao mo ‘ai 24-19.
Mo le Manu Samoa na amata lava taaloga o le pulu i le sasi o nai pasi ma pue faatigaina ai loa e Aferika i Saute. I le taaloga a le pulu na manumalo ai ia Sikotilani faapea Lusia ma agai atu ai ma fetaui ma Niu Sila ma faia‘ina ai le Manu Samoa.
I le taaloga semifinal o le Plate lea na alo i ai le Manu ma le aumalosi a Ausetalia, na vaaia ai le toe ola mai o Ausetalia ma manumalo. O se sikoa na alu atu ma Belgium Tuatagaloa ae toe pasi mai totonu ia Samoa Toloa ma palasi ai le polo na semanu e toe ala mai ai Samoa.
O le ‘afa muamua na sikoa ai le kapeteni ia Faalemiga Selesele ma semanu e lalata ai ‘ai o le taaloga. O le ‘au na iloga le mataina o lana taalo o Amerika lea sa manumalo ia Niu Sila i le taaloga e saili ai le tolu ma le fā i ‘ai e 33-12.
O se taaloga na molimau ai nisi i le saoasaoa o uigi tamauli a Amerika ia Perry Baker faapea Carlin Isles. O se ‘au foi ua toatele tama Pasefika o loo taaalo ai.
O le Siamupini a Fiti ua amata ai foi le tauvaga i le pito i luga ae o le Ipu mafolafola na manumalo ai Aferika i Saute 19-14 a Ausetalia.
O Farani na manumalo i le Tanoa ma sauni atu ai ‘au uma e toe fetaui i le faaiuga o le vaiaso nei i Cape Town, Aferika i Saute.
